Ensambo 26 - Baibuli Ekibono kya Katonda 2014

¹ Ng'omugozi bwe gutagwanira kugwa mu ndoboozi, oba amaadhi okugwa mu biseera eby'amakungula, n'omusiru atyo bw'atagwaine kuba na kitiibwa.

² Ng'enkazaluya bw'epuuluukira eyo etyo, n'akamiini ni kagulukira eyo katyo, n'ekikolimo eri omuntu aziraku nsonga kityo bwe kiba, tikimugema.

³ Ng'embalaasi bw'eri n'okukubwa enkoba, n'endogoyi okusibwa enkoba mu nkoto, n'omusiru atyo bw'ali n'okukubwa emiigo.

⁴ Otaizaganianga bibono bya kisiru na musiru, olwo olobe kuba ng'oti ni mwene.

⁵ Omusiru omwirangamu bya kisiru, olwo alobe kwebona ng'omugezi.

⁶ Omuntu atuma omusiru okutwala obukwenda, aba ng'oti yeetemyeku mwene amagulu era yeereetera mwene ebizibu.

⁷ Omusiru okukozesa ensambo kuba kudaagira bwereere, ng'oti n'omulema okukozesa amagulu ge agalengeedha obulengeedhe.

⁸ Okuta mu musiru ekitiibwa kuziramu makulu, ng'oti n'okusuula eibaale mu nsuumulo ng'olisibiiremu.

⁹ Omusiru okukozesa ensambo kuba kudaagira bwereere, ng'oti n'omutamiivu okugezaaku okwetundula eiwa mu ngalo.

¹⁰ Omuntu atoola buli musiru y'aboine n'amutaagho okumukolera omulimo, aba ng'oti n'omulasi ow'obulaso afumita buli muntu.

¹¹ Omusiru airamu okukola eby'ekisiru omukuzi ogundi, aba ng'oti n'embwa emala n'erya by'eseseime.

¹² Omusiru ghabaaghooku k'omusuubiramu, okusingaku ole eyeebona nga mugezi.

¹³ Omugayaavu yeegemenkereza ng'akoba ati: “Bwe nja mu ngira eriyo empologoma, ni mu nguudo edh'ekibuga yoona eriyo empologoma.”

¹⁴ Ng'olwigi bwe lwewuubira ku pata dhaalwo nga luzira ghe luja, n'omugayaavu yeena atyo bwe yeekyukiza mu buliri bwe.

¹⁵ Omuntu omugayaavu akoza emere mu kibya, aye kyamukaluubiriza inho okugita mu kanwa.

¹⁶ Omugayaavu yeebona nga mugezi, okuwula abantu omusanvu abasobola okumwiramu obukalamu.

¹⁷ Omuntu eyengiza mu kusoola okutamugemaku, aba ng'oti n'omuntu agema ku matu g'embwa y'ataidhi.

¹⁸ Ng'omulalu asuulasuula ebisiki eby'omuliro era n'alasa obulaso obwita bw'aba ow'akabi,

¹⁹ n'omuntu alimba mwine n'amala n'amukoba ati: “Mbaire ndi kudhondha” yeena atyo bw'aba.

²⁰ Ng'okuwaagho okw'enku bwe kuleetera omuliro okuzikira, n'omuntu ow'olubono bw'avaagho okusoola kukoma.

²¹ Ng'amanda bwe gakuuma omuliro mu ziiko, n'enku ni dhikuuma omuliro nga gukaayaka, n'omuntu asoolasoola atyo bw'akuuma ebizibu nga bikaaligho.

²² Ebibono eby'omuntu ow'olubono biri ng'oti mere ewooma einho, biika byatuukira irala mu nda.

²³ Ebibono ebiwoomerera, omuntu by'ayogera ni bigisa omwoyo omubi gw'ali nagwo, biri ng'oti kiwumbe kya itosi butosi kye baasiigaku feeza.

²⁴ Omuguya agisa obukyayi bw'ali nabwo ku mwoyo, ng'ayogera ebiwooyawooya.

²⁵ Aye ni bw'ayogera ebibono ebiwooma bitya, otamwikirizanga, kuba mu mwoyo gwe mwidhwire ebintu kamaala ebyenhinhalwa.

²⁶ Era ni bw'aghemba atya ku bukyayi bw'ali nabwo, obubi bwe buja kumanhibwa abantu boonaboona.

²⁷ Ole asima ebiina okutega baine aja kubigwamu mwene, n'ole asiringisa ogubaale gugwe ku baine guja kumwiriraku mwene.

²⁸ Omuntu omuguya, aba yakyagha abo b'aguya. Era okusuutasuuta omuntu kumuleetera kuzikirira.