Ensambo 10 - Baibuli Ekibono kya Katonda 2014

Ensambo dha Solomoni

¹ Dhino n'ensambo dha Solomoni. Omwana omugezi yeesiimisa ise, aye omusiru aleetera inhina enaku.

² Eby'obukombe ebifunibwa mu kukola ebibi biziramu muganhulo, aye obutuufu buwonia omuntu okufa.

³ Musengwa Katonda taleka batuufu ni balambuka ndhala, aye alobera abakozi b'ebibi okufuna bye balulunkanira.

⁴ Emikono eminafu giisa mwene gyo obwavu, aye emikono emikozi einho gireetera mwene gyo obukombe.

⁵ Omuntu akungula emere mu biseera eby'omwero aba mugezi, aye ole atenduka obutenduke mu biseera eby'amakungula aswaza.

⁶ Abantu abatuufu bafuna enkabi, aye ababi boogera nga bagisa obukambwe obubaidhwire.

⁷ Omuntu omutuufu aidhukirwa nga wa nkabi, aye eriina ery'omubi lyerabirirwa irala.

⁸ Abantu abali n'okutegeera bawulira bye babalagira, aye abaziramu kategeera bazikirira.

⁹ Abantu abeesimbu era abeesigwa baba n'emiraala, aye abaguya baja kuzuulibwa.

¹⁰ Ole agisa amazima ku muntu amuleetera obuzibu, aye ole anenia omuntu maiso ku maiso amuleetera emiraala.

¹¹ Abantu abatuufu bye boogera biba ng'oti nsulo ereeta obulamu, aye ababi boogera nga bagisa obukambwe obubaidhwire.

¹² Okukyagha kusiikuula entalo, aye okugonza kusonigha ebisobyo byonabyona.

¹³ Ebibono eby'omuntu ali n'okutegeera bibaamu amagezi, aye omuntu aziramu kategeera agwana kukubwa lwigo.

¹⁴ Abantu abagezi bakozesa amagezi ge bafuna n'obwegendereza, aye abaziramu kategeera boogerayogera eyo batyo, beereetera okuzikirira.

¹⁵ Omuntu omukombe, eby'obukombe by'aba nabyo n'ebimukuuma, aye omwavu, obwavu bwe n'obumuzikiriza.

¹⁶ Omuntu omutuufu by'akola bimuleetera okuba omulamu, aye omukozi ow'ebibi yeeyongera bwa kukola bibi.

¹⁷ Ole awulira bye bamugalagira akuuma obulamu bwe, aye aloba okunenezebwa adaaliima.

¹⁸ Ole agisa obukyayi obumuli ku mwoyo aba muguya, ate ole asalagania ebibono ku bandi aba musiru.

¹⁹ Mu kwogera ebibono ebingi timubulamu kwonoona, kale omuntu afuga omunwa gwe aba mugezi.

²⁰ Omuntu omutuufu by'ayogera biri ng'oti ni feeza asinga bulungi, aye ebidhuubo eby'omubi ghazira kye bigasa.

²¹ Ebibono eby'omutuufu bigasa abantu kamaala, aye abasiru bafa mangu olw'okubulamu akategeera.

²² Enkabi dha Musengwa Katonda n'edhireeta obukombe, okukola einho ghazira kye kwongera ku bukombe bwo.

²³ Okukola ebibi kuli ng'oti muzaanho buzaanho eri omusiru, aye okukola eby'amagezi n'ekisanhusa omuntu ali n'okutegeera.

²⁴ Omubi ekintu ky'atya kija kumutuukaku, aye omutuufu ky'ayenda baja kukimugha.

²⁵ Kiwunga bw'akunta ababi basaanagho, aye abatuufu basigalagho nga bagumu begulugulu.

²⁶ Bw'otuma omugayaavu akulumya ng'oti n'omwenge endoota bwe gusala mu maino ag'ole agubutiike mu kanwa, era ng'oti n'omwosi bwe gubuuguuka mu maiso.

²⁷ Okutya Musengwa Katonda kuleetera omuntu okughangaala, aye emyaka egy'ababi gisalibwaku.

²⁸ Abatuufu bye basuubira bituukirira baasangaala, aye ababi bye beesumba tibabifuna naire.

²⁹ Musengwa Katonda n'ekifo eky'okwewogomamu eri oyo omwesimbu, aye omubi amuzikiriza buzikirize.

³⁰ Abatuufu ghazira kiribasengula mu nsi naire, aye ababi tibalityama ni batereera mu nsi.

³¹ Omuntu omutuufu ayogera bya magezi, aye omuguya baja kumulekeza okwogera.

³² Abantu abatuufu bamanha ebigwaine okwogerwa, aye ababi boogera bya buguya.