Danieli 8 - Baibuli Ekibono kya Katonda 2014

Danieli abona entaama enume n'embuzi enume mu kubonekerwa kwe

¹ Mu mwaka ogwokusatu ogw'obufuzi bwa kyabazinga Beleshazzari, nze Danieli nafuna okubonekerwa okwairirira kule okwasooka.

² Mu kubonekerwa kuno naja okulinga nti, nga mbona ndi mu Susa ekibuga ekyezungulwirwa ebimante ebigumu, ekyali mu kiketezo ky'e Elamu. Nali nga nhemereire ku mbali okw'omwiga Ulai.

³ Okuja okulinga nti, nga mbona entaama enume eyemereire ku mbali okw'omwiga. Yaliku amayiga abiri nga gombi maleeyi, aye nga erindi ireeyi ku okusingaku liinaalyo. Era eryo eireeyi okusingaku liinaalyo n'eryasembayo okumera.

⁴ Naabona entaama eyo ng'eri kulumba yaafula mu biketezo eby'oku luuyi olw'e bugwandhuba, ni mu by'oku luuyi olw'omukono omugooda olw'e buvandhuba, ni mu by'oku luuyi olw'omukono omusaadha olw'e buvandhuba. Ghaabulagho ensolo yoonayoona eyasobola okugirwanisa, waire okubaagho asobola okugirekuza ekintu ekiri mu buyinza bwayo. Nga buli ky'eyenda ky'ekola, era nga yeekudumbazakudumbaza.

⁵ Nali nkeefumintiriza ku makulu g'ebyo, okuja okulinga nti nga mbona embuzi enume ng'eri kuva e bugwandhuba. Yali eri kuziinhuuka embiro, nga n'ebigere byayo tibiri kutuuka ku itaka. Era ng'eri n'eiyiga eriboneekerera irala liti, nga liri ghagati gh'amaiso gaayo.

⁶ Yaalumuka n'amaani mu busungu okuja okulumba entaama enume ere eyali n'amayiga abiri, ye nabona ng'eyemereire ku mbali okw'omwiga.

⁷ Naagibona ng'eri kulumba entaama enume eyo n'obusungu obungi, yaagifula n'amayiga gaayo gombi gaamenheka. Entaama eyo tiyali na maani ga kulwanisa mbuzi eyo. Kale embuzi yaagisuula ghansi ku itaka, yaagityankirira. Ghaabulagho eyasobola okuwonia entaama eyo.

⁸ Embuzi enume eyo yeeyongera okwekudumbaza ekibitiriire. Aye bwe yali ekeeragalaga nga bw'eri n'amaani amangi, eiyiga lyayo eikologho lyamenheka. Mu kifo kyalyo ghaakukunukagho amayiga agandi agaboneekerera ana, nga gasonse mu ibbanga ku ndhuyi eina edh'ensi.

⁹ Ghaabaagho akayiga akatono akaakukunuka okuva mu lindi ku mayiga ago ana, kaakula kaaba ka maani inho era obuyinza bwako bwamaamira mu buvandhuba, ni ku luuyi olw'omukono omusaadha olw'e buvandhuba, ni ku luuyi olw'ensi ey'ekitiisa.

¹⁰ Akayiga ako kaakula kaaba ka maani inho, nga kasobola n'okulumba eigye ery'omu igulu. Kaalumba edhindi ku muunienie edh'oku igulu, kaadhisuula ghansi kaadhityankirira.

¹¹ Keekudumbaza inho, kaatuuka n'okwesonsa ku Mulangira akulira amagye ag'omu igulu. Kaalekera agho okumugha ebigheebwayo ebyokebwa ebya buli lunaku, kaayonoona n'eisinzizo lye.

¹² Kaatoolagho ensinza entuufu, kaataagho ensinza etakania okughaayo ebigheebwayo ebyokebwa ebya buli lunaku. Olwo kaakolanga buli kye kaayendanga, era ebintu byakajiiranga bukalamu.

¹³ Agho naawulira omutukuvu mulala ng'ali kwogera. Era omutukuvu owundi yaabuuza ole eyayogera ati: “Ebyo ebiboneibwa mu kubonekerwa biribaagho kutuuka li? Ebigheebwayo ebyokebwa ebya buli lunaku birimala kiseera ki nga bikaali kwizibwagho? Okwonoona kulizikiriza ensi kutuuka li? Eigye ery'omu igulu n'eisinzizo birityankirirwa kutuuka li?”

¹⁴ Ole yairamu ati: “Okumala enaku enkumi ibiri na bisatu (2,300) enkyo n'eigulo, memale eisinzizo litukuzibwe.”

Malaika Gaburieli ainhonhola okubonekerwa okwo

¹⁵ Nze Danieli, bwe namala okubona ebyali mu kubonekerwa okwo, naagezaaku okutegeera amakulu gaabyo. Naja okulinga nti nga mbona agho emberi wange ekyemereire ng'oti muntu.

¹⁶ Naawulira amamiro ag'omuntu nga gava ghagati mu mwiga Ulai, gaayeta gati: “Gaburieli, kobera omusaadha oyo amakulu g'ebyo by'aboine.”

¹⁷ Kale Gaburieli yaaseeta ghe nali nhemereire. Bwe yaidha naatya inho, naakuba amakiryaivu era naakutama n'ekyeni kyatuuka ku itaka. Yankoba ati: “Iwe omuntu obuntu, tegeera ng'okubonekerwa okwo kugema ku biseera bya nkomerero ya nsi.”

¹⁸ Bwe yali ali kwogera ninze, nze neeyala agho ku itaka nga neefundiike, endoolo enhingi einho dhangema. Aye yangemaku yaanhemereza ku magulu gange.

¹⁹ Yankoba ati: “Bona, nja kukwoleka ebiribaagho Katonda ng'asungughaire. Okubonekerwa okwo kw'oboine kugema ku biseera ebyategekebwa okuba eby'enkomerero y'ensi.

²⁰ “Entaama enume ebaire n'amayiga abiri y'oboine, etegeeza obwakyabazinga bwa Media n'obw'e Perusia.

²¹ Embuzi enume etegeeza obwakyabazinga bwa Bugureki, ate eiyiga eikologho mu bweni bwayo lyategeeza kyabazinga eyasooka ow'ensi eyo Bugureki.

²² Amayiga ana agaameze mu kifo kya lire eirala eryamenheike, gategeeza obwakyabazinga obuna obuliidhagho nga bule obwa Bugureki bugabaniziibwamu. Aye obwakyabazinga obwo obuna tibuliba bwa maani ng'oti ni bule obwasooka.

²³ “Enkomerero y'obwakyabazinga obwo bw'eriba ng'eri kumpi okutuuka, era nga n'abantu babitiriiza inho okukola ebibi, ghaliidhagho kyabazinga amoga obukambwe era omukuyikuyi einho.

²⁴ Aliba wa buyinza inho, aye ng'obuyinza obwo ti bubwe ku bubwe. Alireetagho okuzikirira okutiisa einho era byonabyona by'alikola birimujiira bukalamu. Alizikiriza abantu ab'amaani, n'abantu ba Katonda abatukuvu.

²⁵ Alikozesa olugezigezi lwe yaatuukiriza enkwe dh'ayenda okukola. Alyekudumbazanga era yaazinduukirizanga abantu kamaala nga tibeetegeike yaabazikiriza. Alituuka n'okulwanisa Kyabazinga asinga mu bakyabazinga boonaboona. Aye mwene talizikirizibwa na maani ga bantu buntu.

²⁶ Era okubonekerwa okugema ku misengo egigheebwayo enkyo n'eigulo kwe nkwinhonhoire, kwidha kutuukirira. Aye iwe kuuma ebiri mu kubonekerwa okwo nga bya kyama, kuba ghaidha kubitagho ekiseera kinene memale bituukirire.”

²⁷ Nze Danieli amaani gampwamu, era naabeera irala mulwaire okumala enaku. Oluvainhuma naamala naasituka, naaja ku mirimo kyabazinga gye yampa. Aye okubonekerwa okwo kwasigala nga kukantabwire, nga tisobola kukutegeera naire.