Ensambo 1 - Baibuli Ekibono kya Katonda 2014

Omuganhulo oguli mu nsambo

¹ Dhino n'Ensambo dha Solomoni, mutabane wa Daudi era kyabazinga wa Isiraeli.

² Ensambo dhino dhiyamba omuntu okufunamu amagezi, n'okugalagirwa, n'okutegeera amakulu ag'omunda einho.

³ Dheegeresa omuntu okwebisa obukalamu, okukola ebisiimya Katonda, okusala mu butuufu, n'obutasaliriza.

⁴ Dhireetera omuntu azira ky'aidhi okufuna amagezi, n'omwisuka okumanha ekigwaine okukolebwa.

⁵ Omugezi bw'adhiwulira yeeyongera okwega era omutegeevu yaafuna okulambibwa.

⁶ Olwo omuntu yaategeera amakulu ag'omunda einho agali mu nsambo, n'amagezi agali mu bikoiko.

Amagezi agagheebwa abakaali abato

⁷ Omuntu okuba n'obumanhi, asooka na kutya Musengwa Katonda. Abasiru banhooma amagezi era tibenda kugalagirwa.

⁸ Mwana wange, owulirisanga inho lata wo by'akugalagira, era otavanga ku inhoko by'akwegeresa;

⁹ kuba biwoomya empisa dho, ng'oti n'ekitambaala ekidholige eky'oku mutwe n'ebinhere eby'omu nkoto, bwe biwoomya abivaire.

¹⁰ Mwana wange, abakozi ab'ebibi bwe bakusendasendanga toganhanga.

¹¹ Kuba basobola okukoba bati: “Idha tweteege omuntu tumwite, tulumbe omuntu aziraku musango tumugwikirize.”

¹² Leka tubamire nga balamu ng'amagombe bwe gakola, basaanegho ng'abo abaika eyo ghansi mu lwina.

¹³ Twidha kubanhagaku eby'obukombe ebya buli nsambo, twidhuze endhu dhaife omunhago.

¹⁴ Kola otweyimbeku tukubire ghalala obululu, twidha kugabanira ghalala bye tunaanhaga.

¹⁵ Mwana wange, otajiiranga ku bantu bali ng'oti n'abo, obeesambiranga irala;

¹⁶ kuba banguyiriza inho okukola ebibi, era okwita kubanguyira inho.

¹⁷ Kizira makulu okutega enhonhi omutego, ng'eri agho ebona.

¹⁸ Aye abantu abo beetegamu beene omutego beite, baabwama okuzikiriza obulamu obwaibwe bwene.

¹⁹ Ebyo n'ebituuka ku abo boonaboona abafuna obukombe mu kunhaga; mu bukombe bwene obwo n'omuva ekibaita.

Amagezi galabula abantu

²⁰ Amagezi gabita mu nguudo edh'ekibuga nga galeekaana; era gaalangirira mu mpya edh'ekibuga.

²¹ Gaja aghali ekifo eky'olwekobaano; ekifo abantu ghe beesololeza, gaakoba gati:

²² “Imwe abazira kye mwidhi, mulirekera li okugonza okubanga obwagho nga muzira kye mwidhi? Imwe abanhoomi, mulirekera li okusangaalira obunhoomi bwaimwe obwo? Era imwe abasiru mulirekera li okukyagha okumanha?

²³ Mufeeyo inho ku bye ndi kubanenia; nja kubakobera byonabyona ebindi ku mwoyo, era mbaghe ku magezi ge ndi nago.

²⁴ Nabeeta mwaloba kuvugira, naabagololera omukono mwaloba kwidhayo.

²⁵ Amagezi ge mbagha timugatwala ng'ekikulu, era timwenda ni mbanenia.

²⁶ Mbeeni, lwemuliba mu buzibu obutaloodheka, zeena nja kubasekerera busekerere; ebitiisa bwe biribaidhira nja kubayeeyereza buyeeyereze.

²⁷ Ebitiisa lwe biribaidhira ni bibeeyughaku ng'oti kiwunga, obuzibu obutaloodheka ni bubeezungulula ng'oti n'empewo eyeezungulula n'amaani, ni bibaleetera okulumwa n'okweinhamira,

²⁸ olwo mulindheta aye naabasiriikirira, mulindhagala mu buli kankondo aye nga timulimbona.

²⁹ Mwakyagha okugheebwa amagezi, era mwaloba kutya Musengwa Katonda.

³⁰ Timwenda kujiira ku magezi gange, era munhooma okubanenia kwange.

³¹ Mbeeni mwidha kwesasuuzibwanga olw'ebyo bye mukola, era mubonerezebwenga ebyo beene bye muyiiya okukola.

³² Abazira kye baidhi bafa lwa butenda kugalagirwa, abasiru baazikirira lwa butafaayo.

³³ Aye oyo awulira bye nkoba aidha kubanga mu miraala, era atyamenga atereere ng'aziramu kutya naire.”