Ensambo 16 - Baibuli Ekibono kya Katonda 2014

¹ Omuntu ategeka by'anaakola mu mwoyo gwe, aye Musengwa Katonda n'asalagho eky'okukola.

² Ole asobola okwebona nga by'akola bituufu, aye Musengwa Katonda yeekebeedha ebigendererwa eby'omuntu oyo.

³ By'okolanga byonabyona bigemye Musengwa Katonda, olwo entegeka dho dhiidha kutuukiriranga.

⁴ Buli kintu Musengwa Katonda yakikola n'ekigendererwa kyakyo, n'omubi yamukolera olunaku olw'okubonerezebwaku.

⁵ Musengwa Katonda yeenhinhata kiisi eyeekuluntaza, era ekikakafu kiri nti taliroba kumubonereza.

⁶ Musengwa Katonda atoola ebibi ku muntu omuwulize era omwesigwa, era yaawonia omuntu amutya, okukola ebibi.

⁷ Omuntu bw'akola ebisanhusa Musengwa Katonda, Musengwa Katonda oyo afuula n'ababaire abazigu b'omuntu oyo baaba bakagwa be.

⁸ Omuntu akatono k'afuna ng'akola amazima, kawula obukombe obungi bw'afuna mu bukupankupania.

⁹ Omuntu asobola okutegeka by'anaakola, aye Musengwa Katonda n'abituukiriza.

¹⁰ Katonda n'agalagira kyabazinga by'ayogera, olwo mu nsala ye mwaloba kuba kisobu.

¹¹ Ebipimo ebituufu Musengwa Katonda by'ayenda bikozesebwe mu kupima; amabaale goonagoona agakozesebwa n'eyagakola.

¹² Okukola ebibi tikusiimya bakyabazinga naire, kuba obwakyabazinga bujiira ku butuufu.

¹³ Kyabazinga asanhukira aboogera ebituufu, era yaagonza kiisi ayogera mazima.

¹⁴ Kyabazinga bw'asungughala asobola n'okwita, kale omugezi ky'akola n'okumuwooyawooya.

¹⁵ Kyabazinga bw'aba omusangaavu abantu be balama, era ekivunika kye kiba ng'oti bire ebivaamu amaadhi ag'omutoigo.

¹⁶ Okuba n'amagezi kuwula okuba ni zaabu, era ole okulondagho okuba omutegeevu kiwula okulondagho feeza.

¹⁷ Abantu abeesimbu beekuuma obutagwa mu kibi; abo abeegendereza bakuuma obulamu bwaibwe.

¹⁸ Okwekuluntaza kuleeta okuzikirira, n'okwegulumiza kwavaamu okugwa.

¹⁹ Okwewombeeka n'oba aghalala n'abaavu, kuwula okugabana ku munhago ogw'abeekuluntaza.

²⁰ Omuntu omwegendereza mu buli kintu, ebintu biidha kumujiiranga bukalamu, era wa nkabi oyo eyeesiga Musengwa Katonda.

²¹ Omuntu omugezi bamweta mutegeevu, era olw'ebibono bye ebikalamu aikirizisa abantu.

²² Amagezi eri abagezi gali ng'oti nsulo ereeta obulamu, ate obusiru bwaba kibonerezo eri abasiru.

²³ Omugezi ayogera bya makulu, era by'ayogera byongera okwikirizisa abantu.

²⁴ Ebibono ebirungi bidhuudhuula ng'oti mudheenene, biizaamu amaani by'aleeta n'obulamu mu mubiri.

²⁵ Omuntu asobola okugema engira ng'adhuuba ati ntuufu, aye yaamutuusa ku kufa.

²⁶ Okwenda okulya kuleetera omuntu okukola, era enda ye n'emukubiriza okukola.

²⁷ Omuntu omubi era azira mugaso asala amagezi okukola ebibi, ni by'ayogera biba ng'oti muliro oguleeta okuzikirira.

²⁸ Omuntu omudankaanu aleeta okukoodhana mu bantu, era ow'olubono akyaghagania ab'omukago.

²⁹ Omuntu akola eby'obukambwe asendasenda n'abandi, yaabakoza ebintu ebitali bikalamu.

³⁰ Ole akunhiira eriiso aba ategeka kukola bikyamu, ate ole akusonkezaaku omunwa aba ategeka kukukola kabi.

³¹ Envu edh'obukaire dhiri ng'oti n'engule ey'ekitiisa, dhifunibwa abo abeebisiisa mu bulamu obutuufu.

³² Omuntu alwagho okusungughala aba muzira okuwula omulwani ow'amaani, n'ole eyeefuga mu mwoyo gwe awula ole aghangula ekibuga ekiramba.

³³ Abantu baghanga okukuba akalulu babone ekinaavaamu, aye Musengwa Katonda mwene n'asalagho eky'enkomerero.