Ensambo 22 - Baibuli Ekibono kya Katonda 2014

Okwebisa obukalamu

¹ Okuba n'empisa enkalamu mu bantu kuwula okuba n'eby'obukombe kamaala, era okuba omugonzi kuwula okuba ni zaabu oba feeza.

² Ekiyimba omukombe n'omwavu ni kino: bombi Musengwa Katonda n'eyabakola.

³ Omuntu omutegeevu abona akabi nga kali kwidha yaakeesamba; aye ole azira magezi aja buje yaakagwamu.

⁴ Abantu abawombeefu era abatya Musengwa Katonda, bafuna obukombe n'ekitiibwa n'obughangaazi.

⁵ Amawa n'emitego biba mu ngira ey'ababi, aye ole ayenda okwekuuma nga mulamu abyesambira irala.

⁶ Oyegeresanga omwana okwebisanga obukalamu, ni bw'alikula taja kwerabira.

⁷ Abakombe n'abafuga abaavu, era ole eyeewola afuuka mwiru w'ole amuwola.

⁸ Omuntu asiga mu bantu obutakola mazima alikungula obuzibu obutaloodheka era alirekera agho okutuntuza baine.

⁹ Wa nkabi oyo omugabi, kuba agha abaavu ku mere ye.

¹⁰ Bw'obingagho omunhoomerezi, olwo oba obinzeegho n'entalo, era okusoolasoola n'okuvumagana agho ghe bikoma.

¹¹ Omuntu ayenda okuba n'omwoyo omunaabuufu, era nga by'ayogera bya kivunika, n'aliba mukagwa wa kyabazinga.

¹² Musengwa Katonda yeekalirisa okubona ng'amazima gakuumibwa, aye atakania obulimba obw'abaguya.

¹³ Omugayaavu yeegemenkereza ng'akoba ati: “Bwe nja kuliya eriyo empologoma.” Kabiri ati: “Baidha kundhitira mu nguudo.”

¹⁴ Olulimi olw'okwewooya omukazi omwenzi lw'akozesa, luli ng'oti lwina luleeyiriri, omuntu Musengwa Katonda y'asungughalira, n'alugwamu.

¹⁵ Kiri mu butonde obw'omwana omuto okukola eby'ekisiru, aye omwigo gubimutoolamu.

¹⁶ Omuntu atuntuza omwavu ng'ayenda okweyongeraku obukombe, oba n'agha abakombe ebirabo, amala mwene yaayavughala.

Endhogera amakumi asatu edh'amagezi

¹⁷ Wulirisanga abantu ab'amagezi bye baakoba, era oisengayo inho omwoyo ku bye nkwegeresa.

¹⁸ Kuba bw'obigema ku mwoyo oidha kubanga musangaavu, era nga bikuli ku munwa ekiseera kyonakyona.

¹⁹ Ndi kuja kubikwegeresa buti, oyege okwesiganga Musengwa Katonda.

²⁰ Nkughandiikiire endhogera amakumi asatu edhiidhwire amagezi n'okulambibwa.

²¹ Dhiidha kukwegeresa omanhe amazima, olwo abakutumye okuganoonia onaabairangamu ekituufu.

Edhisooka

²² Otatetenkerezanga mwavu olw'okuba ti yeeghanga, oba okukiriga omughafu ali kuwoza omusango.

²³ Kuba Musengwa Katonda aja kubalwanirira, era aja kwesimba mu abo ababatiisatiisa.

Edhokubiri

²⁴ Otakwananga muntu wa busungu, oba okubita n'ole nga mukambwe.

²⁵ Kuba oghanga okugema emize gyaibwe egyo, gy'akugemya ng'oti mitego, waaloba kugivaamu.

Edhokusatu

²⁶ Otabanga mu abo abeeyama okusasuliragho omuntu eibandha nga bamweyimirira.

²⁷ Bw'olemwa okusasula bakutwalaku n'obuliri bwo bw'osulaku.

Edhokuna

²⁸ Otakyusanga ensalosalo ey'eira, kugitoola badhaadha bo ghe baagita.

Edhokutaanu

²⁹ Omuntu akola omulimo gwe obukalamu aba nga takaali mu bantu babuliidho, aba agwanira kuba mu bakyabazinga.