Ensambo 14 - Baibuli Ekibono kya Katonda 2014

Amagezi ag'abagezi

¹ Amagezi ag'omukazi n'agazimba amaka ge, aye obusiru bwe bugasaaniagho.

² Omuntu omwesimbu atya Musengwa Katonda, aye ateesigika amunhooma.

³ Omusiru by'ayogera n'ebimukubya olw'okwekuluntaza, aye omugezi by'ayogera n'ebimukuuma.

⁴ Aghazira nte dhirima, mu byagi timuba mere, aye bw'oba n'ente edhirima edh'amaani ebyagi biidhula emere.

⁵ Omudhulizi omwesigwa talimba, aye atali mwesigwa ayogera bya buguya byereere.

⁶ Omunhoomi ni bw'ayagala amagezi tagafuna, aye omutegeevu ageega mangu.

⁷ Tobanga mu basiru, kuba ozirayo kya magezi ky'obafunamu.

⁸ Amagezi ag'omutegeevu gamuleetera okumanha eky'okukola, aye obusiru obw'abasiru bubaleetera kwerimba.

⁹ Abasiru tibafaayo nga bakoze ebibi, aye abeesimbu Katonda abasanhukira.

¹⁰ Omuntu amanha nnaku eri ku mwoyo gwe, era ghazira ategeera isanhu liri ku mwoyo gwa mwine.

¹¹ Endhu ey'omubi eja kuzikirira, aye entindi ey'omwesimbu esigale ng'ekaaligho.

¹² Omuntu asobola okugema engira ng'adhuuba ati ntuufu, aye yaamutuusa ku kufa.

¹³ Omuntu asobola okuseka aye ng'ali n'obughafu ku mwoyo, era aghava eisanhu ghairagho nnaku.

¹⁴ Omuntu omubi alifuna ebigwaniire ebikolwa bye ebibi, n'omulungi yaafuna ebigwaniire ebikolwa bye ebirungi.

¹⁵ Omuntu omusiru aikiriza buli kintu, aye omutegeevu amala kwetegereza memale.

¹⁶ Omugezi asooka kwekengeera era yeesamba ebizibu, aye omusiru aghalambuka bughalambuke nga tafaayo.

¹⁷ Omuntu asungughala amangu akola eby'ekisiru, aye omwegendereza aba muguminkiriza.

¹⁸ Abasiru bafuna busiru, aye abagezi bagheebwa amagezi ng'empeera yaibwe.

¹⁹ Ababi balikubira abatuufu amakiryaivu, era aboonooni abo baliba ku miryango egy'abatya Katonda nga babeegayirira.

²⁰ Omwavu akyayibwa ni bakagwa be beene, aye omukombe aba n'emikwano kamaala.

²¹ Ole anhooma muntu mwine aba akoze kibi, aye wa nkabi oyo agemerwa omwavu ekivunika.

²² Abo abategeka okukola ebibi baba badaaliimye mu ndowooza yaibwe, aye abategeka okukola obukalamu beesigibwa era baateebwamu ekinhagansi.

²³ Mu kukola muvaamu amagoba, aye okwogera obwogere kuleeta bwavu.

²⁴ Amagezi galeetera abagezi okuba abakombe, aye abasiru basirughala busirughale.

²⁵ Omudhulizi ayogera amazima awonia obulamu obw'abantu, aye ole ayogera eby'obuguya abalyamu bwa lukwe.

²⁶ Okutya Musengwa Katonda kuleetera omuntu okuba omugumu, era n'ab'omu maka ge kubakuuma.

²⁷ Okutya Musengwa Katonda kuli ng'oti nsulo ereeta obulamu, kuwonia omuntu okufa.

²⁸ Abantu kyabazinga b'afuga ye bakoma okuba abangi, n'ekitiisa kye ye kikoma okuba ekikologho, aye b'afuga bwe batabaagho, n'ekitiisa kye tikibaagho.

²⁹ Omuntu alwagho okusungughala aba mutegeevu mu by'akola, aye ole asungughala amangu akola eby'ekisiru.

³⁰ Omuntu bw'aba n'emiraala ku mwoyo, n'omubiri guba mulamu, aye ensaalwa egulya ng'oti bulwaire bwa kokolo.

³¹ Omuntu atuntuza omwavu aba ali kuvuma Katonda eyamutonda, aye ole agemerwa omuntu ali mu bwetaavu ekivunika aba atya Katonda.

³² Ababi beereetera beene okugwa olw'ebikolwa byaibwe ebibi, aye abatuufu, obwesigwa bwaibwe n'obubakuuma.

³³ Omuntu omutegeevu aba n'amagezi, aye omusiru tagawulirangaku naire.

³⁴ Obutuufu buleetera eighanga okugheebwa ekitiisa, aye okwonoona kwalivumagania.

³⁵ Omugheereza akola emirimo obukalamu kyabazinga amusanhukira, aye ole akola ebiswaza amusungughalira.