Amosi 5 - Baibuli Ekibono kya Katonda 2014

Abaisiraeli bakubirizibwa okwenenia

¹ Imwe Abaisiraeli muwulire nze Amosi bwe ndi kubembamu olwembo olw'okubalira:

² “Isiraeli omughala omwegha agwire butasituka. Alekeibwa agho ku itaka nga yeegolomoire. Ghazira naire wa kumuyambaku okusitukagho!”

³ Kuba Musengwa Katonda akoba ati: “Ekibuga eky'omu Isiraeli ekirisindika abantu olukumi okulwana, kuliiraku kikumi kyonka n'ekyo ekirisindika abantu ekikumi, kuliiraku ikumi lyonka.”

⁴ Musengwa Katonda akoba Abaisiraeli ati: “Mwiremu okunsinza memale mubenga balamu.

⁵ Aye mutaja Betheli kunsinza, kuba kija kuwaagho. Oba okwingira mu Giligali, kuba ab'eyo bwenebwene baja kutwalibwa mu bunhage. Oba waire okuja e Beerisheba okunsinza.”

⁶ Muje musinze Musengwa Katonda memale mube abalamu. Aye bwe mutaaje kumusinza, aidha kutumbukira ku kibuga Betheli ng'oti muliro, gwokye Abaisiraeli nga guziraku n'aguzikiza.

⁷ Abantu imwe mukagwireku, kuba mufuulaniafuulania amazima, obutuufu mwabusuula ere.

⁸ Musengwa Katonda n'eyakola emuunienie edheetebwa Puleyadesi ni Orioni. Oyo afuula aghabaire enzikiiza ni ghaaka akasana. Yairugaza obubaire omusana bwafuuka bwire. Era yaayetesa amaadhi ag'omu nhandha yaagafuka ku bukalu. Eriina lye ni Musengwa Katonda.

⁹ N'oyo aleetera ab'amaani okuzikirira okw'ekibwatukira, n'ebifo byaibwe eby'okwewogomamu okusaanagho.

¹⁰ Abantu imwe, mukyagha omuntu abatakania olw'okusaliriza mu mbuga dh'amateeka. Era n'omuntu ayogera amazima abasina.

¹¹ Mutuntuza abaavu, era mwabakaka babaghe imwe engaano yaibwe. Kale ni waire mwazimba endhu edh'amabaale amabaadhe edh'omulembe, timulidhisulamu. Waire mwasimba amasamba ag'emizabbibu agasanhusa, timuja kunhwa ku mwenge gwamu

¹² kuba ndidhi ebibi byaimwe bwe byaga obungi, era naamanha emisango gye mwaiza bwe gyaga obunene. Mudaazadaaza abantu abatuufu, mwalya enguzi. Era mwafuulaniafuulania ensonga edh'abaghafu, mwabasaliriza mu mbuga dh'amateeka.

¹³ Kale omugezi asirika busirike mu biseera oti n'ebyo, kuba biseera bibi.

¹⁴ Mufubenga okukola obulungi era mweghalenga okukola ebibi, memale mubenga abalamu. Olwo Musengwa Katonda Afuga Amagye anaabanga n'imwe, nga bwe mukoba muti ali n'imwe.

¹⁵ Mukyaghe ebibi, mugonze ebirungi. Musalenga mu mazima mu mbuga dhaimwe edh'amateeka. Oba katyo Musengwa Katonda Afuga Amagye, yaakagemerwa abaliwonagho ku Baisiraeli ekivunika.

Okulira

¹⁶ Kale ni Musengwa Katonda Afuga Amagye kyava n'akoba ati: “Ghalibaagho okuwowoola mu mpya edh'ekibuga, ni mu nguudo dhaakyo dhoonadhoona, ng'abantu balira bati, ‘Woowe! Woowe!’ Abalimi ghalala n'abo abakola ogw'okugegenga, balyetebwa okukuba empungu n'okuwowoola.

¹⁷ Abantu baliwowoola mu masamba g'emizabbibu mu kifo eky'okuzaanha n'okuseka, kuba ndidha kubabonereza nze Musengwa Katonda mwene.”

¹⁸ Mukagwireku, imwe abenda einho olunaku lwa Musengwa Katonda lutuuke! Mulwenda lwaki? Tiruliba lunaku lwa isanhu, aye luliba lwa bizibu.

¹⁹ Kiriba ng'oti n'omuntu ali kulumuka ku mpologoma, kabiri n'ayagaanana n'ekisolo ekikambwe. Oba ng'oti n'omuntu angira mu ndhu ni yeesiira ku kimante, omusota ni gumumoodha omukono.

²⁰ Mudhuuba muti olunaku lwa Musengwa Katonda tiruliba lwa bizibu, aye luliba lwa isanhu? Luliba lwa bizibu oluziraku isanhu naire.

²¹ Musengwa Katonda akoba ati: “Nsiniirwa era tibona makulu mu bibinuko byaimwe. Era timuunhoonha naire, bwe mwesoloza okwidha okunsinza.

²² Ni bwe mumpa ebigheebwayo ebyokebwa, n'ebigheebwayo eby'emere ey'empeke, tiidha kubisiima. Ni bwe mulireeta ensolo dhaimwe empiite ensavu, ni mudhighaayo ng'ebigheebwayo olw'okutabagana, tija kubiringaku naire.

²³ Mulekere agho okundhasiikanira mbu munhembera. Era tiidha kuwulirisa kuvuga kwa ntongooli dhaimwe.

²⁴ Aye muleke amazima gabe ga mwero ng'oti maadhi, n'obutuufu bube ng'oti n'omwiga ogutakala.

²⁵ “Imwe Abaisiraeli, nze tyabasabaaku kundeeteranga misengo na bigheebwayo, emyaka amakumi ana (40) gye nababisa mu irungu.

²⁶ Aye buti olw'okuba musinza ebifaananie bya Sakkuthi, omusambwa gwaimwe gukyabazinga, n'ebya Kaiwani, omusambwa gwaimwe ogw'emuunienie, mulija n'ebifaananie ebyo bye mwekolera,

²⁷ ku lunaku lwe ndibaghaayo okutwalibwa mu bunhage mu nsi eri eyo ng'omaze okubisa Damasiko.” Atyo Musengwa Katonda bw'akoba, ayetebwa eriina, “Katonda Afuga Amagye.”