Ensambo 25 - Baibuli Ekibono kya Katonda 2014

Ensambo dha Solomoni edhindi

¹ Dhino n'ensambo dha Solomoni edhindi, abaghandiisi ba Kyabazinga Hezekia owa Buyudaaya dhe baakoopolola.

² Tugha Katonda ekitiisa olw'ebyo by'atugisa, aye twagha bakyabazinga ekitiisa olw'ebyo bye banoonereza ni bazuula.

³ Ng'eigulu bwe litweswire ghaigulu mu ibbanga, era ng'entobo y'ensi bw'etweswire ghansi mu itaka, mu nsambo n'endala n'ebidhuubo bya bakyabazinga bityo bwe byeswire okumanha kwaife.

⁴ Feeza bamala kumukenenulamu iseedha, memale omugheesi yaasobola okumukolamu ekintu ekikalamu.

⁵ Mu nsambo n'endala, n'ababi bali n'okutoolebwa aghali kyabazinga, memale obufuzi bwe bwajiira ku butuufu.

⁶ Oteetanga mberi mu maiso ga kyabazinga, oba okuba mu kifo aghaba abantu abakologho.

⁷ Kiba kikalamu abantu okukukoba bati: “Seeta eno emberi,” okusinga okukuswaza mu maiso ag'omuntu ow'ekitiisa nga bakwiza einhuma.

⁸ Oteeyunirizanga kuseegha muntu mu mbuga olw'ekyo ky'oboine, kuba omuntu owundi asobola okuleeta obudhulizi obukontana n'obubwo yaakuswaza.

⁹ Bw'obanga n'ensonga ku mwino mugyogerengaku nga muli mwenka, era buli muntu ataghembulanga byama bya mwine.

¹⁰ Ole bw'aliwulira ekyama ekyo aja kukwanika mu bantu, era osigale ng'okaaswala.

¹¹ Ekibono ekyogeirwa mu kiseera ekituufu, kiba kirungi ng'oti ni zaabu atoneibwatoneibwa mu feeza.

¹² Ow'amagezi by'agalagira omuntu eyeetegeike okuwulirisa, biba bya mughendo okuwula empeta ya zaabu n'ebintu ebyakolebwa mu mabaale ga zaabu.

¹³ Omukwenda omwesigwa aizaamu amaani abo abaamutuma, ng'oti n'amaadhi ag'okunhwa amainhogovu bwe gaghegheeza abaganhwa mu kasana mu biseera eby'okukungula.

¹⁴ Omuntu asuubiza ekirabo aye n'atakigha, ali ng'oti bire na mpewo ebitavaamu maadhi ni gagwa.

¹⁵ Omuguminkiriza aikirizisa omufuzi okukola ekintu, n'olulimi olw'okwewooya lwaghangula ebizibu.

¹⁶ Bw'oyagaananga omudheenene gw'endhuki olyangaku ogukumala obumale, tomanha bwegubitirira ni gukwesuukuula ku mwoyo n'ogusesema.

¹⁷ Otakyaliranga muntu mikuzi kamaala, kuba tomanha bw'omusina n'akukyagha.

¹⁸ Omuntu agha ku mwine obudhulizi obw'obulimba, aba wa kabi ng'oti n'omwigo ogw'entole bwe gutentena, oba ng'empiima bw'efumita, oba ng'akalaso bwe kakubitamu.

¹⁹ Okwesiga omuntu ateesigika mu biseera ebizibu, kuli ng'oti kulya na liino irwaire, oba kutambula na kigere ekibinwike.

²⁰ Okwembera omuntu ali mu nnaku, kuli ng'oti kumwambulamu kivaalo mu kiinhogogo, oba kumufuka muunhu mu ibwa.

²¹ Omuzigu wo endhala bw'emulumanga omughanga eky'okulya, era bw'abanga endiwo omughanga eky'okunhwa.

²² Bw'okola otyo olimuswaza, era Musengwa Katonda alikugha empeera.

²³ Ng'empewo ey'oku luuyi olw'omukono omugooda olw'e buvandhuba bw'ereeta amaadhi, n'okugeya kutyo bwe kuleeta obusungu.

²⁴ Omuntu amala gasula ghaigulu ku ndhu, atasuze mu ndhu ndala na mukazi asoolasoola.

²⁵ Okuwulira amawulire amalungi agava eghala, kuli ng'oti n'okunhwa amaadhi amainhogovu ng'endiwo ebaire ekuluma.

²⁶ Omuntu akola ebituufu bw'aganha okutwalirizibwa omukozi w'ebibi, aba ng'oti n'ensulo eidhwire ebitosi, oba ye basiikwire.

²⁷ Nga bwe kitali kirungi kunhwa mudheenene gwa ndhuki mungi, era kityo bwe kitali kirungi muntu kwenda inho kusaakibwa.

²⁸ Omuntu ataidhi kwefuga ali ng'oti n'ekibuga ekirumbiibwa ni kirekebwa agho kityo, nga tikikaali na kimante kikyezungulwire.