Amainhama 9 - Baibuli Ekibono kya Katonda 2014

Katonda akola endagaano ni Noa

¹ Katonda yaagha Noa n'abaana be enkabi, yaabakoba ati: “Muzaale, mwale, mwidhuze ensi.

² Buli nsolo, buli nhonhi, buli kyeghaluliza ku itaka era na buli kyanhandha ebyo byonabyona biidha kubatyanga. Byonabyona biteereibwa mu buyinza bwaimwe.

³ Kiisi kiramu ekitambula kinaabanga kya kulya kyaimwe byonabyona mbibaghaire, nga bwe nabagha n'ebimera.

⁴ Aye kye mutateekwa kulya, n'emamba ng'erimu omusaayi; kuba omusaayi n'obulamu.

⁵ Ole bw'anaazikirizanga obulamu obw'omuntu, aidha kuvunaanibwanga era abonerezebwe. N'ensolo dhoona dhiidha kubonerezebwanga olw'okuzikiriza obulamu obw'omuntu.

⁶ Omuntu yakolebwa mu mboneka ya Katonda: Kale ole bw'anaitanga omuntu, yeena aidhanga kwitibwa.

⁷ “Imwe muzaale era mwale, mwidhuze ensi era mugifuge.”

⁸ Agho Katonda yaakoba Noa ni batabane be ati:

⁹ “Bona, ndi kukola endagaano yange n'imwe, era n'eizaire lyaimwe erinairangagho

¹⁰ era na buli kiramu ekiri n'imwe, enhonhi, ensolo enfuge n'edh'omu nsiko, byonabyona ebyafuluma mu lyato.

¹¹ Ndi kukola endagaano yange n'imwe nti: ebiramu tibikairayo kuzikirizibwa mwidhuzo gwa maadhi kabiri, era omwidhuzo tigukairayo kubaagho kuzikiriza nsi kabiri.”

¹² Katonda yaakoba ati: “Kano n'akamanhiso akooleka endagaano ey'ebyanda n'ebyanda, ye ndi kukola n'imwe, era ni buli kitonde ekiramu ekiri n'imwe:

¹³ ndi kuta akalaso kange mu bire, kabe akamanhiso akooleka endagaano ye nkoze n'ensi.

¹⁴ Kale bwe nnaaleetanga ebire ku nsi, akalaso ako ni kaboneka mu bire,

¹⁵ ndidha kwidhukiranga endagaano yange ye nkoze n'imwe, era ye nkoze na buli kitonde ekiramu. Era amaadhi tigakairamu kufuuka mwidhuzo kabiri okuzikiriza ebiramu byonabyona.

¹⁶ Bwe kanaabonekanga mu bire, ndidhanga kukalingaku ndidhukire endagaano etawaagho ye nkoze na buli kitonde ekiramu kyonakyona ekiri mu nsi.

¹⁷ Ako n'akamanhiso akooleka endagaano ye nkoze n'ebiramu byonabyona ebiri ku nsi.”

Noa ni batabane be

¹⁸ Batabane ba Noa abaafuluma mu lyato ni bano: Shemu, Hamu ni Yafethi. Hamu oyo n'eyazaala Kanaani.

¹⁹ Abo bonsatuli Noa n'eyabazaala era mu abo n'omwava abantu abaidhula ensi yoonayoona.

²⁰ Noa n'eyasookereza okuba omulimi era yaasimba eisamba ery'emizabbibu.

²¹ Bwe yanhwa ku mwenge ogw'emizabbibu, yaatamiira, yaatoolamu engoye yaasigala madu mu weema ye.

²² Hamu, lata wa Kanaani, yaabona nga ise ali madu, yaafuluma, yaakobera baganda be bale ababiri.

²³ Agho Shemu ni Yafethi baatoola ekivaalo, baakigemera einhuma ku mabega gaibwe. Baatambula ekyeinhumainhuma, baingira mu weema, baaghemba iseibwe eyali amadu, nga tibamulinzeeku ku mubona.

²⁴ Noa omwenge bwe gwamuwa ku mutwe, n'ategeera omwana we asembayo obuto ky'amukoze,

²⁵ yaakoba ati: “Kanaani akolimirwe aidha kubanga mwiru wa baganda be.”

²⁶ Era yaakoba ati: “Musengwa Katonda asaakibwe, Katonda wa Shemu; Kanaani aidha kubanga mwiru wa Shemu.

²⁷ Katonda agaziye ekiketezo kya Yafethi, babenga ghalala ni Shemu; Kanaani abenga mwiru we.”

²⁸ Omwidhuzo nga guwoire, Noa yaaghangaala emyaka egindi ebikumi bisatu n'ataanu (350),

²⁹ era yaafa ng'agheza emyaka lwenda n'ataanu egy'obukulu (950).