Ensambo 11 - Baibuli Ekibono kya Katonda 2014

¹ Musengwa Katonda akyagha abakozesa minzaani enkyamu, aye abakozesa ebipimo ebituufu abasiima.

² Bwe weekuluntaza toloba kuswala, aye abawombeefu n'ababa n'amagezi.

³ Abantu abeesimbu bamanha ekituufu eky'okukola, aye abaguya bazikirizibwa obukupankupania bwaibwe bwene.

⁴ Ku lunaku Katonda lw'alamuliraku abantu, okuba omukombe kizira kye kiyamba, aye obutuufu buwonia omuntu okufa.

⁵ Obwesigwa obw'omuntu omwesimbu butereeza obulamu bwe, aye obubi obw'omuntu omubi n'obumugwisa bwene.

⁶ Obutuufu obw'abantu abeesimbu bubakuuma, aye abo abakupankupania, entegeka dhaibwe dheene n'edhibagemya ng'oti mutego.

⁷ Omubi bw'afa by'abaire asuubira byonabyona agho ghe bikoma, era ole atatya Katonda bye yeesumba tabifuna naire.

⁸ Katonda akuuma omutuufu yaaloba kugwa mu bizibu, aye omubi yaabigwamu.

⁹ Omuntu atatya Katonda by'ayogera bighanga okuzikiriza muntu mwine, aye omutuufu amagezi gamuwonia okugwa mu bizibu.

¹⁰ Abantu ab'ekibuga basagamba ng'ebintu biri kujiira abatuufu bukalamu, era bakuba emizira ng'ababi bazikiriire.

¹¹ Abantu abeesimbu baleetera ekibuga enkabi kyakula, aye ababi ebibono bye boogera bikireetera okuzikirira.

¹² Ole anhooma baine aba aziramu kategeera, aye ali n'okutegeera asirika busirike.

¹³ Omuntu ayengeesa olubono, ayogera ebyama, aye omwesigwa aghanga okugisa ebyama.

¹⁴ Abantu bazikirira nga bazira abalamba, aye aghali abawi ab'amagezi abangi ghabaagho emiraala.

¹⁵ Ole eyeeyimirira omuntu okumusasuliragho eibandha yeidhusa, aye ole aloba okumweyimirira awulira emiraala.

¹⁶ Omukazi ow'ekisa ateebwamu ekinhagansi, aye omukazi atali mwesimbu aswaza.

¹⁷ Omuntu ow'ekisa akifunamu omuganhulo, aye akola eby'obukambwe yeerumya mwene.

¹⁸ Omukozi w'ebibi yeerimba ati katyo anaabifunamu empeera emugasa, aye ate omuntu omutuufu n'afuna empeera yeene egasa.

¹⁹ Ole eyeekalangulira ku butuufu aghangaala, aye ole ajiira ku kukola ebibi yeita mwene.

²⁰ Musengwa Katonda yeenhinhata abantu ab'ebirowoozo ebibi, aye yaagonza abo abaziraku musango.

²¹ Ekikakafu kiri nti abakozi b'ebibi baja kubonerezebwa, aye abatuufu akabi tikaja kubatuukaku naire.

²² Omukazi aboneka obulungi aye ng'azira mpisa, ali ng'oti mpeta ya zaabu eri mu nhindo ey'embiidhi.

²³ Abantu abatuufu bye benda bibaviiramu birungi byereere, aye abakozi b'ebibi bye basuubira bibaviiramu Katonda kubasungughalira.

²⁴ Ghaligho omuntu aba omugabi einho aye yeeyongera bweyongere kugaigaghala, ate owundi yaaba mukodo ekibitiriire aye yeeyongera bweyongere kwavughala.

²⁵ Omuntu omugabi aidha kugheebwanga obukombe, era ole agha abandi amaadhi ag'okunhwa, yeena aidha kugheebwanga amaadhi anhwe.

²⁶ Omuntu aloba okuguza baine emere, abantu bamukolimira, aye ole aganha okugibaguza bamusabira enkabi.

²⁷ Ole eyeefubiriza okukola obukalamu n'omwoyo omulala, aidha kusiimibwanga, aye ebibi biidha kwidhiranga ole abisiikuula ghe biri.

²⁸ Ole eyeesiga obukombe bwe aja kukala ng'oti ikaba lya muti oguwaawiiza, aye omutuufu aja kugimuka ng'oti ikaba lya muti ogusibwisa.

²⁹ Ole adaazadaaza ab'endhu ye azira mugabo gw'alisikira. N'omusiru aidha kubanga mugheereza wa mugezi.

³⁰ Omuntu omutuufu by'akola bireeta obulamu, aye omuntu akola eby'obukambwe azikiriza obulamu.

³¹ Bona eno, oba nga abantu abatuufu mu nsi bagheebwa empeera ebagwaniire, memale ababi n'aboonooni baliroba batya okusasulwamu ekibajaamu?