Ebikolwa by'Abatume 2 - Baibuli Ekibono kya Katonda 2014

Okwidha kwa Mwoyo Mutukuvu

¹ Agho olunaku lwa Pentekote bwe lwatuuka, Abeegeresebwa boonaboona baali beesololeiza mu kifo kirala.

² Mu kiseera ekyo kyene, ghaabaagho okuwuuma okuva mu igulu nga kuli ng'oti kwa kiwunga ow'amaani, era kwaidhuza endhu yoonayoona mwe baali batyaime.

³ Baabona enimi ng'edh'omuliro, nga dheetengeike ku buli mulala

⁴ era boonaboona baidhula Mwoyo Mutukuvu baatoolera okwogera mu nnimi edhindi, nga Mwoyo bwe yabaghanga okwogera.

⁵ Mperaano, mu Yerusalemu mwalimu Abayudaaya, n'abaava mu maghanga goonagoona agali ghansi gh'eigulu, nga basaadha baidhumbize ba idiini.

⁶ Kale ni okuwuuma okwo bwe kwabaagho, eikuukuubira lyesoloza era batabulwa inho, kuba buli mulala yabawulira nga boogera mu lulimi lwe lwene.

⁷ Baayasaamirira era beewuunhia nga bakoba bati: “Bano boonaboona aboogera ti Bagalilaaya?

⁸ Kisoboka kitya ife buli mulala, okubawulira mu lulimi lwe oluzaaliranwa?

⁹ Abaparithi, Abamedi, Abelami ab'omu Mesopotamia, ni mu Buyudaaya, ni mu Kappadokia, ni mu Ponto, ni mu Asia.

¹⁰ Ni mu Furugia, ni mu Panfilia, ni mu Misiri, ni mu biketezo bya Libya ebiriinaine Kurene, ng'otaireku n'Abaroma abageni

¹¹ Abayudaaya n'abamaghanga agandi abaakyuka, Abakurete n'Abawarabu, twenatwena twabawulira nga boogera eby'amaani Katonda by'akoze mu nnimi dhaife!”

¹² Baayasaamirira boonaboona era baasoberwa, beebuuzagania bati: “Kino kitegeeza ki?”

¹³ Aye abandi baakoba bati: “Abo batamiire mwenge musu!”

Okwogera kwa Petero ku Pentekote

¹⁴ Agho Petero yaayemerera, ng'ali ghalala n'eikumi n'omulala, yaakangula ku mamiro yaabakoba ati: “Imwe abasaadha Abayudaaya n'imwe mwenamwena ababa mu Yerusalemu, mumanhe kino era muntegere ku matu.

¹⁵ Bano ti batamiivu nga bwe mudhuuba, kuba dhiri bwa saawa isatu edh'enkyo.

¹⁶ Aye kino Yoeli omulanzi kye yalanga ati,

¹⁷ ‘Katonda akoba ati ku nkomerero kino n'ekiribaagho: Ndiyugha ku bantu boonaboona Mwoyo wange. Batabane baimwe ni baghala baimwe baliranga ekiribaagho, n'abaisuka baimwe balibonekerwa, n'abakaire mu imwe baliroota ebirooto.

¹⁸ Mu nnaku edho, abagheereza bange abasaadha n'abakazi, ndibayughaku Mwoyo wange, baalanga eby'okubaagho.

¹⁹ Ndiraga ebyewuninkiriza eyo ghaigulu mu igulu, n'ebyewuunhio ghansi ku nsi. Ghalibaagho omusaayi, omuliro, n'omwosi ogunioka.

²⁰ Endhuba erizikira, Omwezi gwamyuka oti musaayi, memale olunaku lwa Musengwa olukulu era olw'ekitiisa lwatuuka.

²¹ Era buli alyeta eriina lya Musengwa alirokolwa.’

²² “Imwe abasaadha Abaisiraeli, muwulire ebibono bino: Yesu ow'e Nazarethi, n'omusaadha Katonda ye yakakalisa mu imwe n'eby'amaani, n'ebyewuninkiriza, n'obumanhiso, bye yamukozesanga mu imwe, era nga beene imwe bwe mwidhi.

²³ Ono yabagheebwa nga Katonda amaze okukiteesa n'okukimanha, era imwe mwakozesa ababi okumwita nga bamukomerera ku musalaba.

²⁴ Aye oyo Katonda yamuzuukiza yaamutoola mu bulumi obw'okufa, nga tikisoboka oyo kusigala mu maani ga kufa

²⁵ kuba Daudi yamwogeraku ati, ‘Musengwa namulingiriranga buli lunaku, kuba andi ku mukono gwange omusaadha ndobe kulugaaluga.

²⁶ Agho ni omwoyo gwange gwasangaala, n'olulimi lwange lwasagamba n'omubiri gwange guwuumuliire mu kusuubira;

²⁷ kuba oyo talireka mwoyo gwange mu kuzikirira, waire okuleka omutuukirivu we okuvundira mu magombe.

²⁸ Wandhegeresa engira edh'obulamu, ndisangaala nga nkuli mu maiso.’

²⁹ “Baganda bange, ndidha kwogera ku dhaadha Daudi nga titya. Yafa yaaziikibwa n'amagombe ge gali ghano n'okutuusa olwaleero.

³⁰ Kale ni yali mulanzi yaamanha Katonda kye yeelayirira mwene ng'amusuubiza ati mulala ku baidhukulu be beene alityama ku kityamo kye.

³¹ Kye yalengera naayogeraku, kwali kuzuukira kwa Kurisito, kuba tiyalekebwa mu magombe waire omubiri gwe okuvunda.

³² Yesu ono, Katonda yamuzuukiza, era twenatwena tuli badhulizi b'ekyo.

³³ Mperaano, bwe yamala okuniinisibwa ku mukono omusaadha ogwa Katonda, era n'okufuna Mwoyo Mutukuvu, eyamusuubizibwa Katonda Lata, n'okutugha ekirabo kino kye muli kubona era kye muli kuwulira.

³⁴ Kuba Daudi tiyaniina mu igulu, aye mwene oyo n'eyakoba ati: ‘Musengwa Katonda yakoba Musengwa wange ati: Tyama ku mukono gwange omusaadha,

³⁵ okutuusa bwe ndita abazigu bo ghansi gh'ebigere byo.’

³⁶ “Kale ni, endhu ya Isiraeli yoonayoona emanhe aghazira kubuusabuusa, nga Katonda yafuula, Yesu oyo ye mwakomerera ku musalaba, Musengwa era Kurisito.”

³⁷ Ebyo bye baawulira byabafumita ku myoyo, baakoba Petero n'Abatume abandi bati: “Baganda baife, tukole ki?”

³⁸ Petero yaabakoba ati: “Mwenenie, buli muntu abatizibwe mu liina lya Yesu Kurisito, ebibi byaimwe bisoniyibwe, era mwidha kufuna ekirabo kya Mwoyo Mutukuvu

³⁹ kuba ekisuubizo kya Katonda kyaimwe n'abaana baimwe, n'abo boonaboona abali eghala, boonaboona Musengwa Katonda waife oyo b'aba ng'ayese.”

⁴⁰ Era yaayongera okubakobera ebindi kamaala, yaabakubiriza ng'abakoba ati: “Mwewonie ebikolwa eby'oluse luno olubi.”

⁴¹ Abo abaasangaalira ebibono bye, baabatizibwa, era ku lunaku olwo, ku baikiriza kweyongeraku abantu ng'enkumi isatu.

⁴² Beekalangulira mu kwegeresebwa kw'Abatume, ni mu kwisa ekirala, mu kumegula omugaati, ni mu kusaba.

Obulamu obw'abaikiriza

⁴³ Abatume baakola ebyewuunhio kamaala n'obumanhiso, era buli muntu yaatya Katonda.

⁴⁴ Abaikiriza boonaboona baabanga ghalala, n'ebyaibwe byonabyona nga babita ghalala.

⁴⁵ Baatundanga eitaka n'ebyaibwe, ebyavangamu baabigabananga boonaboona, nga bajiira ku bwetaavu bwa buli muntu.

⁴⁶ Baafubanga buli lunaku okuba aghalala mu isinzizo, era baajanga mu ndhu dhaibwe okumegula omugaati. Emere nga bagiriisa isanhu na kwisania

⁴⁷ nga basaaka Katonda, era abantu boonaboona nga babenda. Buli lunaku, Musengwa yaaja ng'abongeraku abaalokolwanga.