Amainhama 6 - Baibuli Ekibono kya Katonda 2014

Obunafu obw'ekikula ky'omuntu

¹ Agho abantu bwe baaja nga beeyongera okwala ku nsi, baazaala abaana abaghala.

² Abaana ab'omu igulu bwe baalinga bati ku baana abaghala abo ab'abantu, baabona nga balungi. Kale baababayiza nga bwebaayendanga.

³ Agho Musengwa Katonda yaakoba ati: “Omwoyo gwange tigwidha kusigalanga mu muntu byanda na byanda, kuba omuntu mubiri bubiri ogufa enaku edh'obulamu bwe tidhija kuswikanga myaka kikumi n'abiri (120) .”

⁴ Mu biseera ebyo ni mu biseera ebyairirira, abaana ab'omu igulu baazaalanga abaana mu baana abaghala ab'abantu abaana abo n'abaafuuka abantu ab'amaani, abawaigufu era abakanu, abaayetebwanga Nefilimu, abaamanhikana einho mu biseera ebyabita.

⁵ Musengwa Katonda yaabona ng'omuntu ku nsi afuuse mubi inho era ng'ebidhuubo bye bibi ekiseera kyonakyona.

⁶ Agho yeidhusa ekyamutonza omuntu ku nsi, era enaku yaamuluma ku mwoyo.

⁷ Yaakoba ati: “Ndidha kusaaniagho omuntu ye natonda ave ku nsi, era nsaaniegho n'ensolo, n'ebyeghaluliza ku itaka, n'enhonhi, kuba neidhwisa ekyabintonza.”

⁸ Aye ate Musengwa Katonda yaasiima Noa.

Ebifa ku Noa

⁹ Bino n'ebifa ku Noa. Yali muntu akola ebituufu, ng'aziraku kibi mu bantu ab'omu biseera bye

¹⁰ era ng'atambulira mu Katonda. Yazaala abaana abalenzi basatu, Shemu, Hamu ni Yafethi.

¹¹ Aye, abantu abandi boonaboona baali babi mu maiso ga Katonda, era ng'ebikolwa eby'obukambwe bibunie ensi yoonayoona.

¹² Katonda yaalingirira ensi, yaabona ng'eidhwire obubi, kuba obulamu obw'abantu boonaboona bwali bwidhwire kukola bibi byereere.

¹³ Katonda yaakoba Noa ati: “Nsazeegho okuzikiriza abantu boonaboona, kuba baleeteire ensi okwidhula ebikolwa byaibwe eby'obukambwe.

¹⁴ Weekolere eryato mu muti omulungi olisalemu ebisenge era olimaaleku obulimbo munda ni ku ngulu.

¹⁵ Oti bw'obe olikole: Obuleeyi bwalyo bube mita kikumi n'asatu na isatu (133), obugazi bube mita amakumi abiri na ibiri (22), ate obugungumavu bube mita ikumi na isatu (13).

¹⁶ Eryato eryo lizimbeku akasolya, ng'oleseegho eibanga lya mukono mulala okuva ku mbaawo edh'omu mbali ghe dhikoma. Lizimbe nga lirimu ekisenge ekya ghansi, ekya ghagati, n'ekya ghaigulu. Era oliteeku olwigi mu mbali;

¹⁷ kuba bona, ndidha kuleeta omwidhuzo gw'amaadhi ku nsi guzikirize kiisi kiri na bulamu ekiri ghansi gh'eigulu. Buli kintu ku nsi kiidha kufa.

¹⁸ Aye ndidha kukola endagaano yange n'iwe era oidha kwingira mu lyato eryo, iwe ni batabane bo, ni mukazi wo, ni baka batabane bo.

¹⁹ Era oidha kutwala mu lyato omwo bibiribibiri, ekisaadha n'ekikazi, ku buli kika kya kintu kiramu ekiri n'omubiri, obikuume nga biramu n'iwe.

²⁰ Buli kika kya nhonhi, na buli kika kya nsolo, era na buli kika ky'ebyo ebyeghaluliza ku itaka byonabyona obikuume nga biramu.

²¹ Era twala ku buli kika kya mere eriibwa ogite mu kyagi, eyo n'eidha okuba emere yo nabyo.”

²² Noa yaakola ebyo byonabyona Katonda bye yamulagira.