Ensambo 21 - Baibuli Ekibono kya Katonda 2014

Katonda yenka n'alabirira ensi

¹ Omwoyo gwa kyabazinga guba mu buyinza bwa Musengwa Katonda; agukyukiza buli y'ayenda ng'oti n'omweta ogw'amaadhi.

² Ole asobola okwebona nga by'akola bituufu, aye Musengwa Katonda n'abona ebigendererwa eby'omuntu oyo.

³ Okukola ebituufu n'okukolera ku mazima, bisiimya Musengwa Katonda okuwula okumugha emisengo.

⁴ Ababi batwalirizibwa okwebona n'okwekuluntaza, era ekyo kibi.

⁵ Entegeka edh'omuntu omukozi einho dhimufunisa ebintu kamaala, aye ole agwidhubanira ebintu yeereetaku obwavu.

⁶ Eby'obukombe ebifunibwa mu kukupankupania bibita bubite ng'oti mpewo, ole bw'abinoonia aba anoonia kufa.

⁷ Obukambwe obw'ababi buja kubaviiramu kuzikirira, kuba tibenda kukola kituufu.

⁸ Abantu ababi baba bakuyikuyi, aye abalungi bakola ebituufu.

⁹ Omuntu amala gasula ghaigulu ku ndhu, atasuze mu ndhu ndala na mukazi asoolasoola.

¹⁰ Omubi buli kaseera ayenda kukola bibi, era azira y'agemerwa kivunika.

¹¹ Omunhoomi bwe bamubonereza, olwo n'ole azira magezi ayega; aye omugezi bwe bamugalagira yeeyongera bwa kumanha.

¹² Katonda mu butuufu bwe amanha ebikolebwa ab'omu ndhu edh'ababi, era alibasuula ghansi yaabazikiriza.

¹³ Ole aloba okuwulirisa omwavu ng'ali kumulirira, yeena lw'alirira tibalimuwulirisa.

¹⁴ Ekirabo ekigheerwa mu ngiso kiikaikania obusungu; era enguzi egabibwa mu kyama ewooyawooya ali n'ekiruyi.

¹⁵ Abantu abatuufu basangaala ng'amazima gakoleibwa, aye ababi kibaleetera kuzirika buzirike.

¹⁶ Omuntu adaaliima n'awaamu amagezi, alyeyagaana ng'ali mu bafu.

¹⁷ Omuntu agonza einho amasanhu aidha kwavughalanga; n'ole agonza einho omwenge n'amasavu talikombaghala naire.

¹⁸ Abantu ababi n'ababonerezebwa mu kifo eky'abatuufu, era abatatya Katonda n'ababonerezebwa mu kifo eky'abeesimbu.

¹⁹ Omuntu amala gaba eyo yenka mu irungu, atabaire na mukazi asoolasoola era asungughalasungughala.

²⁰ Abagezi baba n'omuzigo n'eby'obukombe ebindi kamaala era n'amasavu, aye abasiru babimalagho bumale byonabyona.

²¹ Omuntu afuba einho okuba omutuufu era ow'ekivunika, aghangaala era yaaba wa kitiibwa.

²² Omuduumizi ow'amagezi aghangula ekibuga eky'ab'amaani, era yaamenhagho ebifo byaibwe eby'okwewogomamu bye beesiga.

²³ Omuntu eyeekuuma n'atayogerayogera eyo atyo, aba yeekuuma bizibu butamutuukaku.

²⁴ Omuntu eyeekuluntaza era eyeebona yenka, ayetebwa munhoomi, omuntu oyo aba mwekudumbaze era nga yeerowoozaaku yenka.

²⁵ Okwegomba okw'omugayaavu n'okumwita, kuba tayenda kukola.

²⁶ Olunaku lwonalwona omubi yeegomba okubaaku ni ky'afuna, aye omutuufu agaba na mwoyo mulala nga tiyeesuniriza.

²⁷ Musengwa Katonda yeenhinhata emisengo egy'ababi, n'okusingira irala bwe baba nga bagireese n'ekigendererwa ekibi.

²⁸ Omuntu agha obudhulizi obw'obuguya aja kuzikirira, aye ole eyeefumintiriza by'awuliire, by'ayogera babiikiriza.

²⁹ Omuntu omubi yeekazakaza mu maiso, aye omwesimbu aba mukakafu mu by'akola.

³⁰ Amagezi, n'okutegeera era n'okugalagirwa, byonabyona tibisobola kutakania Musengwa Katonda ni bimusinga.

³¹ Abantu basobola okutegeka embalaasi okulwana olutalo, aye Musengwa Katonda n'agaba obughanguzi.