Amosi 6 - Baibuli Ekibono kya Katonda 2014

Okuzikirizibwa kwa Isiraeli

¹ Mukagwireku imwe abali obukalamu mu Sioni! Mukagwireku imwe abawulira emiraala nga muli eyo ku nsozi edh'e Samaria imwe abantu ab'ebitiisa mu ighanga eikologho ery'Abaisiraeli, imwe Abaisiraeli boonaboona ye baidha okunoonia obuyambi.

² Muje mukyalireku ekibuga Kalune. Era mukyalireku ni Hamathi ekikologho, era mutuukeku ni mu ky'e Gathi eky'abafilisiti. Ebibuga ebyo n'ebisinga obwakyabazinga bwa Isiraeli n'obwa Yuda mu bulungi n'obugazi?

³ Mukagwireku imwe abatwala olunaku olw'akabi okuba nga lukaali ghala inho, aye bye mukola ni byongera obwongere okuluseesa okumpi.

⁴ Mukagwireku imwe abalambaala mu buliri obw'amasanka, era mwegolomola mu miito, nga muli kulya emamba ye mutoire mu bisibo byaimwe eno ya ntaama, kabiri ere ya nte.

⁵ Mwembera ku ntongooli enhembo edh'ekigayaavu, era mweyiiyiza beene ebivuga ng'oti ni Daudi bwe yakola.

⁶ Munhwa amabuga amalamba ag'omwenge ogw'emizabbibu, era mwesiiga ebizigo ebisinga kuba birungi, aye mwaloba kulumirwa nsi Isiraeli ezikiriire.

⁷ Olw'ensonga eyo niimwe abalikulemberamu ku abo abalitwalibwa mu bunhage. N'ebibinuko byaimwe eby'ekigayaavu birikoma.

⁸ Musengwa Katonda afuga amagye, alayiire ati: “Neesiniirwa okwekuluntaza kw'Abaisiraeli, era endhu dhaibwe edhibeeyagaza tidhiinhoonha naire. Kye ndiva ni mpaayo ekibuga kyaibwe ekikulu n'ebikirimu byonabyona eri abazigu baibwe.”

⁹ Abantu eikumi bwebalyegisa mu ndhu endala okwewonia, era kwona balimala baafa.

¹⁰ Omuntu ali n'oluganda ku mufu era akola ku by'okuziika, bw'aliidha okutoola omulambo mu ndhu, alibuuza oyo aliba ng'akaasigairemu ati: “Eriyo omuntu owundi ali eyo n'iwe?” Ole alimwiramu ati: “Busa.” Olwo ono yaamukoba ati: “Sirika! Tulobe na kwogera ku liina lya Musengwa Katonda.”

¹¹ Bona eno, Musengwa Katonda bw'aliragira, endhu enkologho n'edho entono dhija kumenhebwamenhebwa dhisigale bumulumulu.

¹² Embalaasi dhisobola okulumukira ku mabaale ag'oku nsozi? Omuntu asobola okulima mu nhandha n'embago ey'ente? Aye imwe amazima mugafiiremu butwa, n'obutuufu mwabufuulaniafuulania.

¹³ Mweyagala mbu kuba mwagema ekibuga Lodebari, era mwesuuta nga mukoba muti: “Titwaghamba kibuga Karanaimu na maani gaife beene?”

¹⁴ Aye Musengwa Katonda Afuga Amagye akoba ati: “Imwe Abaisiraeli mubone eno, nja kubasindikaku eighanga libalumbe. Lirituntuza abantu okuviira irala ku mwiga Araba okutuuka ku Hamathi.”