Ensambo 28 - Baibuli Ekibono kya Katonda 2014

Amagezi agali mu mateeka ga Katonda

¹ Ababi balumuka nga ghazira na kiri kubabinga, aye abatuufu baba bagumu ng'oti mpologoma.

² Ensi erimu aboonooni ebaamu abafuzi kamaala, aye bweghabaagho abafuzi abategeevu era abagezi, ebaamu emiraala.

³ Omufuzi omubi, atuntuza abaavu, ali ng'oti n'amaadhi ag'omugozi agazikiriza emere yoonayoona.

⁴ Abo abatajiira ku mateeka basaaka ababi, aye abagajiiraku babalwanisa.

⁵ Ababi tibategeera kukola mazima kye kitegeeza, aye abasinza Musengwa Katonda bakitegeera bukalamu.

⁶ Omuntu amala gaba mwavu aye nga mwesigwa, atabaire mukombe aye nga mukupankupania.

⁷ Omwana agema amateeka aba mugezi, aye ole eyeeyimba mu bawuuduukira eby'okulya, aswaza omuzaire we.

⁸ Omuntu afuuka omukombe ng'aseera afune amagoba, obukombe bwe bulija y'oyo agemerwa abaavu ekivunika.

⁹ Omuntu atenda kuwulira mateeka, n'okusaba kwe Katonda akwenhinhata.

¹⁰ Ole akiidhamya omuntu omwesimbu n'amukozesa ekibi, ebiina by'asima okutega baine, mwene n'alibigwamu. Aye ole aziraku musango alifuna ebirungi kamaala.

¹¹ Omukombe yeebona nga mwene mugezi, aye omwavu omutegeevu azuula ki kyene omukombe oyo ky'ali.

¹² Omutuufu bw'afuuka omufuzi abantu basangaala, aye omubi bw'akuzibwa abantu beegisa bwegise.

¹³ Ole akweka ebibi bye, ebintu tibiidha kumujiiranga bukalamu, aye ole abyatula era n'atabiiramu, Katonda alimusaasira.

¹⁴ Wa nkabi ole atya Musengwa Katonda buliidho, aye ole akalangusa omwoyo gwe afuna ebizibu ebitaloodheka.

¹⁵ Ng'empologoma oba ekisolo ekikambwe ekindi, bwe biba eby'akabi eri kye byenda okugema, n'omufuzi omubi yeena atyo bwaba ow'akabi eri abaavu.

¹⁶ Omufuzi aziramu kategeera anhigiriza b'afuga n'obukambwe, aye ole akyagha amagoba agava mu kukupankupania aghangaala.

¹⁷ Omuntu bw'atemula mwine aba yeesimiire mwene amagombe amangu ago, era ghatabangagho amuyamba.

¹⁸ Omuntu omwesigwa aidha kubanga bukalamu, aye atali mwesigwa aja kugwa mangu inho.

¹⁹ Ole alima eitaka lye aidha kubanga n'emere kamaala, aye ole amala ebiseera bye ku mirimo egitaleeta magoba, aidha kubanga mwavu lubeerera.

²⁰ Omuntu omwesigwa aidha kubanga n'enkabi kamaala, aye ole afuna obukombe obw'amangu aidha kubonerezebwanga.

²¹ Omuntu okusaliriza kiba kibi, aye abantu bakikola olw'okufuna ke banaalya ni bwekaba katono katya.

²² Omuntu omukenge agwidhubanira okufuna okukombaghala, nga taidhi ng'obwavu bulimwidhira.

²³ Ole anenia omuntu, amala yaasiimibwa omuntu oyo, okusinga ole amusuutasuuta.

²⁴ Ole anhaga ku bazaire be ebyaibwe ng'alowooza ati ti kibi, aba n'ekirala n'omutemo.

²⁵ Omuntu eyeeyendeza buli kintu asiikuula okusoola mu bantu, aye ole eyeesiga Musengwa Katonda aligheebwa obukombe.

²⁶ Omuntu eyeesiga ebyo mwene by'alowooza aba musiru, aye ole ajiira ku kwegeresa okw'abagezi akabi tikalimutuukaku.

²⁷ Omuntu agabira abaavu taja kwavughalanga, aye ole ababona n'atabafaaku alikolimirwa inho.

²⁸ Omubi bw'afuuka omufuzi abantu beegisa bwegise, aye bw'atoolebwa mu bufuzi, abatuufu beeyongera obungi.