Ensambo 27 - Baibuli Ekibono kya Katonda 2014

Buli lunaku lukya na byalwo

¹ Oteesuutanga lw'ebyo by'onaakola lwaidho, kuba toidhi lunaku bye lunaakya nabyo.

² Lekanga abantu abandi n'ababe bakusaake ni bwe baba nga bagwira, se ti iwe mwene kwesaaka.

³ Waire amabaale n'omusenho bizitogha, aye ebizibu omusiru by'aleeta bizitogha okuwula ebyo byombi.

⁴ Waire ng'omuntu aliku ekiruyi n'obusungu aba mukambwe era wa kabi, aye tatuuka ku wa nsaalwa.

⁵ Okunenia omuntu maiso ku maiso, kuwula okugisa ensobi ye ng'oyenda okumulowoozesa nga bw'omwenda einho.

⁶ Weesigenga mukagwa wo akunenia waire nga by'akuneniamu bikunhiga, se ti kwesiga omuzigu wo akusuutasuuta.

⁷ Omuntu aigwite tawoomerwa ni bweguba omudheenene ogw'endhuki, aye omuyala awoomerwa n'ebikaagha.

⁸ Omuntu atambulatambula eyo atyo okuva ghaka we, aba ng'oti n'enhonhi egulukira eyo etyo okuva mu kisu kyayo.

⁹ Ebizigo n'obuwoowo obwesiigibwa bisangaaza omuntu, aye ebizibu bimuleetera okweinhamira.

¹⁰ Otavanga ku bakagwa bo, oba bakagwa ba lata wo. Otanoonerezanga waluganda lwo ng'oli mu buzibu. Muliraanwa wo akuli okumpi awula owoluganda ali eghala.

¹¹ Mwana wange, banga mugezi ondeeterenga okusangaala, olwo nfunenga eky'okwiramu oyo ananvumanga.

¹² Omuntu omutegeevu abona akabi nga kali kwidha yaakeeghala, aye ole aziramu magezi aja buje yaakagwamu.

¹³ Ole eyeeyimirira omuntu y'ataidhi ali n'okutoolebwaku ekintu ky'asinzeegho, okukakasa ng'eibandha liidha kusasulwa.

¹⁴ Omuntu awuuna mu nkyo einho n'ayasiikana ng'alamusa mwine, aba ng'oti ali kumukolimira bukolimire.

¹⁵ Omukazi asoolasoola ali ng'oti n'amaadhi agatoonherera obutalekera.

¹⁶ Okumusirisa kuba kuzibu inho ng'oti n'okulobera empewo okufuuwa, oba okugema omuzigo ogukuuluula mu ngalo.

¹⁷ Omuntu ayegera ku mwine, ng'ekyuma ekigumu einho bwe kighagala kyuma kiinaakyo.

¹⁸ Omuntu alabirira omuti omutiini alya ku bibala byagwo, n'ole alabirira musengwa we ateebwamu ekitiibwa.

¹⁹ Ng'omuntu bwe yeebona mu maiso ng'alinze mu maadhi, era otyo bwe yeebona nga bw'afaanana ng'alinze mu mwoyo gwe.

²⁰ Ng'amagombe bwe gatalekera kumira bafu, n'amaiso g'omuntu goona gatyo bwe gataiguta kubona.

²¹ Ng'omuliro bwe gukozesebwa okukenenula feeza ni zaabu okubona obulungi bwabyo, n'omuntu atyo bwe bamulamula nga bajiira ku birungi ebimwogerwaku.

²² Omusiru ni bw'omusekula mu kinu ng'oti ni bwe basekula engaano okugitoolaku obukaba, obusiru bwe tibumuvaaku.

²³ Olabiriranga bukalamu ebyayo byo, era waafangayo inho ku nsolo dho.

²⁴ Eby'obukombe tibibaagho lubeerera, era engule y'ofuna teba ya baana na baidhukulu nse na nse.

²⁵ Eisubi ery'ebyayo bwe liba nga limaze okusalibwa era ng'eito liri kumera, n'ery'oku nsozi nga lyona limaze okusalibwa lyaterekebwa,

²⁶ osobola okwekolera eby'okuvaala mu buviiri obw'entaama dho ento, n'okutunda ku mbuzi dho waagula eitaka.

²⁷ Era waaba n'amata ag'embuzi agakumala okufunamu emere ey'okuliisa ab'omu maka go, ghalala n'abairu bo abakazi.