Ensambo 19 - Baibuli Ekibono kya Katonda 2014

Obwesigwa kikulu inho

¹ Omuntu amala gaba mwavu aye nga mwesigwa, atabaire muguya era omusiru.

² Ti kirungi muntu kukola kintu nga tasoose kulowooza, era ole agwidhubana n'ebintu talwa kugwa mu nsobi.

³ Omuntu asobola okukola eby'ekisiru yeereetera mwene okuzikirira, aye yaamala yaasungughalira Musengwa Katonda.

⁴ Omukombe yeeyongera okufuna emikwano emiyaaka, aye omwavu ni gy'ali nagyo gimulekulira agho yenka.

⁵ Omuntu agha obudhulizi obw'obuguya aja kubonerezebwa, era oyo ayogera eby'obulimba azira gh'aliwonera.

⁶ Abantu kamaala benda okukwana omuntu ow'ekitiisa, era buli muntu yeegomba abe mukagwa w'omuntu omugabi.

⁷ Omwavu akyayibwa aboluganda be boonaboona, era bwe kituuka ku bakagwa be, bamwesamba bwesambe! Ni bw'abeetereza atya tibaidha.

⁸ Omuntu afuna amagezi yeerabirira; oyo agema by'ayeze, ebintu bimujiira bukalamu.

⁹ Omuntu agha obudhulizi obw'obuguya aja kubonerezebwa, era oyo ayogera eby'obulimba wa kuzikirira.

¹⁰ Omusiru tagwana kuba mu bulamu bwa kwedhalabya, era bwekituuka ku mwiru obwiru, oyo tagwana kufuga bakungu naire.

¹¹ Okutegeera kuleetera omuntu okulwagho okusungughala, era kiba kya kitiisa omuntu okusonigha abasobya.

¹² Kyabazinga bw'asungughala aba ng'oti n'empologoma eri kuwologoma, aye ekivunika kye kiri ng'oti n'omusulo ogughegheeza ebisimbe ni birama.

¹³ Omwana omusiru aleetera omuzaire we okuzikirira, ate omukazi asoolasoola ali ng'oti n'amaadhi agatoonherera obutalekera.

¹⁴ Endhu n'eby'obukombe ebindi bisikirwa okuva ku bazaire, aye omukazi omutegeevu aba kirabo okuva ye Musengwa Katonda.

¹⁵ Omuntu omugayaavu afuluuta bwa ndoolo ekiseera kyonakyona, era omuntu atayenda kukola yeereetera mwene endhala.

¹⁶ Omuntu agondera ebiragiro akuuma obulamu bwe, aye ole abinhooma obunhoome wa kufa.

¹⁷ Agemerwa omwavu ekivunika aba ng'oti awoze Musengwa Katonda, era Musengwa Katonda oyo aja kumusasula olw'ekikolwa kye ekyo.

¹⁸ Kangaivula omwana wo nga ghakaaligho eisuubi ery'okumugolola, otamuleka kuzikirira.

¹⁹ Omuntu ow'obusungu omuleka yaaguma n'ebizibu ebiva mu busungu bwe, kuba bw'omutoola mu kizibu omukuzi ogusooka, oba oli n'okumutoola ni mu kindi omukuzi ogundi.

²⁰ Bw'owulirisa amagezi agakugheebwa era n'oganha okugalagirwa, olwo olifuna amagezi mu biseera eby'omu maiso.

²¹ Omuntu ategeka by'anaakola mu mwoyo gwe, aye Musengwa Katonda ky'asalagho n'ekibaagho.

²² Obwesigwa n'obuleetera omuntu okwendebwa, era omwavu awula omuguya.

²³ Okutya Musengwa Katonda kuleetera omuntu obulamu, yaaba bukalamu ng'ali miraala, ghaabulagho akabi akamutuukaku naire.

²⁴ Omuntu omugayaavu akoza emere mu kibya, aye yaalemwa okugita mu kanwa.

²⁵ Omunhoomi ali n'okubonerezebwa, olwo abazira magezi basobole okwega; era bw'onenia omutegeevu yeeyongeraku okutegeera.

²⁶ Omuntu atuntuza ise era n'abinga inhina ghaka, aba yeebisiisa mu nsambo eswaza era anhoomebwa.

²⁷ Mwana wange, bw'olekera okuwulirisa bye nkugalagira, oidha kwerabira ni bye wali oidhi.

²⁸ Omuntu agha obudhulizi obw'obuguya anhooma ensala entuufu ey'omusango, era omuntu omubi awoomerwa okukola ebibi ng'oti bwa mere.

²⁹ Abanhoomi tibaliwona kusalirwa musango kubasinga, n'abasiru tibaliwona kukubwa.