Danieli 6 - Baibuli Ekibono kya Katonda 2014

Danieli ng'ali mu kiina omwali empologoma

¹ Agho Dario yaasalagho okutaagho abafuzi ab'amasaza kikumi n'abiri (120), bafugenga mu bwakyabazinga bwe bwonabwona.

² Abafuzi abo yaabataaku abakungu basatu ab'oku ntwiko okubakuliranga, olwo kyabazinga alobe kufiirizibwanga mu mirimo egikolebwa mu bwakyabazinga bwe. Danieli yali mulala ku bakungu abasatu abo.

³ Mu kiseera kitono kiti, Danieli oyo yaaboneka ng'asinga bakungu baine bale ab'oku ntwiko ababiri, ghalala n'abafuzi ab'amasaza, mu kukola emirimo obulungi kuba yalimu omwoyo omulungi einho. Era olw'okuba yali akola bulungi atyo, kyabazinga yali ategeka okumugha okukuliranga obwakyabazinga bwonabwona.

⁴ Bakungu baine bale ab'oku ntwiko ababiri, ghalala n'abafuzi ab'amasaza, baanoonia bazuuleyo ekintu eky'okwemuluguunhia ku Danieli ku bigemagana n'obwakyabazinga. Aye baalemwa okufuna kye banaavaaku okumwemuluguunhiaku, kuba yali mwesigwa, ng'azira nsobi y'akola waire okuba n'ekikyamu ky'akola.

⁵ Agho abasaadha abo, owundi yaakobanga baine ati: “Bana, tituja kufuna kya kwemuluguunhia ku Danieli, okutoolaku nga kigema ku mateeka ga Katonda we.”

⁶ Kale baaja ye kyabazinga nga bali ghalala, baamukoba bati: “Isebantu kyabazinga Dario, ghangaala byanda na byanda!

⁷ Ife abakungu ab'oku ntwiko mu bwakyabazinga bwo, n'ab'amasaza, n'abawi b'amagezi, n'ab'amagombolola, twisainia tuti oteegho ekiragiro era obone nga kiteebwa mu nkola. Kibe nti okumala enaku amakumi asatu, omuntu anaasaba katonda yeenayeena, oba n'asaba omuntu owundi yeenayeena atali iwe Isebantu kyabazinga, asuulibwe mu kiina omuli empologoma.

⁸ Mpegaano ni, Isebantu kyabazinga, kola ekighandiiko eky'ekiragiro ekyo okiteeku n'ekinkumu, kibe nga tikisoboka kukyusibwamu, ng'oti n'amateeka ag'Abamedi n'Abaperusi bwe gatamenhebwagho naire.”

⁹ Agho kyabazinga Dario yaakola ekighandiiko eky'ekiragiro ekyo, yaakitaaku n'ekinkumu.

¹⁰ Danieli bwe yamanha ng'ekighandiiko eky'ekiragiro ekyo kiteirebwaku ekinkumu, yairayo eka ewuwe mu ndhu ye. Amadinisa ag'endhu eyo ag'omu kisenge ekya ghaigulu, gaali nti bwe gaigulwanga nga galingirira okwolekera Yerusalemu. Kale bwe yatuuka eyo yaakuba amakiryaivu, yaasaba era yeebaza Katonda we nga bwe yakolanga okuva eira, emikuzi esatu buli lunaku.

¹¹ Agho abasaadha abo baaja nga bali ghalala, baamubona ng'ali kusaba era ng'alikweghemba Katonda we.

¹² Era baamala baaja ye kyabazinga baayogera ku kiragiro kye yakola. Baamukoba bati: “Isebantu kyabazinga, tiwata kinkumu ku kiragiro ekikoba kiti okumala enaku amakumi asatu, omuntu anaasaba katonda yeenayeena, oba n'asaba omuntu owundi yeenayeena atali iwe Isebantu kyabazinga, asuulibwe mu kiina omuli empologoma.” Kyabazinga yaabairamu ati: “Ekyo kituufu, era ekiragiro ekyo tikisoboka kukyusibwamu naire, ng'oti n'amateeka ag'Abamedi n'Abaperusi bwe gatamenhebwagho.”

¹³ Agho baakoba kyabazinga bati: “Danieli oyo, omulala ku bantu abaanhagibwa e Buyudaaya, takutaamu kitiisa iwe Isebantu waire okugondera ekiragiro kye wataaku ekinkumu. Era asaba Katonda we emikuzi esatu buli lunaku.”

¹⁴ Kyabazinga bwe yawulira ebyo enaku yaamugema inho. Yaasala amagezi goonagoona okuwonia Danieli, okutuusa endhuba bwe yagwa.

¹⁵ Abasaadha abo era bairayo ye kyabazinga nga bali ghalala, baamukoba bati: “Isebantu kyabazinga, idhukira nga mu mateeka ag'Abamedi n'Abaperusi, ezira kiragiro kiteereibwagho kyabazinga kisobola kumenhebwagho.”

¹⁶ Kale kyabazinga yaalagira batoole Danieli bamusuule mu kiina omwali empologoma. Kyabazinga yaakoba Danieli ati: “Katonda wo oyo y'ogheereza n'obwesigwa akuwonie!”

¹⁷ Baaleeta eibaale baalisemba gha munwa ogw'ekiina ekyo. Kyabazinga yaalisibaku akamanhiso ak'empeta ye ey'obwakyabazinga era yaalisibaku n'akamanhiso aka bakungu be, ghalobe kubaagho ekikyusibwamu ku bigema ku Danieli.

¹⁸ Agho kyabazinga yairayo mu kisaagaati kye. Yaamala obwire obwo nga taliire ku mere, waire okuganha bamuleetere ebisanhusa n'endoolo dhaamubula.

¹⁹ Ku nkyo einho, kyabazinga yaasituka yaayanguyirira okuja ku kiina omwali empologoma.

²⁰ Ng'ali kumpi okutuuka ku kiina ekyo Danieli mwe yali, yaayeta mu mamiro ag'enaku ati: “Wo Danieli, iwe omugheereza wa Katonda omulamu, Katonda wo y'ogheereza n'obwesigwa yasoboire okukuwonia empologoma?”

²¹ Danieli yaamwiramu ati: “Isebantu kyabazinga, ghangaala byanda na byanda!

²² Katonda wange yatumye malaika we, yaaziba eminwa egy'empologoma dhaaloba kunkolaku kabi koonakoona, kuba mu maiso ga Katonda oyo nze nziraku musango gwonagwona. Era ni mu maiso go, iwe Isebantu kyabazinga, ghazira kibi kye nakola.”

²³ Agho kyabazinga yaasangaala ebitaloodheka era yaalagira batoole Danieli mu kiina omwali empologoma. Kale baamutoolayo mu kiina ekyo nga ghazira kabi koonakoona kamutuuseeku, kuba yeesiga Katonda we.

²⁴ Kyabazinga yaalagira baaleeta abasaadha bale abaaghaayiriza Danieli, baabasuula mu kiina ekyo omwali empologoma, ghalala ni bakazi baibwe, n'abaana baibwe. Era baabanga bakaali na kutuuka ku ntobo ya kiina ekyo, ng'empologoma dhaabamemeine ira amagumba goonagoona.

²⁵ Ebyo nga biwoire, kyabazinga Dario yaaghandiikira abantu boonaboona, abava mu maghanga goonagoona, era aboogera enimi dhoonadhoona, ati: “Emiraala gyeyongerenga okuba mu imwe.

²⁶ Ndi kugha ekiragiro nti mu biketezo byonabyona ebiri mu bwakyabazinga bwange, abantu boonaboona batyenga Katonda wa Danieli, bamutengamu ekitiisa. Kuba oyo ni Katonda omulamu, aligho ebyanda n'ebyanda. Obwakyabazinga bwe ghazira asobola kubuzikiriza, n'obukumu bwe tibuliwaagho.

²⁷ Awonia era yaalokola abantu, yaakola obumanhiso n'ebyewuunhio mu igulu ni mu nsi. Era n'awoniiza Danieli okwitibwa empologoma.”

²⁸ Kale Danieli oyo ebintu byaba nga bimujiira bukalamu mu biseera Dario Omumedi, ni Kuro Omuperusi, bye baafugiramu.