Ensambo 29 - Baibuli Ekibono kya Katonda 2014

Obufuzi obukalamu

¹ Omuntu ye banenia emikuzi kamaala ng'ayongera bwa kukalambalira mu nsobi, mu kaseera buseera balimutentena nga takairayo kuwona.

² Abatuufu bwe bafuuka abafuzi, abantu basagamba; aye ababi bwe baba mu bufuzi abantu baba mu bulumi.

³ Omwana ayenda einho okuba omugezi yeesiimisa abazaire be, aye ole aba mu bamalaaya amalagho ebintu okubisansaania.

⁴ Kyabazinga ajiira ku kukola amazima aleetera ensi ye okuba emiraala, aye ole ayenda enguzi buli kiseera aitaitana ensi.

⁵ Omuntu asuutasuuta mwine, aba ali kumutega mutego.

⁶ Omuntu omubi, ebibi by'akola bimugemya ng'oti mutego, aye ole akola ebituufu abaagho ng'asagamba era ng'ayemba.

⁷ Omuntu akola ebituufu amanha omwavu by'agwaniire okukolerwa, aye omukozi w'ebibi tabifaaku naire.

⁸ Abantu abatalumirwa banaibwe basiikuula abantu ab'omu kibuga baatabukatabuka, aye abategeevu baikaikania obusungu bw'abantu.

⁹ Omugezi bw'atakana n'omusiru, omusiru asungughala yeesesasesa era yaaloba kusirika.

¹⁰ Abatemo bakyayira irala omuntu aziraku musango, aye abeesimbu balabirira omuntu oyo.

¹¹ Omusiru bw'asoola tiyeerekaamu, aye omugezi afuga obusungu bwe.

¹² Omufuzi awulirisa einho eby'obuguya, abakungu be boonaboona baba babi.

¹³ Ekiyimba omwavu n'ole atuntuza bantu baine, ni kino: bombi Musengwa Katonda n'abagha okubona endhuba.

¹⁴ Kyabazinga akolera abaavu kye bagwaniire okukolerwa, obwakyabazinga bwe bwidha kubangagho byanda na byanda.

¹⁵ Okukangaivula n'okunenia byegeresa, aye omwana alekebwa agho atyo n'atakobwaku, aswaza omuzaire we.

¹⁶ Ababi bwe baba mu bufuzi, okwiza emisango kweyongera, aye abatuufu baja kwerolera okugwa kw'ababi abo.

¹⁷ Kangaivulanga omwana wo, aidha kukweyagazanga; era akufuulenga okuba omusangaavu.

¹⁸ Bwe ghabula okugalaga okuva ye Katonda abantu bataamuuka eyo batyo, aye wa nkabi oyo ajiira ku mateeka ga Katonda.

¹⁹ Okwogera obwogere tikumala kukangaivula mugheereza, kuba ni bw'ategeera by'okoba tabifaaku.

²⁰ Omusiru ghabaaghooku k'omusuubiramu, okusinga ole amala gaghalambula bwa bibono.

²¹ Omuntu ayola obubi omugheereza we okuva mu buto, ku nkomerero yeeyagaana ng'amukikinaireku.

²² Omuntu asungughala amangu asiikuula okusoola, n'omuntu omukambwe agwa mu bizibu kamaala.

²³ Okwekuluntaza okw'omuntu kumuleetera okugwa, aye obuwombeefu bw'omuntu bumuteesaamu ekinhagansi.

²⁴ Omuntu akolagana n'omwibi akyagha obulamu obubwe mwene, era ni bwe bamulayiza takwekula mazima.

²⁵ Omuntu ali n'okutya aba mu kabi, aye ole eyeesiga Musengwa Katonda, Katonda oyo amuwonia ebizibu.

²⁶ Abantu kamaala benda okuba abagonzi eri omufuzi, aye Musengwa Katonda yenka n'akolera abantu obutuufu.

²⁷ Ababi bakyagha abatuufu, n'abatuufu baakyagha ababi.