Ensambo 20 - Baibuli Ekibono kya Katonda 2014

Ebiva mu kunhwa omwenge

¹ Omuntu anhwa einho omwenge yeereetera okunhoomebwa, yaasoola era yaalwana; era ole yeenayeena atwalirizibwa omwenge aba musiru.

² Kyabazinga bw'asungughala atiisa ng'oti n'empologoma eri kuwologoma; era ole yeenayeena amusonsoonia aba anoonia kufa.

³ Kiba kya kitiisa okwesamba aghali okusoola; aye abasiru buli kiseera baba mu kusoola.

⁴ Omugayaavu bw'aloba okwiruula enimiro ye mu kiseera, alinoonia ky'akungula nga takibona.

⁵ Omuntu by'alowooza biba ng'oti maadhi agaba mu nsulo endeeyi, aye omuntu ali n'okutetenkania aghanga okugasenayo.

⁶ Abantu kamaala beesuuta okuba ab'ekisa, aye omwesigwa naani asobola okumuzuula?

⁷ Abaana abasikira iseibwe omulungi era omwesigwa, baba ba nkabi.

⁸ Kyabazinga bw'atyama okusala emisango, anoonenkereza yaazuula buli kibi.

⁹ Naani aghanga okukoba ati: “Nnaaziiza omwoyo gwange, buti nzira kibi kyonakyona.”

¹⁰ Musengwa Katonda yeenhinhata abo abakozesa ebipimo ebitali bituufu.

¹¹ N'omwana omuto by'akola byoleka ki ky'ali, osobola okumanha oba nga mwesigwa era nga mulungi.

¹² Amatu ge tuwuliza n'amaiso ge tubonesa, goonagoona Musengwa Katonda n'eyagakola.

¹³ Otagonzanga inho ndoolo, kuba ekyo kisobola okukwavughaza; moganga okole inho, oidha kuba n'emere kamaala.

¹⁴ Omuguzi akaayana ng'ayenda okwisa ku mighendo egy'ekintu ky'ali kulamuza; aye bw'amala okugula, aja nga yeesuuta nga bw'adondoire.

¹⁵ Eriyo zaabu era yaabaayo n'amabaale ag'omughendo kamaala; aye omuntu ayogera eby'amagezi wa mughendo inho okuwulagho.

¹⁶ Ole eyeeyimirira omuntu y'ataidhi, ali n'okutoolebwaku ekintu ky'asinzeegho, okukakasa ng'eibandha liidha kusasulwa.

¹⁷ Omuntu by'afuna mu kukupankupania bisooka byawoomerera ng'oti mere, aye oluvainhuma aba ng'oti ali kulya bubaale.

¹⁸ Entegeka edh'omuntu dhituukirira lwa kugalagirwa. Kale sooka weebuuzenga ku magezi ng'okaali kutanula lutalo.

¹⁹ Omuntu ayengeesa olubono ayogera ebyama. Kale weesambanga abantu aboogerayogera eyo batyo.

²⁰ Omuntu akolimira ise oba inhina, obulamu bwe bulikoma ng'oti n'entaala ezikiziibwa mu nzikiiza eri bedimudimu.

²¹ Obukombe omuntu bw'asikira obusikire nga tabukolereire, tibutera kubangamu mukisa ku nkomerero.

²² Oteesasuuzanga muntu akukoze kibi, aye weesigenga bwa Musengwa Katonda aidha kukuyambanga.

²³ Musengwa Katonda yeenhinhata abo abakozesa ebipimo ebitali bituufu, era yaakyagha abakozesa minzaani enkyamu.

²⁴ Musengwa Katonda n'asalagho obulamu obw'omuntu bwe bunaaba. Kale omuntu asobola atya okumanha engira obulamu bwe ye bunaagema?

²⁵ Kuba kwesuula ku mutego, omuntu okusuubiza okugha Katonda ekintu, ate n'amala yeidhusa kye yeeyamye.

²⁶ Kyabazinga omugezi anoonenkereza yaazuula ababi, era yaababonereza n'obukambwe.

²⁷ Ebidhuubo eby'omuntu biri ng'oti ntaala Musengwa Katonda y'agha omuntu okweringa munda mwe.

²⁸ Kyabazinga ow'ekivunika era akolera ku mazima aghangaalira ku bufuzi, era olw'okugonza kwe asigala ng'akaali ku kityamo kye eky'obwakyabazinga.

²⁹ Okwenhumiriza okw'abaisuka kuli mu maani gaibwe, aye omutwe ogw'envu n'oguwoomya abakaire.

³⁰ Emiigo eginuubula gigolola empisa embi, n'okuwaiga omuntu kwamumaliramu irala emize emibi.