Danieli 7 - Baibuli Ekibono kya Katonda 2014

Danieli ainhonhola bye yabonekerwa 7:1—12:13 Danieli abonekerwa ebisolo ebina

¹ Mu mwaka ogusooka nga kyabazinga Beleshazzari n'afuga Babilonia, Danieli bwe yali ng'alambaire mu buliri bwe yaabonekerwa mu kirooto. Bwe yamala yaaghandiika ekirooto ekyo ng'akoba byonabyona nga bwe byali.

² Yakoba ati: Mu kubonekerwa kwange kwe nafuna obwire, naja okulinga nti nga mbona empewo ng'eri kuva ghaigulu ku ndhuyi dhoonadhoona, yaasiikuula enhandha enkologho.

³ Ebisolo ebikologho bina byakukunuka okuva mu nhandha eyo, nga buli kirala kifaanana bwakyo.

⁴ Ekyasooka nga kiri ng'oti mpologoma, aye nga kiri n'amaghagha ng'oti ga nkookooma. Bwe nali nga nkaalingiriire, baakimaanhuulaku amaghagha. Baamala baakisitusa, baakyemereza ku magulu abiri ng'oti muntu, era baakigha okulowooza ng'oti kwa muntu.

⁵ Kabiri naja okulinga nti nga mbona ekisolo ekyokubiri ekikambwe. Kyali kisitwikeku oluuyi olundi aye ng'olundi luli ku itaka. Era nga kiri n'embavu isatu mukanwa dhe kigemereire n'amaino gaakyo. Baakikoba bati: “Situka olye emamba nhingi.”

⁶ Nali nkaalingirira ekyo, okuja okubona ng'eri kuvaayo ekisolo ekindi ekifaanana ng'oti mpala. Kyali n'amaghagha ana agali ng'oti ga nhonhi ku mugongo gwakyo, era nga kiri n'emitwe ena. Ekisolo ekyo baakigha obuyinza okufuga.

⁷ Ebyo nga biwoire, kabiri naja okulinga nti nga mbona ekisolo ekyokuna, nga kitiisa inho kyagemya n'entete, era nga kiri n'amaani amabitirivu. Kyali n'amaino amakologho nga ga kyuma ekigumu einho. Nga kikaavuula bye kyagaaniriiza, kyabimenhamenha, era kyatyankirira ebifiiseegho n'ebigere byakyo. Kyali nga kyawukana inho ku bisolo bire ebisatu ebyasooka, nga kiri n'amayiga ikumi.

⁸ Nali nkeerolera amayiga ago, okuja okulinga nti nga mbona akayiga akatono nga kali kukukunuka okuva mu ago eikumi. Era kaamala kaighagho amayiga asatu ku ago eikumi agaasookagho. Akayiga ako kaaliku amaiso ng'oti ga muntu, era kaabaaku n'omunwa nga guli kwogera eby'okwesuutasuuta.

Danieli abonekerwa Oyo eyaligho okuva eira n'eira

⁹ Nali nkaalingirira ebyo, baataagho ebityamo eby'obwakyabazinga. Oyo eyaligho okuva eira n'eira yaatyama ku kindi ku bityamo ebyo. Ebivaalo bye byali byeru ng'oti mugozi, n'enviiri dhe dhaaba ndheru ng'oti buviiri bwa ntaama. Ekityamo kye ekyo nga kiriku enkede edhivaaku omuliro, n'ekityamo kyene kyavaaku enimi edh'omuliro.

¹⁰ Ghamberi ghe nga ghali kuvaagho omuliro ogw'amaani ng'oti n'amaadhi bwe gawolomboka mu mwiga. Abantu enkumi n'enkumi nga bali kumugheereza, n'abantu emitwalo n'emitwalo baayemerera agho mu maiso ge. Okusala emisango kwatoolera, n'ebitabo byawumbululwa.

¹¹ Bwe nali nga nkaalingiriire, naawulira ng'akayiga kali kwogera eby'okwesuutasuuta. Naja okubona ng'ekisolo ekyokuna bakiise, omulambo gwakyo gwagheebwayo okwokebwa omuliro.

¹² Ebisolo bire ebindi baabitoolaku obukumu bwabyo obw'okufuga, aye baabireka byasigala nga bikaali biramu okumala ekiseera ekigere.

¹³ Mu kubonekerwa okw'omu bwire obwo, naja okulinga nti nga mbona afaanana ng'oti mwana wa muntu, ng'ali kwidhira mu bire. Era yaaja y'Oyo eyaligho okuva eira n'eira, baamwandhulayo.

¹⁴ Era baamugha obukumu, ekitiisa, n'obwakyabazinga. Olwo abantu boonaboona abava mu maghanga goonagoona, era aboogera enimi dhoonadhoona, basobole okumugheerezanga. Obufuzi bwe tibukoma, bubaagho byanda na byanda, era obwakyabazinga bwe tibalibuzikiriza.

Amakulu g'ebyo Danieli bye yabona mu kubonekerwa okwo

¹⁵ Nze Danieli neeraliikirira era naatya olw'okubonekerwa okwo.

¹⁶ Kale naatuukirira owundi ku bantu abaali beemereire agho, naamubuuza ekituufu ekigema ku kubonekerwa okwo. Agho yankobera amakulu g'ebyo bye nabonekerwa, ati:

¹⁷ “Ebisolo ebyo ebikologho ebina, bitegeeza bakyabazinga abana abalibaagho mu nsi.

¹⁸ Aye abatukuvu b'oyo Ali Ghaigulu Yeene, baligheebwa obwakyabazinga bwaba bwaibwe ebyanda n'ebyanda.”

¹⁹ Agho naayenda okumanha ekituufu ekigema ku kisolo ekyokuna ekyali eky'endhawulo ku bire ebindi byonabyona. Ekyali nga kitiisa einho, era ng'amaino gaakyo ga kyuma ekigumu einho, n'enkumu dhaakyo dhaaba dha kyuma eky'ekikomo. Nga kikaavuula bye kyagaaniriiza, kyabimenhamenha, era kyatyankirira ebifiiseegho n'ebigere byakyo.

²⁰ Era naayenda okumanha ebigema ku mayiga eikumi agaali ku mutwe gwakyo. Mmanhe n'ebigema ku iyiga lire erindi eryamera, ni ligwisa ghansi amayiga asatu ku ago eikumi. Eiyiga eryo lyaliku amaiso, era lyabaaku n'omunwa nga guli kwogera eby'okwesuutasuuta. Era eiyiga eryo nga libonekera okuba eigumu okusinga gale agandi.

²¹ Nali nkeerolera eiyiga eryo, lyatanula olutalo ku batukuvu ba Katonda era lyabaghangula.

²² Agho Oyo eyaligho okuva eira n'eira yaidha, yaasala omusango, era abatukuvu b'oyo Ali Ghaigulu Yeene baagusinga. Era ekiseera kyamala kyatuuka abatukuvu abo baagheebwa obwakyabazinga.

²³ Agho yaaninhonhola ati: “Ekisolo ekyokuna buliba bwakyabazinga obwokuna obulibaagho ku nsi, nga bwa ndhawulo ku bundi bwonabwona. Obwakyabazinga obwo bulimaamira ensi yoonayoona, bwagityankirira era bwagimenhamenha.

²⁴ Ate amayiga ago eikumi, ni bakyabazinga eikumi abaliidhagho ni bafuga obwakyabazinga obwo. Era ghalimala ghaidhagho owundi ng'abo baviireku, aliba ow'endhawulo ku abo abaamusookagho. Oyo alighangulaku bakyabazinga basatu ku abo.

²⁵ Alyogera bubi ku oyo Ali Ghaigulu Yeene, era yaadaazadaaza abatukuvu b'oyo Ali Ghaigulu Yeene. Aligezaaku okukyusa ebibinuko ebyabalagirwa n'amateeka agaabagheebwa. Era abantu ba Katonda abo baliba mu buyinza bwe okumala emyaka esatu n'ekitundu.

²⁶ Aye ghalibaagho okutyama mu igulu okumusalira omusango, obufuzi bwe baabumutoolaku era baamuzikiriza okumumaliragho irala.

²⁷ Olwo obwakyabazinga, n'obukumu, n'ekitiisa, ebiri ghansi gh'eigulu, balibigha abatukuvu b'oyo Ali Ghaigulu Yeene. Obwakyabazinga bwaibwe buliba bwa byanda na byanda, era abafuzi boonaboona ab'ensi balibagonderanga baabagheereza.”

²⁸ Ebyo agho ghe byakoma. Era nze Danieli naatya inho mule, n'okusiiwuuka naasiiwuuka. Aye era ebintu ebyo naabita ku mwoyo.