Ensambo 23 - Baibuli Ekibono kya Katonda 2014

Edhomukaaga

¹ Bw'otyamanga ku kiiwulo okulya n'omuntu ow'ekitiibwa, weegenderezanga bye bataire mu maiso go.

² Bw'oba ng'oli muntu alya einho, weepimiranga.

³ Otavuvuuganiranga birungo bye by'agabula, kuba asobola okuba ng'ali kukuleba.

Edhomusanvu

⁴ Oteekanulanga olw'okwenda okufuna obukombe, banga mugezi ng'obalirira obulamu bwo.

⁵ Kuba obukombe osobola okububona oti, aye bwavaagho mangu bwaba ng'oti bumeze maghagha, bwagulukagho ng'oti n'enkookooma bw'egulukira ghaigulu n'ebulagho.

Edhomunaana

⁶ Otaganhanga kuja kulya mere ya mukodo era otavuvuuganiranga birungo bye by'agabula.

⁷ Kuba, nga bw'alowooza munda, ni ku ngulu bw'ali. Akukoba ati: “Lya era onhwe,” aye ng'omwoyo gwe gukuziraku.

⁸ Olisesema by'oliire byonabyona, ni by'oyogeire ebirungi bya kufa bityo.

Edhomwenda

⁹ Otayogeranga na musiru, kuba amagezi g'omugha aja kuganhooma bunhoome.

Edheikumi

¹⁰ Otakyusanga mbibi ey'eira, oba okutoola eitaka lya bamulekwa

¹¹ kuba Musengwa Katonda Omununuzi waibwe w'amaani, era alibawolezagho omusango gwaibwe n'iwe.

Edheikumi n'endala

¹² Oisanga omwoyo ku bye bakugalagira, era waawulirisanga eby'amagezi bye bakwegeresa.

Edheikumi n'eibiri

¹³ Otalobanga kukangaivula mwana okumukuba omwigo ti kumwita.

¹⁴ Mu butuufu okumukuba, kuwonia obulamu bwe.

Edheikumi n'eisatu

¹⁵ Mwana wange, bw'oba omugezi zeena nsangaala.

¹⁶ Ndisagamba bwe ndikuwulira ng'oyogera ebituufu.

Edheikumi n'eina

¹⁷ Oteegombanga boonooni naire, aye sigalanga ng'otya Musengwa Katonda ekiseera kyonakyona.

¹⁸ Olwo obulamu bwo obw'omu maiso bubenga bukalamu, n'ebyo by'osuubira birobenga kukufa busa.

Edheikumi n'eitaanu

¹⁹ Mwana wange, wulirisanga bukalamu obe mugezi, era ofengayo inho okutereeza obulamu bwo mu ngira entuufu.

²⁰ Weesambenga abantu abanhwa einho omwenge, n'abo abeesokera emere embitirivu

²¹ kuba abatamiivu n'abaluvu baavughala, era ole bw'aba ng'akola gwa kulya na gwa kutenduka, talwa kuvaala nkanda.

Edheikumi n'omukaaga

²² Wulirisanga lata wo, kuba n'eyakuzaala era otanhoomereranga inhoko, waire ng'akairiighe.

²³ Oghangayo empiiya waagula amazima, n'amagezi, n'okugalagirwa, n'okutegeera, aye otabitundanga naire.

²⁴ Omuntu omutuufu, aleetera ise okusagamba einho, era ole ali n'amagezi, aleetera eyamuzaala okusangaala.

²⁵ Leka lata wo n'inhoko basangaale leka omukazi eyakuzaala asagambe.

Edheikumi n'omusanvu

²⁶ Mwana wange, tanga omwoyo ku bye nkukoba, era otwale obulamu bwange ng'eky'okuboneraku.

²⁷ Malaaya ali ng'oti n'olwina oluleeyiriri era omukazi omwenzi yaaba ng'oti n'ensulo enfunda mw'otaghanga kuva.

²⁸ Yeeteega abantu ng'oti munhazi, era yaayongera ku mughendo ogw'abasaadha abatali beesigwa.

Edheikumi n'omunaana

²⁹ Naani agwirwa ebizibu buli kiseera? Naani aba mu kusoolasoola? Naani aba mu kwemuluguunhia? Naani ye banuubulanuubula eby'obwereere? Era naani aba n'amaiso nga gamumyuse?

³⁰ N'abo abatava ku kunhwa mwenge era abenda okunhwa ku bika kamaala eby'omwenge.

³¹ Otaganhanga mwenge kukusendasenda, ng'oli kubona gumyuse bukalamu, nga guli kumesunkana mu giraasi, era nga gughegheeza gha mamiro ng'ogunhwa.

³² Ku nkomerero gukudhumika ng'oti n'omusota ogw'obusagwa.

³³ Olwo waatoolera okubona ebintu ebitategeerekeka, era nga toghanga kulowooza oba kwogera bukalamu.

³⁴ Era waawulira ng'oti ogalaamiriire ku maadhi mu nhandha, era waawulira akantoolooze ng'oti oli kwewuubira ghaigulu ku mulongooti.

³⁵ Agho waakoba oti: “Bankonse aye tibaanoziiza! Bankubye aye tiwuliire bulumi. Oba nnaasituka li nfuneyo ogundi nhweku kabiri?”