Amosi 9 - Baibuli Ekibono kya Katonda 2014

Musengwa Katonda abonereza Abaisiraeli

¹ Nabona Musengwa Katonda ng'ayemereire ku mbali kw'alutaari, era yaalagira ati: “Kuba emitwe egy'empagi edh'eisinzizo okutuusa lwe linaatengeeta. Era menha emitwe egy'empagi edho dhikube emitwe egy'abantu boonaboona. Abo abataafe mu nsambo eyo, ndidha kubasindika bafiire mu lutalo. Ku abo ezira aja kulumukagho waire okuwonagho.

² Waire basima baatuuka e magombe, ndidha kubatuukaku mbatooleyo. Era waire baniina baatuuka mu igulu, ndidha kubaghanulayo.

³ Ni bwe balyegisa ghaigulu ku lusozi Karumeli, era nja kubaagala mbatuukeku mbatooleyo. Ni bwe balyegisa ghansi ku ntobo ey'enhandha, era nja kulagira ogusota gwamu gubalume.

⁴ Ni bwebalitwalibwa abazigu baibwe mu bunhage, era nja kulagira abantu babaite. Mmaliriire okubakola akabi, se ti kubayamba.”

Musengwa Katonda aiza Abaisiraeli buyaaka

⁵ Musengwa Katonda afuga amagye agema ku nsi, ensi yaatengeeta n'abantu boonaboona baagemwa enaku. Ensi esiikuuka yeefuukuula ng'oti n'omwiga Kiyira.

⁶ Musengwa Katonda oyo azimba endhu ye eyo ghaigulu mu igulu, era ghaigulu gh'ensi yataagho eibanga. Yaayetesa amaadhi ag'omu nhandha, yaagafuka ku bukalu. Eriina lye ni Musengwa Katonda.

⁷ Musengwa Katonda akoba ati: “Imwe Abaisiraeli, mulowooza muti muli ba ndhawulo ku Baethiopia? Kituufu imwe nabatoola mu Misiri mu bwiru, aye n'Abafilisiti boona nabatoola mu Kafutori, n'Abasiria naabatoola mu Kiri.

⁸ Bona eno, nze Musengwa Katonda ntaire eriiso lyange ku bwakyabazinga bwaimwe Abaisiraeli obwonooni. Era ndidha kubuzikiriza buve ku nsi kuno. Aye tiidha kuzikiriza nda ya Yakobo kugimaliriragho.

⁹ “Ndidha kulagira abazigu bakunguute Abaisiraeli nga bali eyo mu maghanga, ng'oti n'omuntu bw'akunguuta engaano mu kakunguuto, era ezira mubi aja kubitira.

¹⁰ Ababi boonaboona baja kwitibwa mu lutalo abo abeekiina nga bakoba bati, ‘Katonda taidha kuganha kibi kyonakyona kututuukaku.’ ”

Ebirungi Musengwa Katonda by'asuubiza Isiraeli

¹¹ Musengwa Katonda akoba ati: “Olunaku lwidha kutuuka ndhizeegho obwakyabazinga bwa Daudi, nga bwe bwalinga mu biseera Daudi mwe yabeera kyabazinga kuba buti buli ng'oti n'endhu eyagwa. Kale nja kuzimba ebimante byayo buyaaka, ngiizeegho nga bwe yalinga eira.

¹² Olwo Abaisiraeli baghangule ebiketezo by'ensi Edomu ebisigairegho, ghalala n'amaghanga agandi goonagoona agaali gamanhiibwa nga gange, nga gafugibwa Baisiraeli.” Atyo Musengwa Katonda bw'akoba, aja okutuukiriza ekyo.

¹³ Musengwa Katonda era akoba ati: “Bona eno, enaku dhiidha kutuuka, engaano ekule mangu okutuuka ku kukungulwa, nga n'abasizi bakaali kumala kusiga. Era emizabbibu giryenga mu bungi gyatuuka ni mu biseera eby'okusiga. Omwenge ogw'emizabbibu ogudhuudhuula guli kuuluula okuva ku nsozi ni mu busozi.

¹⁴ Ndidha kwirizaagho abantu bange Abaisiraeli ebirungi. Baidha kwiramu okuzimba ebibuga byaibwe ebyazikirizibwa era babityamemu. Baidha kusimbanga amasamba ag'emizabbibu, era banhwenga omwenge ogugivaamu. Baidha kulimanga emere era bagirye.

¹⁵ Ndidha kubafuula bataka mu nsi ye nabagha, era ezira aja kubasiguukulula kabiri.” Atyo Musengwa Katonda bw'akoba.