Ensambo 12 - Baibuli Ekibono kya Katonda 2014

¹ Oyo asangaalira okugalagirwa aba ayenda okumanha, aye akyagha okunenezebwa aba ng'oti nsolo busolo.

² Omuntu omulungi asiimibwa Musengwa Katonda, aye ole ali n'entegeka edh'okukola ebibi amusalira omusango gwamusinga.

³ Okukola ebibi tikuganha muntu kuba na miraala, aye omutuufu aba mugumu buli gh'aba.

⁴ Omukazi akola ebirungi ateesa mu iba ekinhagansi, aye ole aswaza aba ng'oti bulwaire bwa kokolo mu magumba ga iba.

⁵ Ebidhuubo eby'omutuufu biba ku kukola mazima, aye eby'omubi byaba ku kuguya.

⁶ Ebibono eby'omubi biri ng'oti mutemo eyeeteeze okwita omuntu, aye omwesimbu by'ayogera biwonia abantu.

⁷ Katonda azikiriza ababi baaloba kulekaghooku waire omwidhukulu, aye enda edh'abatuufu tidhiweekereragho.

⁸ Omuntu ali n'amagezi abantu bamwogeraku bukalamu, aye ole ali n'ebirowoozo ebyakyama bamunhooma.

⁹ Omuntu owabuliidho eyeekolera, awula ole eyeekuluntaza ate ng'azira kya kulya.

¹⁰ Omuntu akola ebituufu afaayo ku nsolo dhe, aye omukozi w'ebibi tasaasira dhidhe naire.

¹¹ Omuntu alima eitaka lye aba n'emere kamaala, aye ole amala ebiseera ku mirimo egitaleeta magoba aba aziramu kategeera.

¹² Abantu ababi balowooza kukola bibi ekiseera kyonakyona, aye abatuufu basigala nga bagumu woonawoona ghe baba.

¹³ Ebibono eby'omubi byene bifuuka mutego ogumugemya, aye omutuufu abita mu bizibu byaloba kumugemaku.

¹⁴ Omuntu mu by'ayogera mw'afuna ebirungi, era mu by'akola mw'afuna empeera.

¹⁵ Omusiru buli ky'akola alowooza nga n'ekituufu, aye omugezi awulirisa bye bamugalagira.

¹⁶ Omusiru bw'asungughala kimanhikiragho, aye omugezi amanha okughemba ku busungu.

¹⁷ Omuntu agha obudhulizi obw'amazima aleetagho ensala entuufu, aye ole agha obudhulizi obw'obuguya aleetagho okusaliriza.

¹⁸ Omuntu ayogera nga tasoose kulowooza, ebibono bye bifumita ng'oti mpiima, aye ebibono ebyogerwa n'amagezi biwonia.

¹⁹ Ebibono eby'amazima tibikyuka ebyanda n'ebyanda, aye ebibono eby'obuguya bibaaghooku kaseera buseera.

²⁰ Abo abayiiya okukola ebibi beerimba beene, aye abo abategeka okukola ebirungi bafunamu eisanhu.

²¹ Akabi tikagwira mutuufu, aye ababi baba mu bizibu buli kiseera.

²² Musengwa Katonda akyagha aboogera eby'obuguya, aye asangaalira abo abeesigwa mu bye bakola.

²³ Omuntu omutegeevu taja nga yeerangirira kiisi ky'aidhi, aye abasiru booleka bukalamu nga ghazira kye baidhi.

²⁴ Emikono emikozi einho gireetera mwene gyo okuba omufuzi, ate emikono eminafu gyaleetera mwene gyo okuba omwiru.

²⁵ Okweraliikirira tikuganha muntu kusangaala, aye ebibono ebigumya bireetera omuntu eisanhu.

²⁶ Omuntu akola ebituufu n'akulemberamu baine, aye omukozi w'ebibi abaleetera okudaaliima.

²⁷ Omuntu omugayaavu tasobola kugemya ky'ali kuyiiga, aye omukozi einho afuna obukombe kamaala.

²⁸ Mu kukola ebituufu n'omuli obulamu, aye mu kukola ebibi mulimu kufa.