Ensambo 15 - Baibuli Ekibono kya Katonda 2014

Ghazira Musengwa Katonda ky'atabona

¹ Omuntu airamu nga yeewooya amalagho obusungu, aye ole ayogera n'eikabyo abusiikuula busiikuule.

² Omugezi ayogera ebigwaniire, aye omusiru alokompoka busiru bwereere.

³ Eriiso lya Musengwa Katonda ghazira ghe litabona, alingirira abalungi n'ababi.

⁴ Ebibono eby'ekisa bireeta obulamu, aye eby'obuguya bikutula omwoyo.

⁵ Omusiru anhooma abazaire be bye bamugalagira, aye ole aganha okunenezebwa aba mutegeevu.

⁶ Mu ndhu edh'abatuufu mubaamu eby'obukombe kamaala, aye ababi bye bafuna tibabifunamu kalungi naire.

⁷ Abagezi bye boogera bibunisa okumanha mu bantu, aye abasiru tibakola batyo.

⁸ Musengwa Katonda yeenhinhata emisengo egy'ababi, aye yaasanhukira okusaba okw'abeesimbu.

⁹ Musengwa Katonda yeenhinhata eneebisa ey'ababi, aye agonza abo abajiira ku butuufu.

¹⁰ Ole ava ku ngira entuufu alikangaivulwa inho; ole akyagha okunenezebwa wa kufa.

¹¹ Oba nga ebiri e magombe eri okuzikirira Musengwa Katonda abibona bukalamu, memale obwo ebiri mu myoyo gy'abantu by'ataamanhe?

¹² Omuntu omunhoomi tayenda kunenezebwa, era taghanga kuja kwebuuzaaku ku bamusinga magezi.

¹³ Ali n'eisanhu ku mwoyo omubonera ku kumwenha, aye ali n'enaku ku mwoyo aba munhiinkaavu.

¹⁴ Omuntu omutegeevu anoonenkereza okufuna amagezi, aye omusiru awulira nga obusiru bumumala.

¹⁵ Obulamu obw'omuntu omughafu bwonabwona buba bubi, aye omuntu omusangaavu aba ng'oti ali mu mbaga ekiseera kyonakyona.

¹⁶ Omuntu amala gaba mwavu aye ng'atya Musengwa Katonda, atabaire mukombe aye ng'ali mu bizibu.

¹⁷ Abantu bamala galiira katunkuma nga bagonzania, bataliiriire mmamba nsavu nga baakyaghagana.

¹⁸ Omuntu asungughala amangu asiikuula okusoola, aye ole alwagho okusungughala amalagho obutaisania.

¹⁹ Obulamu obw'omugayaavu bwidhula bizibu, aye obw'omwesimbu buba bukalamu era nga bweyagaza.

²⁰ Omwana omugezi yeesiimisa ise, aye omuntu omusiru anhooma inhina.

²¹ Omuntu aziramu kutegeera asangaalira obusiru, aye omutegeevu akola ebyo ebituufu.

²² Aghazira bawi ba magezi entegeka dhidobana, aye aghali abaghabuzi kamaala dhituukirira.

²³ Okwiramu ekituufu kusanhusa omuntu, era ekibono ekyogerwa mu kiseera ekigwaine kiba kirungi inho.

²⁴ Omuntu omugezi agema engira emutwala ghaigulu eri obulamu, awone okuja ghansi mu magombe.

²⁵ Musengwa Katonda azikiriza endhu edh'abantu abeekuluntaza, aye yaakuuma ebintu bya banamwandu.

²⁶ Musengwa Katonda yeenhinhata ebidhuubo ebibi, aye asangaalira ebibono ebirungi.

²⁷ Omuntu alulunkanira okufuna amagoba mu kukupankupania aleetera ab'omu maka ge ebizibu, aye ole akyagha enguzi aghangaala.

²⁸ Omuntu omutuufu asooka kulowooza memale yairamu, aye omubi alokompoka bibi byereere.

²⁹ Musengwa Katonda aba ng'oti ali ghala inho okuwulira ababi nga bamusaba, aye awulirisa mangu okusaba okw'abatuufu.

³⁰ Omuntu amoga n'eisanhu asanhusa, era amawulire amalungi gaizaamu amaani.

³¹ Ole aganha okunenezebwa okulungi afuuka mugezi.

³² Ole aloba okugalagirwa yeefiiriza mwene, aye ole aganha okunenezebwa afuuka mutegeevu.

³³ Okutya Musengwa Katonda kwegeresa omuntu amagezi, era okwewombeeka n'okusooka, memale omuntu baamutaamu ekinhagansi.