Danieli 11 - Baibuli Ekibono kya Katonda 2014

¹ Nze nali ku luuyi lwe era naamugumya, mu mwaka ogwasooka nga kyabazinga Dario Omumedi n'afuga.

² Mperaano nja kukukobera amazima.” Agho malaika oyo yaayongera okukoba ati: “Bona, ghalisitukagho bakyabazinga abandi basatu mu nsi Perusia baagifuga. Era ghaamala ghaasitukagho kyabazinga owokuna, aliba omukombe einho okusinga abo boonaboona. Oyo bw'alimala okufuuka ow'amaani olw'obukombe bwe, alisiikuula abantu okulwanisa obwakyabazinga bw'e Bugureki.

Obwakyabazinga bwa Misiri n'obwa Siria

³ “Olwo ghalisitukagho kyabazinga ow'amaani alifuga ekiketezo ekinene einho, era nga ky'ayenda ky'akola.

⁴ Aye oyo bw'alimala okwenhweza mu buyinza, obwakyabazinga bwe balibumenhagho era baabwawulamu mu ndhuyi eina edhiri ghansi gh'eigulu. Tibalibugha ba izaire lye, waire okubufuga n'obuyinza nga bwe yali nabwo; kuba obwakyabazinga bwe balibusalasalamu bwatwalibwa abantu abandi abatali ba izaire lye.

⁵ “Kyabazinga wa Misiri aliba wa maani, aye owundi ku bakungu be aliba wa maani inho n'okumusinga. Era omukungu oyo alifuga ekiketezo ekinene einho eky'obwakyabazinga, okusinga kyabazinga oyo ky'aliba afuga.

⁶ Nga ghabiseeghooku emyaka, kyabazinga wa Misiri alitaagho enkolagana ni kyabazinga wa Siria. Era olw'okunhweza enkolagana eyo alighaayo mughala we, aje afumbirwe kyabazinga wa Siria oyo. Aye obufumbo obwo tibulighangaala naire. Omughala oyo aliitibwa ghalala n'iba, n'omwana we, n'abagheereza abaliba bamugherekeireku boonaboona. Aye mu kiseera ekyo,

⁷ owundi ku b'oku nda omughala oyo mw'asimuka, alifuuka kyabazinga. Yaaja yaalumba eigye lya kyabazinga wa Siria, yaingira mu kifo kya kyabazinga oyo eky'okwewogomamu, era yaabalwanisa yaabaghangula.

⁸ Alinhaga ebifaananie bya bakatonda baibwe eby'ekyuma ekisaanuusiibwa, yairayo nabyo e Misiri ghalala n'ebintu bye bakozesa mu isinzizo eby'omughendo, ebya feeza ni zaabu. Alibisaagho emyaka nga talumba kyabazinga wa Siria.

⁹ Nga ghabiseegho emyaka egyo, kyabazinga wa Siria alirumba kyabazinga w'e Misiri, aye yaamala yairayo mu nsi ye.

¹⁰ “Batabane ba kyabazinga wa Siria oyo balitegeka okulwana olutalo, baasoloza eigye einene einho. Eigye eryo liriidha nga liri kubanda bubande ng'oti n'amaadhi ag'omwidhuzo, lyataalaala mu nsi eyo era lyatuukira irala ni mu kifo kya kyabazinga eky'okwewogomamu.

¹¹ Agho kyabazinga wa Misiri alivaayo n'obusungu yaaja okulwana ni kyabazinga wa Siria, yaaghangula eigye lya kyabazinga oyo einene einho.

¹² Bw'alimala okughangula eigye einene lityo, alyewulira mule nga wa maani, era aliita enkumi n'enkumi edh'abantu. Aye obughanguzi bwe tibulirwagho naire.

¹³ “Kyabazinga wa Siria aliirayo yaasoloza eigye erindi einene okusinga lire eryasooka. Era nga ghabiseegho emyaka, aliira n'eigye ery'amaani n'eby'okulwanisa kamaala.

¹⁴ Era mu biseera ebyo abantu kamaala balisituka okulwanisa kyabazinga w'e Misiri. Era, Danieli, abantu abakambwe okuva mu nsi yo baligezaaku okudheema olw'okubonekerwa kwe balibonekerwa, aye tibalisobola.

¹⁵ Agho kyabazinga wa Siria aliidha yaabungisa emungo y'eitaka ku kimante ekigumu ekyezungulwire ekibuga, ey'okuniiniraku okukirwanisa, era yaakigema. Abaisirukale ab'omu igye ly'e Misiri baliba tibakaasobola kulwana. Ni bwebaba bale beene abasingiramu irala okulwana, tibaliba na maani gamala kwongera kulwana.

¹⁶ Olwo kyabazinga wa Siria aliba ng'alumbye, alikola nga bw'ayenda nga ghazira amulobera naire. Alyemerera mu Nsi ey'Ekitiisa, era ensi eyo yoonayoona eriba mu buyinza bwe.

¹⁷ “Kyabazinga oyo alikola entegeka, yaidha n'eigye ery'ensi ye lyonalyona nga mumalirivu okulumba. Alikola endagaano ey'emiraala ni kyabazinga w'e Misiri, era yaamugha mughala we amufumbirwe, olw'okwenda okuzikiriza obwakyabazinga bwe. Aye entegeka ye terimuyamba waire okutuukirira.

¹⁸ Ebyo nga biwoire, alija yaalumba ebiketezo eby'oku nhandha era yaaghangula bingi ku byo. Aye ghalibaagho omuntu aliidha n'aduumira eigye, n'aghangula kyabazinga wa Siria oyo okumulekeza okwekuluntaza kwe. Era alimwesasuulizaaku olw'okwekuluntaza kwe okwo.

¹⁹ Agho kyabazinga oyo alikyusa yairayo mu bifo eby'okwewogomamu eby'omu nsi ye. Aye balimughangula era eyo n'eriba enkomerero ye.

²⁰ “Ghalisitukagho kyabazinga owundi yaasikira oyo, era yaatuma omukungu we okuja okubinika abantu emisolo olw'okwenda okukombaghaza obwakyabazinga bwe. Aye mu kiseera ekitali kireeyi kyabazinga oyo balimwita aghazira nkaayana oba olutalo.”

Kyabazinga omubi owa Siria

²¹ Agho malaika yaayongera okwinhonhola ati: “Kyabazinga wa Siria aliiragho mu kifo ky'oyo, aliba muntu anhoomebwa era atagwanira kuba kyabazinga naire. Alirebereza abantu, yaabalimbalimba, yaabaikirizisa nga tibaidhi, baaja okweidhuukiriza ng'afuuse kyabazinga.

²² Alyeyaagho yaazikiriza kiisi muntu yeenayeena aligezaaku okumulwanisa, ni bw'aliba Omukulu wa Bakabona ba Katonda.

²³ Alirimbalimba abamaghanga agandi yaakola nabo endagaano, era yaafuuka wa maani, waire nga mwene aliba afuga kasi katono.

²⁴ Alirumba abantu b'omu biketezo ebisingamu kuba na bukombe, nga tibeetegeike naire. Era alikola ebintu ba ise ni badhaadha be bye bataakola. Yaagabania mu bantu be abamwikiririzaamu, omunhago ogw'ebintu n'ogw'abantu gw'alinhaga mu ntalo. Alikola entegeka okulumba ebifo eby'okwewogomamu, aye ekiseera kye kiriwaaku mangu.

²⁵ “Alisoloza eigye einene yaalitendeka n'obumalirivu, aje alirumbise kyabazinga w'e Misiri. Ni kyabazinga w'e Misiri oyo yeena alyetegeka okwerwanaku n'eigye einene ery'amaani einho, aye talighangula, kuba balimulyamu olukwe baamugemya.

²⁶ Abo beenebeene b'alya nabo ku kiiwulo, n'abalimuzikiriza. Balireetera abazigu be okughangula eigye lye, era baita abaisirukale be.

²⁷ Mu birowoozo bya bakyabazinga abo bombi, mulibaamu kintu kirala kya kukolaganaku bulabe kyonka. Buli muntu aliguya mwine, ate nga batyaime ku kiiwulo kirala. Aye bye benda tibalibifuna, kuba ekiseera Katonda kye yategeka okubituukirizaamu kiriba kikaali.

²⁸ Agho kyabazinga wa Siria aliirayo mu nsi ye ng'akukumbye omunhago omungi einho, era nga mumalirivu okumalagho mu bantu omwoyo ogw'okusinza Katonda. Alikola byonabyona nga bw'alyenda, memale yairayo mu nsi ye.

²⁹ “Ekiseera Katonda kye yategeka bwe kirituuka, kyabazinga wa Siria kabiri aliira yaalumba ensi Misiri. Aye ku mukuzi ogwo ebintu tibirimujiira nga ku lule,

³⁰ kuba abantu ab'e Rom balimwidhira nga bali mu maato, yaatya era yaaloba kweyongerayo. “Agho alikyuka okwirayo, yaamalira obusungu bwe ku kulekeza bantu kusinza Katonda, ng'ajiira ku magezi g'abo abaava eira ku kusinza Katonda.

³¹ Abaisirukale be balija baayonoona eisinzizo n'ebifo byalyo eby'okwewogomamu, baalireetera okuba nga ti irongoofu. Balirekeza abantu okughaayo ebigheebwayo ebyokebwa ebya buli lunaku, baataagho Ekyenhinhalwa Ekizikiriza.

³² Kyabazinga oyo aliwooyawooya era yaasuutiriza abo abaava eira ku kusinza Katonda. Aye abo abaidhi Katonda waibwe obukalamu, balisigala nga bagumu era beerwanaku.

³³ Abakulembeze abagezi mu ighanga balyegeresa abantu kamaala baaba bategeevu, waire nga ghalibitagho ekiseera ng'abandi ku bakulembeze abo baitibwa mu ntalo, abandi baayokebwa omuliro baafa, abandi baatwalibwa mu bunhage, n'abandi baanhagibwaku ebyaibwe.

³⁴ Mu kiseera ekyo ng'okwitibwa kukaaja mu maiso, abantu ba Katonda baliyambibwa katono inho. Era ghaligho abalibeeyimbaku, aye nga baidhwire nkwe.

³⁵ Abandi ku bakulembeze abagezi abo baliitibwa. Olwo okwitibwa kwaibwe okwo kwaleetera abantu okwamulwa, baatukuzibwa era baafuulibwa balongoofu. Ekyo kiribaagho okutuusa ekiseera eky'enkomerero Katonda mwene kye yategeka nga kimaze okutuuka.

³⁶ “Kyabazinga wa Siria oyo alikola nga bw'ayenda, yeegulumiza era yeekudumbaza ng'alowooza ati n'asinga bakatonda boonaboona. Alyogera ebintu ebitiisa einho ku Katonda asinga bakatonda boonaboona. Era ebintu birimujiira bukalamu okutuusa Katonda lw'alimumaliraku obusungu bwe kuba Katonda oyo kye yategeka kiri n'okutuukirira.

³⁷ Kyabazinga oyo talifaayo ku bakatonda ba badhaadha be, waire okufaayo ku katonda abakazi ye basinza, oba okufaayo ku katonda owundi yeenayeena; kuba alyekudumbaza ng'alowooza ati n'abasinga boonaboona.

³⁸ Mu kifo eky'okuta mu bakatonda abo ekinhagansi, ekinhagansi ekyo alikita mu katonda akuuma ebifo eby'okwewogomamu, badhaadha be ye bataamanhaku naire. Alighaayo ye katonda oyo ebigheebwayo ebya zaabu, ni feeza, n'amabaale ag'omughendo, n'ebintu ebindi eby'omughendo.

³⁹ Alikozesa abantu abasinza katonda oyo omugwira, okumukuumira ebifo bye eby'okwewogomamu. Era abo boonaboona abamwisaamu ekitiisa, alibakuza yaabagha ebifo eby'ebitiibwa, yaabafuula bafuzi ba bantu kamaala era yaabagha n'eitaka ng'empeera.

⁴⁰ “Ekiseera eky'enkomerero eya kyabazinga wa Siria bwe kiriba nga kiri kumpi kutuuka, kyabazinga w'e Misiri alimulumba. Era kyabazinga wa Siria oyo aliziinhuuka okuja okumulwanisa ng'oti n'empewo eyeezungulula n'amaani bw'eidha. Alikozesa ebigaali eby'omu lutalo, n'abalwani ab'oku mbalaasi, n'amaato kamaala. Aliidha n'eigye lye eryo, lyalumba ensi kamaala nga liri kubanda bubande ng'oti n'amaadhi ag'omwidhuzo, era lyataalaalira mu nsi edho.

⁴¹ Alirumba n'Ensi ey'Ekitiisa, yaita enkumi n'enkumi edh'abantu. Aye ensi dhino dhirimuwona: ey'Abaedomu, n'ey'Abamoabu, n'ekitundu ekisinga bunene eky'ensi ey'Abammoni.

⁴² Bw'alirumba ensi edho dhoonadhoona, n'ensi Misiri yoona terimuwona.

⁴³ Alitoola eby'obukombe bya Misiri ebyaterekebwa, omuli zaabu, ni feeza, n'eby'omughendo ebindi. Era alighangula Libya ni Ethiopia.

⁴⁴ Aye amawulire agaliva e buvandhuba ni ku luuyi olw'omukono omugooda olw'e buvandhuba galimutiisa inho, yaalwana n'obusungu bungi, yaita era yaasaaniagho abantu kamaala.

⁴⁵ Alisimba weema dhe enkologho edh'obwakyabazinga, ghagati gh'enhandha n'olusozi olutukuvu oluliku eisinzizo. Aye ate alituuka okufa nga ghazira n'amuyamba.”