Danieli 3 - Baibuli Ekibono kya Katonda 2014

Nebukadinezzari alagira boonaboona okusinza ekiwumbe ekya zaabu

¹ Kyabazinga Nebukadinezzari yaalagira baakola ekiwumbe ekya zaabu, nga mu buleeyi kigheza mita amakumi abiri na musanvu, ate mu bugazi kyagheza mita isatu. Era yaalagira baakita ku museetwe ogw'e Dura, mu kiketezo eky'e Babiloni.

² Agho yaalagira beete abakungu be boonaboona, babeegho ku mukolo ogwigulagho okusinza ekiwumbe ekyo. Bano n'abakungu abaayetebwa: ab'amasaza ni bakatuukiro baibwe, n'ab'amagombolola, n'abawi b'amagezi, n'abaghanika, n'abalamuzi, n'abanamateeka, n'abafuzi boonaboona ab'omu biketezo.

³ Kale abakungu abo boonaboona beesoloza, baayemerera mu maiso ag'ekiwumbe ekyo kyabazinga Nebukadinezzari kye yataagho.

⁴ Agho omulangirizi yaalangirira mu mamiro ag'amaani ati: “Imwe abantu mwenamwena, abava mu maghanga goonagoona, era aboogera enimi dhoonadhoona, kyabazinga ali kubalagira ati,

⁵ bwe munaawulira okuvuga okw'endeka, n'endere, n'endingidi, n'endongo, n'entongooli, n'ebivuga ebindi, nga mweyala ghansi okusinza ekiwumbe kya zaabu ekyo kyabazinga Nebukadinezzari kye yataagho.

⁶ Era kiisi anaaloba okweyala ghansi okukisinza, baidha kumusuula mangu ago mu kikoomi ekiri kugeigera omuliro.”

⁷ Kale abantu boonaboona, abava mu maghanga goonagoona, era aboogera enimi dhoonadhoona, bwe baawulira okuvuga okw'endeka, n'endere, n'endingidi, n'endongo, n'entongooli, n'ebivuga ebindi, beeyala ghansi okusinza ekiwumbe kya zaabu ekyo kyabazinga Nebukadinezzari kye yataagho.

Abaisuka abasatu baine ba Danieli bavunaanibwa olw'obudheemu

⁸ Mu kiseera ekyo ghaabaagho Abababilonia, baidha baaseegha Abayudaaya aye nga bali kubaghaayiriza bughaayirize.

⁹ Baakoba kyabazinga Nebukadinezzari bati: “Isebantu kyabazinga, ghangaala byanda na byanda!

¹⁰ Iwe Isebantu wagha ekiragiro oti kiisi awulira okuvuga okw'endeka, n'endere, n'endingidi, n'endongo, n'entongooli, n'ebivuga ebindi, aidha kweyala ghansi asinze ekiwumbe kya zaabu ekyo.

¹¹ Era oti yeenayeena anaaloba okweyala ghansi okukisinza, baidha kumusuula mu kikoomi ekiri kugeigera omuliro.

¹² Kale ghaligho Abayudaaya bano, Shaduraka, ni Meshaki, ni Abedinego, iwe Isebantu kyabazinga be wagha bakolenga ku nsonga edh'endhawulo mu kiketezo eky'e Babiloni. Aye abantu abo tibagondera biragiro byo, era tibagheereza bakatonda bo waire okusinza ekiwumbe ekya zaabu kye wataagho.”

¹³ Agho Nebukadinezzari yaasungughala ekibitiriire, yaalagira baleete Shaduraka, ni Meshaki, ni Abedinego. Era baabaleeta mu maiso ge.

¹⁴ Yaababuuza ati: “Imwe, Shaduraka, Meshaki, ni Abedinego, obwo bwenebwene kituufu nti muloba okugheereza bakatonda bange waire okusinza ekiwumbe kya zaabu kye nataagho?

¹⁵ Mpegaano ni, oba nga olunaawulira muti okuvuga okw'endeka, n'endere, n'endingidi, n'endongo, n'entongooli, n'ebivuga ebindi, munaaba beetegefu okweyala ghansi musinze ekiwumbe kya zaabu kye nakola, olwo ghazira kabi kaidha kubatuukaku. Aye bwe munaaloba okukisinza, baidha kubasuula mangu ago mu kikoomi ekiri kugeigera omuliro. Ghaligho katonda yeenayeena anaabawonia nabatoola mu buyinza bwange?”

¹⁶ Shaduraka, Meshaki ni Abedinego baamwiramu bati: “Isebantu kyabazinga, tikitwetaagisa na kwewozaaku ku nsonga eyo.

¹⁷ Bwe kunaaba okutusuula mu muliro, Katonda waife ye tugheereza asobola bukalamu okutuwonia yaatutoola mu kikoomi ekiri kugeigera omuliro, era yaatutoola ni mu buyinza bwo.

¹⁸ Aye Katonda waife ni bw'aba nga taakole atyo, twenda okukumanhisa, iwe Isebantu kyabazinga, nga tituja kugheereza bakatonda bo waire okusinza ekiwumbe kya zaabu kye wataagho.”

Baine ba Danieli abasatu basalirwa ekibonerezo eky'okwitibwa

¹⁹ Agho Nebukadinezzari yaasungughala ekibitiriire, yaatungulira Shaduraka, ni Meshaki, ni Abedinego, amaiso. Yaalagira bakume ekikoomi kigeigere emikuzi musanvu okusinga bwe kigeigeranga buliidho.

²⁰ Era yaalagira abasaadha ab'amaani mu igye lye, basibe Shaduraka, ni Meshaki, ni Abedinego, babasuule mu kikoomi ekiri kugeigera omuliro.

²¹ Kale baabasiba nga bali mu bivaalo byaibwe: eky'oku ngulu, ekanzu, enkoofiira, n'ebivaalo byaibwe ebindi byonabyona. Baamala baabasuula mu kikoomi ekiri kugeigera omuliro.

²² Olw'okuba kyabazinga yalagira bakume ekikoomi kigeigere inho omuliro, enimi edh'omuliro dhaakomba dhaita abasaadha abaatwala Shaduraka, ni Meshaki, ni Abedinego, okubasuula mu kikoomi ekyo.

²³ Abasaadha abo bonsatule Shaduraka, ni Meshaki, ni Abedinego, baagwa mu kikoomi ekiri kugeigera omuliro nga basibe.

²⁴ Aye kyabazinga Nebukadinezzari yeewuunhia inho era yaasituka mangu ghe yali. Yaabuuza abakungu be ati: “Titwasibye abasaadha basatu ni tubasuula mu kikoomi ekiri kugeigera omuliro?” Baamwiramu bati: “Kituufu, Isebantu kyabazinga.”

²⁵ Yaakoba ati: “Aye lwaki ndi kubona abasaadha bana abali kutambulira ghagati mu muliro nga ti basibe, era nga baziraku kabi kabatuuseeku naire? Ate owokuna afaanana ng'oti malaika!”

Nebukadinezzari alekula abasaadha abo bonsatule era yaabakuza

²⁶ Agho Nebukadinezzari yaaseeta kumpi n'olwigi olw'ekikoomi ekiri kugeigera omuliro, yaayeta ati: “Shaduraka, Meshaki, ni Abedinego, imwe abagheereza ba Katonda Ali Ghaigulu Yeene, mufulume mwidhe ghano.” Era Shaduraka, ni Meshaki, ni Abedinego, baafuluma mu muliro.

²⁷ Ab'amasaza ni bakatuukiro baibwe, n'ab'amagombolola, n'abakungu ba kyabazinga abandi boonaboona, beesololeza aghaali abasaadha abo bonsatule. Baabona ng'omuliro ghazira kye gwakola ku mibiri gya basaadha abo bonsatule. Enviiri dhaibwe ku mitwe nga tidhaayokebwaku naire, waire ebivaalo byaibwe okuyaaku. Era ni beene nga tibawunha mwosi naire.

²⁸ Agho Nebukadinezzari yaakoba ati: “Katonda wa Shaduraka, ni Meshaki, ni Abedinego asaakibwe. Oyo n'atumye malaika we yaawonia abagheereza be bano abaamwesize, ni badheemera ekiragiro kyange nze kyabazinga. Bataire obulamu bwaibwe mu kabi, mu kifo ky'okugheereza n'okusinza katonda yeenayeena okutoolaku Katonda owaibwe.

²⁹ “Kale ni mpegaano ndi kugha ekiragiro nti: abantu boonaboona, abava mu maghanga goonagoona, era aboogera enimi dhoonadhoona, bwebanaayogera ekibi kyonakyona ku Katonda wa Shaduraka, ni Meshaki, ni Abedinego, ndidha kulagira babatemeteme, emigulu gigwe ghaagyo n'emikono gigwe ghaagyo. Era endhu dhaimwe baidha kudhizikiriza dhifuuke bifulukwa byereere; kuba ezirayo katonda asobola kuwonia bantu be mu nsambo ng'oti n'eyo.”

³⁰ Agho kyabazinga oyo yaakuza Shaduraka, ni Meshaki, ni Abedinego, baafuuka bakulu mu kiketezo eky'e Babiloni.