Ebikolwa by'Abatume 3 - Baibuli Ekibono kya Katonda 2014

Omusaadha omulema awonezebwa

¹ Agho olwatuuka Petero ni Yoanne baaniinaniina okuja mu isinzizo ku saawa omwenda, esaawa ey'okusaba.

² Ghaabaagho omusaadha ye baali basitwire, nga mulema okuva lwe yava mu nda ya inhina, era buli lunaku yabanga agho ku mulyango ogw'eisinzizo, ogwetebwa Omulungi, ng'asabiriza empiiya ku bangira mu isinzizo.

³ Ono bwe yabona Petero ni Yoanne nga bali kumpi okwingira mu isinzizo, yaabasaba bamufunireyo ku mpiiya.

⁴ Petero yaamwekalirisa ni Yoanne. Agho Petero yaamukoba ati: “Tulingirire.”

⁵ Yeena yaabalingirira, ng'asuubira okufunayo akantu.

⁶ Petero yaamukoba ati: “Feeza ni zaabu nzira aye kye ndi nakyo kye nkugha. Mu liina lya Yesu Kurisito ow'e Nazarethi situka otambule.”

⁷ Yaamugema ku mukono omusaadha, yaamusitula. Era mangu ago nga ebigere bye n'enhingo bikakata.

⁸ Olwasituka yaayemerera, yaatambula yangira nabo mu isinzizo ng'ali kutambula bw'atuumatuuma era ng'asaaka Katonda.

⁹ Abantu boonaboona baamubona ng'atambula ng'asaaka Katonda.

¹⁰ Baamumanha nga n'oyo eyatyamanga ku Mulyango Omulungi ogw'eisinzizo ng'asabiriza empiiya. Beewuunhia inho era baayasaamirira olw'ekyali kimukoleibwaku.

Petero ayogera eri abantu

¹¹ Bwe yali ng'akeegemye ku Petero ni Yoanne, abantu boonaboona baalumuka baidha ghe baali ku lubalaza olwetebwa olwa Solomoni, nga bayasaamiriire.

¹² Petero bwe yabona abantu abo yaabakoba ati: “Abasaadha Abaisiraeli, lwaki kino mukyewuunhia? Lwaki mutulingirira mutyo ng'oti maani gaife na butuukirivu bwaife n'ebitambwiza ono?

¹³ Katonda wa Aburahamu, Katonda wa Isaaka, Katonda wa Yakobo, Katonda wa badhaadha baife, n'agulumiiza Omwana we Yesu, oyo ye mwaghaayo era ni mumwegaana mu maiso ga Pilato, bwe yali asazeegho okumulekula.

¹⁴ Imwe mwegaana omutuukirivu era ow'amazima, mwasaba babalekulire omutemo.

¹⁵ Mwaita mwene bulamu, oyo Katonda ye yazuukiza mu bafu, era ife tuli badhulizi b'ekyo.

¹⁶ Ate olw'okwikiriza, eriina lye kye liviire liwonia ono ye mubona era ye mwidhi. Okwikiriza oyo, n'okumughaire okuwonera irala nga mwenamwena bwe mubona.

¹⁷ “Kale aboluganda, ndidhi nga imwe n'abafuzi baimwe ekyo mwakikola mu butamanha.

¹⁸ Aye Katonda kye yalangirira ng'abita mu balanzi be boonaboona ati Kurisito we, yali waakudaagadaaga, yakituukiriza atyo.

¹⁹ Kale mwenenie, mukyuke memale ebibi byaimwe bisoniyibwe.

²⁰ Mufune obwire obw'okwesiima mu maiso ga Musengwa, era olwo abasindikire Kurisito Yesu oyo ye yabategekera okuva eira.

²¹ Waire nga kimugwaniire oyo buti okuba ng'akaali mu igulu okutuusa ekiseera eky'okwiza byonabyona obuyaaka nga Katonda bwe yayogerera mu balanzi be abatuukirivu okuviira irala mu mainhama.

²² Kuba Musa bwenebwene yakoba ati, ‘Katonda Musengwa alibafunira omulanzi mu baganda baimwe, nga nze. Mumuwuliranga mu byonabyona by'abakoba.

²³ Era kiisi muntu atawulira mulanzi oyo alitoolebwa mu bantu yazikirizibwa.’

²⁴ Era n'abalanzi boonaboona abaayogera, okuva ku Samueli, n'abaamwiririra, enaku dhino baadhiranga.

²⁵ Niimwe abaana ab'abalanzi era ab'endagaano Katonda ye yakola ni badhaadha baife ng'ekoba Aburahamu eti ‘Mu izaire lyo amaghanga goonagoona mwe galifunira enkabi.’

²⁶ Agho ni, Katonda bwe yalonda Omwana we, yasooka kumutuma ye imwe abaghe enkabi nga buli mulala akyuka yaaleka ebibi bye.”