Ensambo 24 - Baibuli Ekibono kya Katonda 2014

Edheikumi n'omwenda

¹ Oteegombanga bakozi ba bibi naire, era otagezanga kubafuula bakagwa bo.

² Mu myoyo gyaibwe bayiiya kukola bya bukambwe era bye boogera bireeta kutabulatabula.

Edhamakumi abiri

³ Endhu ezimbwa na magezi, era yaaguma bweghabaagho okutegeera.

⁴ Okumanha kwidhuza ebisenge byayo ebintu eby'omughendo era ebirungi.

Edhamakumi abiri n'endala

⁵ Omuntu omugezi awula ole ow'amaani era ali n'okumanha awula ow'obuyinza.

⁶ Kuba okulwana olutalo osooka kwebuuza ku magezi era aghali abawi ab'amagezi kamaala ghabaagho okughangula.

Edhamakumi abiri n'eibiri

⁷ Amagezi gaswikiriire inho okutegeera okw'omusiru, era azira ky'ayogera nga bali mu kifo eky'olwekobaano.

Edhamakumi abiri n'eisatu

⁸ Omuntu ategeka okukola akabi buli kiseera, balimweta, “mwene kubidooma”.

⁹ Omusiru by'ategeka okukola byonabyona, bivaamu bibi byereere, era abantu bakyayira irala omuntu omunhoomi.

Edhamakumi abiri n'eina

¹⁰ Bw'owaamu amaani mu kiseera ekizibu, oba oli munafu.

Edhamakumi abiri n'eitaanu

¹¹ Owonianga abantu be bali kutwala okwita, era waaloberanga abantu okubaghaluudhania, okuja okubatirimbula.

¹² Osobola okwewuuguusa oti: “Bona eno, ekyo nze tikimanhangaku naire.” Aye Katonda abona ebigendererwa eby'omuntu era yaabimanha. Oyo n'akuuma obulamu bwo, era abona buli kintu. Era aja kusasula buli muntu, ng'ajiira ku bikolwa bye.

Edhamakumi abiri n'omukaaga

¹³ Mwana wange, lyanga ku mudheenene ogw'endhuki, kuba mulungi. Nga bwe gudhuudhuula ku lulimi lwo, nga guva mu bisasala byagwo,

¹⁴ manha oti n'amagezi goona gatyo bwe gali amalungi y'oli. Bw'ogafuna, obulamu bwo obw'omu maiso, bwidha kubanga bukalamu, n'ebyo by'osuubira birobenga kukufa busa.

Edhamakumi abiri n'omusanvu

¹⁵ Otabanga ng'ababi abeeteega amaka ag'abatuufu, era ni bagalumba okugakolaku eby'obukambwe.

¹⁶ Abakola ebituufu ni bwe bagwa emikuzi kamaala gitya, bamala baasituka aye abakozi b'ebibi bazikirira buzikirire ng'akabi kabaidhiire.

Edhamakumi abiri n'omunaana

¹⁷ Otasagambanga ng'omuzigu wo agwire waire okusanhuka ng'agangaliime.

¹⁸ Musengwa Katonda aidha kukibona anakughale, era alekere agho okusungughalira ole.

Edhamakumi abiri n'omwenda

¹⁹ Otafangayo ku abo abakola ebibi, era oteesiimisanga babi.

²⁰ Omubi azira ky'asuubira mu biseera bya mu maiso, era aja kuzikira ng'oti ntaala.

Edhamakumi asatu

²¹ Mwana wange otyanga Musengwa Katonda ni kyabazinga, era otabadheemeranga.

²² Akabi Musengwa Katonda ni kyabazinga ke balisindika, kaja kukugwaku bugwe. Era ghazira aidhi kuzikirira okuliva mu kabi ako ghe kulyaga.

Endhogera edh'amagezi edhindi

²³ Dhino dhoona ndhogera dha ba magezi: Kiba kibi omuntu okusaliriza ng'ali kusala emisango.

²⁴ Ole akoba omuntu eyaiza omusango ati: “Ja, oziraku musango,” abantu balimukolimira n'amaghanga gaamukyagha.

²⁵ Aye ole abonereza omuntu eyaiza omusango ebintu biri mujiira bukalamu, era abantu baamusabira enkabi.

²⁶ Omuntu okukwiramu ekituufu, ako kaba kamanhiso ka mukwano.

²⁷ Sooka otereeze emirimo gyo egy'okuliya, era otegeke bukalamu emisiri gyo, memale weezimbire endhu.

²⁸ Otaghanga budhulizi ku muntu ng'ozira nsonga ntuufu, era otayogeranga bya buguya.

²⁹ Otakobanga oti: “Ky'ankoze zeena kye ndimukola; ndimwesasuuza olw'ekyo ky'ankoze.”

³⁰ Lwali lulala, naabita ku musiri ogw'omugayaavu; ku isamba ery'emizabbibu ery'omuntu aziramu kategeera.

³¹ Naja okubona, nga mwonamwona muzise n'amawa; era nga ku itaka kwidhwire isubi, n'olukomera lwaku olw'amabaale nga lwagwa.

³² Bwe nakibona naalowooza inho, era naafunamu eky'okwega kino:

³³ Eby'okutendukaku akatono n'eby'okulambaalaku akatono, era n'eby'okuzingira amakono okuwuumulaku,

³⁴ n'ebireetera obwavu okulumba omuntu ng'oti mukambuzi, n'obwetaavu okumweyongeraku ng'oti n'ole omunhazi ali n'ekiisi y'anhazeeku ebibye.