Danieli 5 - Baibuli Ekibono kya Katonda 2014

Embaga ya Beleshazzari

¹ Lwali lulala, kyabazinga Beleshazzari yaafumbira abakungu be abaghera olukumi (1,000) embaga enene, era yaanhwa nabo omwenge ogw'emizabbibu.

² Beleshazzari bwe yanhwa omwenge n'aghezaamu, yaalagira baje baleete ebikopo bya zaabu n'ebya feeza, lata we Nebukadinezzari bye yatoola mu isinzizo e Yerusalemu olwo nga Beleshazzari oyo ayenda, mwene, n'abakungu be, ni bakazi be ab'omu ndhu n'ab'embali, babinhweremu.

³ Agho baaja baaleeta ebikopo bya zaabu Nebukadinezzari bye yatoola mu isinzizo, endhu ya Katonda mu Yerusalemu. Kyabazinga mwene, n'abakungu be, ni bakazi be ab'omu ndhu n'ab'embali, baabinhweramu.

⁴ Baanhwa omwenge era baasaaka ebisinzibwa ebitali Katonda abyakolebwa mu zaabu, ni mu feeza, ni mu kyuma eky'ekikomo, ni mu kyuma ekigumu einho, ni mu miti, ni mu mabaale.

⁵ Baaja okulinga bati nga babona omukono ogw'omuntu oguli kughandiika ku seminti ye baakuba ku kimante eky'ekisaagaati kya kyabazinga. Omukono ogwo gwali guli kughandiika gha mberi gh'ekikondo eky'entaala, era kyabazinga yaabona bukalamu nga guli kughandiika.

⁶ Agho kyabazinga amaiso gaamumyuka, yaatya inho, amagulu gaamudhugumira, n'ebikiryaivu byakontagana.

⁷ Yaayasiikana yaayetesa abalaguzi, abasamize, ab'amaghembe, n'abo abeetegereza ebiri ku igulu. Abagezigezi abo ab'omu Babiloni bwe baatuuka, kyabazinga yaabakoba ati: “Omuntu yeenayeena anaasoma ekighandiiko ekyo, n'ankobera amakulu gaakyo, baidha kumuvaaza engoye edh'erangi ya nakasooma, bamute n'omukuufu ogwa zaabu mu nkoto, era bamukuze abe omufuzi ow'eidaala eryokusatu mu bwakyabazinga bwange.”

⁸ Agho abagezigezi abo boonaboona aba kyabazinga baaseeta, aye baaloba kusobola kusoma kighandiiko ekyo waire okukobera kyabazinga amakulu gaakyo.

⁹ Kyabazinga Beleshazzari yaayongera okutya einho, amaiso gaayongera okumumyuka, n'abakungu be baasoberwa.

¹⁰ Inhina wa kyabazinga bwe yawulira okwasiikana kwa kyabazinga n'okw'abakungu be okwali mu kisenge eky'embaga, yaingira mu kisenge ekyo. Inhina wa kyabazinga oyo yaakoba ati: “Isebantu kyabazinga, ghangaala byanda na byanda! Leka kutya inho otyo, na maiso kukumyuka gatyo.

¹¹ Mu bwakyabazinga bwo mulimu omusaadha aliku omwoyo ogwa bakatonda abatukuvu. Mu biseera bya lata wo kyabazinga Nebukadinezzari, omusaadha oyo yeeyoleka okuba omuntu alengera eghala, ng'ali n'okutegeera, era ng'ali n'amagezi agali ng'oti n'aga bakatonda. Era kyabazinga Nebukadinezzari oyo lata wo, yaamufuula okuba omukulu ow'abalaguzi, abasamize, ab'amaghembe, n'abo abeetegereza ebiri ku igulu.

¹² Omusaadha oyo akola ebintu n'obusobozi obubitirivu, ali n'amagezi, n'obukugu mu kuvuunula ebirooto, n'okwinhonhola amakulu ag'ebintu ebizibu ebyagisibwa. Kale ni ka beete Danieli oyo kyabazinga ye yatuuma eriina Beluteshazzari, oyo n'aidha okukukobera amakulu g'ekighandiiko ekyo.”

Danieli ainhonhola ekighandiiko

¹³ Agho baaleeta Danieli mu maiso ga kyabazinga. Kyabazinga yaamubuuza ati: “Niiwe Danieli, owundi ku bantu lata wange kyabazinga be yanhaga e Buyudaaya n'abaleeta eno?

¹⁴ Nawulira nga bakwogeraku bati oliku omwoyo gwa bakatonda abatukuvu, era bati weeyoleka okuba omuntu alengera eghala, ng'ali n'okutegeera, era ng'ali n'amagezi agabitiriire.

¹⁵ Mpegaano mbaire naakamala okwetesa abagezigezi n'abasamize, era baabandeetera ghano basome ekighandiiko ekyo, bankobere n'amakulu gaakyo, aye tibasoboire kuzuula makulu ago.

¹⁶ Aye mpuliire mbu iwe osobola okuvuunula amakulu ag'omunda einho n'okwinhonhola ebintu ebizibu ebyagisibwa. Kale bw'onaasobola okusoma ekighandiiko ekyo, n'onkobera amakulu gaakyo, baidha kukuvaaza engoye edh'erangi ya nakasooma, bakute n'omukuufu ogwa zaabu mu nkoto, era bakukuze obe omufuzi ow'eidaala eryokusatu mu bwakyabazinga bwange.”

¹⁷ Agho Danieli yaamwiramu ati: “Isebantu kyabazinga, ebirabo byo bisigaze iwe mwene, oba obighe omuntu owundi. Aye nze ndidha kukusomera ekighandiiko ekyo, nkukobere n'amakulu gaakyo.

¹⁸ “Kale ni Isebantu kyabazinga, wulira: oyo Ali Ghaigulu Yeene yagha lata wo Nebukadinezzari okuba kyabazinga omukologho, ow'ekitiisa, era ow'amaani.

¹⁹ Era olw'okuba yamugha okuba omukologho, ekyo kyaleetera abantu boonaboona, abava mu maghanga goonagoona, era aboogera enimi dhoonadhoona, okumutyanga n'okudhugumiranga mu maiso ge. Oyo ye yayendanga okwita ng'amwita, ate ye yayendanga okulekagho ng'akaali mulamu ng'amulekagho ng'akaali mulamu. Oyo ye yayendanga akugha ekitiisa ng'akimugha, ate ye yayendanga okukimutoolaku ng'akimutoolaku yaamuleetera okunhoomebwa.

²⁰ Aye bwe yatoolera okwekuluntaza, n'akalangusa omwoyo gwe nga takaagondera biragiro, Katonda oyo yaamutoola ku kityamo kye eky'obwakyabazinga, era yaamutoolaku n'ekitiisa kye yali nakyo.

²¹ Era yaamubinga yaamutoola mu bantu, ebidhuubo bye byafuulibwa ng'eby'ensolo, yaatoolera okubanga mu nsiko ghalala n'endogoyi edh'omu nsiko, yaalyanga eisubi ng'oti nte, n'omusulo oguva ku igulu gwamukubanga yaabola. Byaba bityo okutuusa lwe yamanha ng'oyo Ali Ghaigulu Yeene n'afuga obwakyabazinga obw'abantu. Era ng'abugha oyo y'ayenda yeenayeena.

²² “Aye iwe Beleshazzari, mutabane we, weena tiweewombeeseeku naire, waire ng'ebyo byonabyona wabimanha.

²³ Weekuluntaliiza ku Musengwa ow'eigulu. Waalagira baaleeta ebikopo ebyatoolebwa mu isinzizo lye, olwo iwe mwene n'abakungu bo, ni bakazi bo ab'omu ndhu n'ab'embali, mwabinhweramu omwenge ogw'emizabbibu. Era mwasaaka ebisinzibwa ebitali Katonda, ebitabona, waire okuwulira, oba okutegeera, bye baakola obw'omu zaabu, ni mu feeza, ni mu kyuma eky'ekikomo, ni mu kyuma ekigumu einho, ni mu miti, ni mu mabaale. Aye mwaloba kuta kitiisa mu Katonda oyo agemereire obulamu bwaimwe era abalabirira mu buli nsambo.

²⁴ Kale kyaviire n'atuma omukono ogwo okwidha okukola ekighandiiko ekyo.

²⁵ “Bino n'ebighandiikiibwa: ‘OKUBALA, OKUBALA, OKUPIMA, OKUGABANIA.’

²⁶ Amakulu gaabyo ni gano: ‘OKUBALA,’ Katonda amaze okubala enaku edh'obwakyabazinga bwo, yaabona nga dhiwoireku.

²⁷ ‘OKUPIMA,’ Katonda akupimye ku minzaani, yaabona ng'oli muwewere inho, okaabulaku.

²⁸ ‘OKUGABANIA,’ obwakyabazinga bwo abugabainiamu ghabiri, yaabugha Abamedi n'Abaperusi.”

²⁹ Agho Beleshazzari yaalagira baavaaza Danieli engoye edh'erangi ya nakasooma, baamuta n'omukuufu ogwa zaabu mu nkoto, era yaamukuza okuba omufuzi ow'eidaala eryokusatu mu bwakyabazinga.

³⁰ Obwire bwene obwo Beleshazzari oyo, kyabazinga Omubabilonia, yaitibwa.

³¹ Dario Omumedi, yaafuuka kyabazinga wa Babilonia ng'agheza emyaka oti nkaaga n'ebiri egy'obukulu.