Danieli 1 - Baibuli Ekibono kya Katonda 2014

Danieli ni baine 1:1—6:28 Abayudaaya abaakaisuka batwalibwa mu kisaagaati kya Nebukadinezzari

¹ Mu mwaka ogwokusatu nga kyabazinga Yehoiakimu n'afuga Buyudaaya, kyabazinga Nebukadinezzari ow'e Babilonia yaalumba ekibuga Yerusalemu n'eigye lye, yaakizingiza okukyezunguluza.

² Musengwa yaaghaayo kyabazinga Yehoiakimu owa Buyudaaya mu buyinza bwa Nebukadinezzari ghalala n'ebindi ku bintu ebyakozesebwanga mu isinzizo lya Katonda. Nebukadinezzari yaabitwala mu nsi Shinari mu isabo lya katonda we, yaabita mu iterekero ery'eisabo eryo.

³ Kyabazinga Nebukadinezzari yaalagira Ashipenazi eyali akulira bagheereza baine abalaawe, alonde mu Baisiraeli abaaleetebwa mu bunhage, atoolemuuku abaisuka ab'oku lulyo olulangira n'abandi ku batabane b'abakungu.

⁴ Abaisuka abo baali n'okuba nga baziraku kikyamu kyonakyona, nga baboneka bulungi, nga bali n'obukugu mu bye bakola, nga bagezi, nga beega mangu, era nga basobola okugheereza mu kisaagaati kya kyabazinga. Era baali n'okusomesebwa empandiika n'endhogera ey'olulimi Olubabilonia.

⁵ Kyabazinga yaalagira buli lunaku babaghenga ku mere mwene ye yalyangaku, ni ku mwenge ogw'emizabbibu mwene gwe yanhwangaku. Era yaalagira babasomese okumala emyaka esatu, memale babandhuleyo ye kyabazinga bamugheerezenga.

⁶ Mu baisuka abaalondebwa n'omwali Danieli, Hanania, Mishaeli ni Azaria, ab'omu kika kya Yuda.

⁷ Agho eyali akulira bagheereza baine abalaawe yaatuuma abaisuka abo amaina agandi: Danieli yaamutuuma Beluteshazzari, Hanania yaamutuuma Shaduraka, Mishaeli yaamutuuma Meshaki, ni Azaria yaamutuuma Abedinego.

⁸ Aye Danieli yaasalagho obutalya ku mere kyabazinga mwene ye yalyangaku, waire okunhwa ku mwenge ogw'emizabbibu gwe yanhwangaku, olwo alobe kwereetera kuba atali mulongoofu. Kale yaasaba Ashipenazi eyali akulira bagheereza baine abalaawe amuyambe.

⁹ Agho Katonda yaaleetera Ashipenazi okugonza Danieli n'okumugemerwa ekivunika.

¹⁰ Aye Ashipenazi oyo yaakoba Danieli ati: “Ntya nti musengwa wange kyabazinga eyalagira bye munaalyanga ni bye munaanhwanga, bw'ababona nga timuboneka bulungi ng'oti ni baisuka banaimwe abandi bwe baboneka obulungi, olwo obulamu bwange asobola okubutuusaaku akabi.”

¹¹ Agho Danieli yaaja y'omukuumi, Ashipenazi oyo ye yataagho okubalabiriranga; mwene Danieli, Hanania, Mishaeli ni Azaria. Danieli yaamukoba ati:

¹² “Nkweghembye ganha otugezese ife abagheereza bo okumala enaku ikumi, ng'otughanga bwa bya kulya biva ku bisimbe byonka era nga tunhwanga bwa maadhi gonka.

¹³ Olwo omale ogerangeranie emboneka yaife ku mboneka y'abaisuka abanaabanga nga balya ku mere kyabazinga mwene y'alyaku. Memale osalegho eky'okukola ng'ojiira ku mboneka ye tuliba tubonekamu.”

¹⁴ Omukuumi oyo yaakola kye baamusaba, yaabagezesa okumala enaku ikumi.

¹⁵ Enaku eikumi bwe dhaawaaku, abaisuka abo baaba nga baboneka bulungi era nga banherengeta okuwula abaisuka bale abaalyanga ku mere kyabazinga mwene ye yalyangaku.

¹⁶ Okuva olwo, omukuumi oyo eyabalabiriranga yaabatoola ku mere kyabazinga mwene ye yalyangaku ni ku mwenge ogw'emizabbibu gwe yanhwangaku, yaaja mu maiso n'okubaghanga eby'okulya ebiva ku bisimbe byonka.

¹⁷ Katonda yaagha abaisuka abo abana okwega n'okukuguka mu mpandiika edha buli nsambo, ni mu magezi aga buli nsambo. Ate Danieli yaamwongeraku okutegeera ebibaagho mu kubonekerwa, n'okuvuunula ebirooto.

¹⁸ Ekiseera eky'emyaka esatu kyabazinga Nebukadinezzari kye yalagira okusomekezangamu abaisuka bwe kyawaaku, Ashipenazi eyakuliranga bagheereza baine abalaawe yaatwala abaisuka boonaboona ye kyabazinga Nebukadinezzari oyo, yaabamwandhulira.

¹⁹ Kyabazinga yaayogera nabo, era mu boonaboona yaasinga kusiimamu Danieli, ni Hanania, ni Mishaeli ni Azaria. Kale abo abana, kyabazinga yaabalondamu bamugheerezenga.

²⁰ Kiisi kibuuzo kyabazinga kye yababuuzanga nga kigema ku magezi ni ku kutegeera, ng'abana abo basingira ghala emikuzi ikumi abalaguzi boonaboona n'abasamize abaali mu bwakyabazinga bwe bwonabwona, okukiiramu.

²¹ Danieli yaasigala ng'akaagheereza kyabazinga okutuukiza irala mu mwaka ogusooka ogwa kyabazinga Kuro.