Danieli 12 - Baibuli Ekibono kya Katonda 2014

Ekiseera eky'enkomerero

¹ Malaika yaayongera okukoba ati: “Mu kiseera ekyo, Mikaeli, malaika oyo omukologho omukuumi w'abantu bo, aliboneka. Olwo ghalibaagho ekiseera ekizibu ekitabangaghooku kasookanga nsi dhibaagho. Era ekiseera ekyo bwe kirituuka, abantu bo abo beene maina agaliba nga gaaghandiikibwa mu kitabo kya Katonda, n'abalirokolebwa.

² Era bangi ku abo abali e magombe abaafa balizuukira, abandi baliba mu bulamu obutawaagho ate abandi baaba mu kuswazibwa n'okunhoomebwa okutakoma.

³ Abakulembeze abagezi balimesunkana ng'oti n'okumesunkana okw'oku igulu. N'abo abakyusa abantu ni bakola ebituufu balyakaayakana ng'oti muunienie ebyanda n'ebyanda.”

⁴ Agho yankoba ati: “Mperaano ni, iwe Danieli, wumbaku ekitabo ekyo okisibeku n'akamanhiso, okutuusa ku kiseera eky'enkomerero. Abantu kamaala balizungira eno n'ere nga benda okwongera ku bumanhi bwaibwe.”

⁵ Ebyo nga biwoire, naja okulinga nti nga mbona abantu abandi babiri nga beemereire ku mbali okw'omwiga, owundi ng'aguli ku luuyi olw'eno n'owundi yaaguba ku luuyi olw'ere.

⁶ Owundi ku abo yaabuuza malaika ole eyali avaire engoye empegheevu era eyali ere omwiga ye gwali guli kuviira, nti: “Bino ebyewuunhisa biribaagho kutuusa kiseera ki?”

⁷ Agho Malaika oyo eyali avaire ebivaalo ebighegheevu era eyali ere omwiga ye gwali guli kuviira, yaagololera emikono gye gyombi y'eigulu. Era naamuwulira ng'ali kulayira Katonda omulamu ebyanda n'ebyanda, ng'akoba ati: “Giriba emyaka esatu n'ekitundu. Abazigu bwebalikiriga abantu ba Katonda okutuusa okubamala amaani, ebintu ebyo byonabyona birituukirizibwa.”

⁸ Nze naawulira bye yakoba, aye nga tiri kubitegeera. Kale n'okumubuuza nti: “Musengwa wange, kiki ekiriva mu ebyo byonabyona?”

⁹ Yandhiramu ati: “Danieli, gema engira yo oje, kuba ebintu ebyo biidha kukuumibwa nga bya kyama era bikwekebwe okutuusa ku kiseera eky'enkomerero.

¹⁰ Abantu kamaala balinaazibwa, baatukuzibwa era baizibwa buyaaka. Aye ababi balyeyongera bwa kukola bibi, era ezira waire omulala ati ku babi abo alitegeera. Aye abagezi balitegeera.

¹¹ “Okuva abantu lwe balirekera okughaayo ebigheebwayo ebyokebwa ebya buli lunaku, ng'Ekyenhinhalwa Ekizikiriza kimaze okuteebwagho, ghalibaagho enaku lukumi na bibiri na kyenda (1,290).

¹² Ba nkabi abo abalisigala nga beesigwa okutuusa enaku olukumi n'ebisatu n'asatu n'eitaanu (1,335) lwe dhiriwaaku.

¹³ “Kale ni iwe Danieli, gema engira yo oje, osigale ng'oli mwesigwa okutuusa ku nkomerero. Era waire olifa, olimala waazuukira wagheebwa empeera yo mu kiseera eky'oluvainhuma.”