Amosi 8 - Baibuli Ekibono kya Katonda 2014

Okwolekebwa ekiibo eky'ebibala

¹ Kabiri Musengwa Katonda yandholeka bino: naja okulinga nti nga mbona ekiibo eky'ebibala ebituuse okulya.

² Yambuuza ati: “Amosi, kiki ky'oli kubona?” Naamwiramu nti: “Ndi kubona ekiibo eky'ebibala ebituuse okulya.” Agho Musengwa Katonda yankoba ati: “Ekiseera kituuse eky'okuzikiriza abantu bange Abaisiraeli. Tija kabiri kwirayo kukyusa kidhuubo kyange ni ndoba kubabonereza.

³ Ku lunaku olwo, edhibairenga enhembo dhe bembera mu isinzizo, dhirifuuka maliro. Ghalibaagho emirambo kamaala inho, nga giri kusuulibwa buli ghantu mu kasirise.” Musengwa Katonda atyo bw'akoba.

Katonda azikiriza Abaisiraeli

⁴ Imwe abatyankirira abateeghanga era ni muzikiriza abaavu mu nsi eno, muwulire bino:

⁵ Muja mwakoba muti: “Enaku enkulu dhiriwaaku li memale tutunde ku birime? Ni Sabbato enaawaku li memale tutunde engaano? Olwo tukendeeze ku bipimo, ate twongezeemu n'emighendo, tusibe minzaani tuseere be tuguza.

⁶ Tutunde n'obukaba obuva ku ngaano. Era tugule abaavu abatasobola kusasula mabandha agababandhibwa, waire okusasula omughendo ogugula omuyimbo gw'engaito, babe bairu baife.”

⁷ Musengwa Katonda, Katonda wa Isiraeli alayiire ati: “Bwenebwene tija kwerabira waire ekirala ku bikolwa byaimwe ebibi.

⁸ Olw'ebikolwa ebyo, ensi eritengeeta, n'abantu boonaboona baagemwa enaku ensi erisiikuuka, yeefuukuula ng'oti n'omwiga Kiyira.

⁹ Ku lunaku olwo, ndiragira endhuba yaagwa mu kasana ghagati, era naasindika enzikiiza yaagema ku nsi.” Musengwa Katonda atyo bw'akoba.

¹⁰ Era akoba ati: “Ndifuula ebibinuko byaimwe byaba mikolo gya kulira, n'enhembo dhaimwe dhaaba kugegenga. Ndibamwesaaku enviiri ku mitwe gyaimwe okudhimaliriraku ng'oti mpaata, naabaleetera okwesiba ebikaakaati mu nkende mwanakughala, mwaba ng'oti n'abazaire abafiiriirwa omwana waibwe omulenzi omulala bedengedenge. Olunaku olwo luliba lwa bulumi lwonalwona.

¹¹ “Bona eno, ekiseera kiidha kutuuka nsindike endhala ku nsi. Abantu baja kulumwa endhala ti lwa kubulwa mere, era bawulire endiwo ti lwa kubula maadhi, aye lwa kubulwa kibono ekiva ye nze Musengwa Katonda.

¹² Abantu balitambulatambula eyo batyo okuva ku nhandha okutuuka ku nhandha, n'okuva ku luuyi olw'omukono omugooda olw'e buvandhuba okutuuka ku luuyi olw'omukono omusaadha era olw'e buvandhuba. Balirumukira eno n'ere nga baagala ghe banaawulira ku kibono kyange, aye tighaliba ghe bakyagaana.

¹³ Ku lunaku olwo abaguna ababoneka obulungi, n'abaisuka ab'amaani, balizirika olw'endigho.

¹⁴ Abo abalayira emisambwa egy'e Samaria nga bakoba bati, ‘Wo katonda ow'e Dani omukulu.’ Oba bati, ‘Wo katonda ow'e Beerisheba omulamu,’ baja kugwa era balobe kwirayo kusituka.”