Ebikolwa by'Abatume 8 - Baibuli Ekibono kya Katonda 2014

¹ Saulo yaaganha Sitefano aitibwe. Mu kiseera ekyo Ekikunsu ky'Abaikiriza mu Kurisito, mu Yerusalemu, kyakirigibwa inho. Boonaboona, okutoolaku Abatume, baasansaanira mu biketezo eby'e Buyudaaya ni Samaria.

Saulo akiriga Ekikunsu ky'Abaikiriza mu Kurisito

² Abantu abaisaamu Katonda ekitiisa baaziika Sitefano era baamulira inho.

³ Aye Saulo yaazikiriza Ekikunsu ky'Abaikiriza mu Kurisito nga angira kiisi nhumba yaagemamu abasaadha n'abakazi yaabata mu ikomera.

Amawulire Amalungi geegeresebwa mu Samaria

⁴ Agho ni abo abaasansaana baaja nga bakobera abantu ekibono kya Katonda.

⁵ Filipo yaikirira mu kibuga ky'e Samaria, yaakobera abantu Kurisito.

⁶ Abantu kamaala baisaayo inho Omwoyo ku ebyo Filipo bye yabeegeresa, bwe baamuwulirisa era baabona ebyewuunhio bye yali ali kukola.

⁷ Kuba emizimu emibi gyava ku bantu kamaala nga gyasiikanira ghaigulu, era abagongobavu n'abalema kamaala baawonezebwa.

⁸ Ghaabaagho okusagamba kunene mu kibuga ekyo.

⁹ Aye mu kibuga omwo mwalimu omusaadha eyayetebwanga Simoni, nga mulaguzi. Yeeyetanga muntu wa kitalo era yaayasaamirizanga Abasamaria.

¹⁰ Abantu boonaboona okuva ku muto okutuuka ku mukulu baamuwuliranga baakoba bati: “Ono n'amaani ga Katonda ow'ekitiisa.”

¹¹ Baamuwuliranga, kuba yamala entangama ng'abaasaamiriza n'obulogo bwe.

¹² Aye Filipo bwe yakobera abantu Amawulire Amalungi agagema ku Bwakyabazinga bwa Katonda ni ku liina lya Yesu Kurisito, baikiriza, era abasaadha n'abakazi, baabatizibwa.

¹³ Ni Simoni mwene yeena yaikiriza era bwe yamala okubatizibwa, yaaba ghalala ni Filipo. Bwe yabona obumanhiso n'ebyewuninkiriza Filipo bye yakola, yeewuunhia inho.

¹⁴ Agho Abatume abaali mu Yerusalemu bwe baawulira ng'ab'e Samaria baikiriza ekibono kya Katonda, baabatumira Petero ni Yoanne.

¹⁵ Bwe baatuukayo, baabasabira bafune Mwoyo Mutukuvu

¹⁶ kuba Mwoyo Mutukuvu yali akaali kwika ku waire mulala ku bo. Baali nga bamaze kubatizibwa kwonka mu liina lya Musengwa Yesu.

¹⁷ Agho Petero ni Yoanne baabaisaaku emikono, baafuna Mwoyo Mutukuvu.

¹⁸ Aye Simoni bwe yabona nga Abatume bwe baisa emikono gyaibwe ku bantu, abantu ni bafuna Mwoyo Mutukuvu, yaaleetera Petero ni Yoanne empiiya.

¹⁹ Yaakoba ati: “Zeena mumpe obukumu obwo kiisi ye naisangaku emikono gyange afunenga Mwoyo Mutukuvu.”

²⁰ Aye Petero yaamwiramu ati: “Zikirira n'empiiya dho, kuba odhuuba okufuna ekirabo kya Katonda ng'okigula n'empiiya dho!

²¹ Tosobola kwetaba waire okugabana ku kino, kuba omwoyo gwo tiimutuufu mu maiso ga Katonda.

²² Kale ni weenenie ekirowoozo kyo ekyo ekibi, weeghembe Katonda tomanha bw'akusonigha ekidhuubo ekyo ekiri mu mwoyo gwo.

²³ Kuba mbona nga oidhwire enge era oli musibe wa kibi.”

²⁴ Simoni yaakoba Petero ati: “Munsabire ye Musengwa, ebibono ebyo bye mwogeire ghalobe kubaagho kintuukaku.”

²⁵ Bwe baamala okukakasa n'okukobera abantu ekibono kya Musengwa, bairayo e Yerusalemu, nga baja bakobera abantu ab'omu byalo kamaala eby'e Samaria Amawulire Amalungi.

Filipo n'omufuzi Omwethiopia

²⁶ Agho, malaika wa Musengwa yaakoba Filipo ati: “Situka oje n'engira ku luuyi olw'omukono omusaadha olw'e buvandhuba, ogeme engira ebita mu irungu eva e Yerusalemu okuja e Gaza.”

²⁷ Filipo yaasituka yaaja. Mperaano ni mu kiseera kyene ekyo ghaabaagho omufuzi Omwethiopia omulaawe eyali ng'ali kwirayo mu Ethiopia, ng'ava okusinza Katonda mu Yerusalemu. Omusaadha ono yali mufuzi mukulu, era nga mukuumi wa ndyanga wa kyabazinga omukazi Kandake ow'e Ethiopia.

²⁸ Yali ali kwirayo mu Ethiopia ng'atyaime mu kigaali kye, ng'ali kusoma ekitabo eky'omulanzi Isaia.

²⁹ Mwoyo Mutukuvu yaakoba Filipo ati: “Ja otuuke ku kigaali ekyo.”

³⁰ Agho Filipo yaalumuka yaatuuka ku kigaali era yaamuwulira nga asoma ekitabo ky'omulanzi Isaia, yaamubuuza ati: “By'osoma obitegeera?”

³¹ Omwethiopia yaamwiramu ati: “Mpanga ntya okubitegeera, okutoolaku nga ghaligho abiinhinhongoire?” Agho yaasaba Filipo aniine atyame naye mu kigaali.

³² Ekitundu ky'ebyaghandiikibwa kye yali asoma kikoba kiti: “Yali ng'oti n'entaama ye batwala okwita. Oba ng'oti n'entaama etalira nga bagisalaku ebiviiri; tiyabumbula munwa naire.

³³ Baamufeebya, n'omusango gwe baagusaliriza. Ghazira alisobola kwogera bigema ku bantu ba ku luzi lwe, kuba obulamu bwe butooleibwa mu nsi.”

³⁴ Omulaawe yaakoba Filipo ati: “Nkobera, omulanzi ayogera ku ani? Yeeyogeraku mwene oba ayogera ku muntu wundi?”

³⁵ Filipo yaatoolera okwogera ng'ainhamira ku kyaghandiikibwa ekyo, yaamukobera Amawulire Amalungi agagema ku Yesu.

³⁶ Bwe baali nga bali mu ngira bali kuja, baatuuka aghaali amaadhi, omulaawe yaakoba Filipo ati: “Bona amaadhi gaagano! Ekindobera okubatizibwa ni ki?” [

³⁷ Filipo yaamukoba ati: “Oghanga okubatizibwa bw'oba nga oikiriza n'omwoyo gwo gwonagwona.” Omulaawe yairamu ati: “Ndhikiriza nga Yesu Kurisito n'Omwana wa Katonda.”]

³⁸ Agho yaalagira okwemereza ekigaali, era bombi Filipo n'omulaawe baika mu maadhi, Filipo yaamubatiza.

³⁹ Bwe baava mu maadhi, Mwoyo wa Musengwa yaatwala Filipo. Omulaawe tiyairayo kumubona aye yeeyongerayo mu lugendo lwe nga musangaavu.

⁴⁰ Filipo yaaboneka mu Azoto, yaabitabita mu bibuga byonabyona ng'aja ng'akobera abantu Amawulire Amalungi okutuuka e Kaisaria.