Amainhama 50 - Baibuli Ekibono kya Katonda 2014

¹ Yosefu yeesuula ku ise nga bw'alira era yaamunhwegera.

² Yosefu yaalagira abagheereza be abayigha, okukaza omulambo gwa ise gulobe kuvunda. Abayigha baakola nga Yosefu bweyalagira.

³ Baamala enaku amakumi ana nga bali kugukaza ekyo n'ekiseera kye baamalanga nga bali kukaza omulambo. Abamisiri baamala enaku nsanvu nga bamulira.

⁴ Enaku edh'okulira bwe dhaawaaku, Yosefu yaakoba abakungu ba kyabazinga ati: “Mbeeghembye, munkobere kyabazinga,

⁵ muti lata wange yandayiza ati, ‘Ndi kumpi kufa. Onziikanga mu magombe ge neesimira mu nsi Kanaani.’ Kale mpegaano nkweghembye, nganha nje nziike lata wange memale ndhire.”

⁶ Kyabazinga yairamu ati: “Kale ja oziike lata wo nga bweyakulayiza.”

⁷ Agho Yosefu yaaja okuziika ise, n'abagheereza ba kyabazinga boonaboona, n'abakungu ab'omu kisaagaati kya kyabazinga, n'abakungu abandi boonaboona ab'omu nsi Misiri.

⁸ Era yaaja n'ab'omu ndhu ye boonaboona, ni baganda be, n'ab'omu ndhu ya lata we boonaboona. Abaana baibwe abato, n'entaama, n'embuzi, n'ente dhaibwe, ni byonka bye baaleka mu kiketezo ky'e Gosheni.

⁹ Era ku baaja naye kwaliku n'abaali ku bigaali eby'omu lutalo, n'abaali bali kuvuga embalaasi; lyaba ikuukuubira inene inho.

¹⁰ Bwe baatuuka mu kifo aghakubirwa engaano, eky'e Atadi e buvandhuba wa Yorudani, baakubira eyo empungu nhingi inho okumala ekiseera. Era Yosefu yaamala enaku musanvu ng'alira ise.

¹¹ Abantu abatyamye ab'omu Kanaani bwe baabona abantu abo, nga bali kulirira mu kifo aghakubirwa engaano eky'e Atadi, baakoba bati: “Abamisiri nga bali kulira inho amaziga!” Ekifo ekyo kye kyava kituumibwa eriina Abeli Miziraimu.

¹² Kale abaana ba Yakobo baakola nga mwene bweyabalagira.

¹³ Baabbeeda omulambo gwe, baagutwala mu nsi Kanaani, baaguziika mu mpuku ey'omu nimiro ey'e Makipela e buvandhuba bwa Mamure. Empuku eyo Aburahamu yagigulira ghalala n'enimiro eyo ku Efuroni Omuhitti, ebenga ekifo eky'okuziikangamu.

¹⁴ Yosefu bweyamala okuziika ise, yairayo mu Misiri ni baganda be, ni boonaboona be yaja nabo okuziika ise.

Yosefu agumya baganda be

¹⁵ Baganda ba Yosefu bwe baabona nga iseibwe amaze okufa, baakoba bati: “Tomanha Yosefu bw'atukyagha, ni yeesasuuza olw'ebibi bye twamukola!”

¹⁶ Kale baatumira Yosefu obukwenda obukoba buti: “Iseife bweyali ng'akaali kufa,

¹⁷ yatukoba tukusabe osonighe omusango n'ebibi bya baganda bo, kuba bye baakukola bibi inho. Mpegaano tukweghembye, tusonighe ebibi bye twakukola, ife abagheereza ba Katonda wa lata wo.” Yosefu yaalira amaziga bwe baamukoba ebyo.

¹⁸ Agho baganda be era baidha, baamukubira amakiryaivu, baakoba bati: “Bona, tuli ghano, tuli bairu bo.”

¹⁹ Aye Yosefu yaabakoba ati: “Mutatya, nze tighanga kweta mu kifo kya Katonda.

²⁰ Imwe mwayenda okunkola ekibi, aye Katonda yaayenda kiveemu ekirungi olw'okuwonia obulamu obw'abantu kamaala. Abantu abo bakaali balamu mpegaano, olw'ekyo ekyabaagho.

²¹ Kale ni mutatya naire, ndidha kubalabiriranga imwe, n'abaana baimwe abato.” Yaabagumya atyo n'ebibono eby'ekisa.

Okufa kwa Yosefu

²² Yosefu yaabanga mu Misiri ghalala n'ab'endhu ya ise, yaaghangaala emyaka kikumi na ikumi (110).

²³ Yaabona abaana n'abaidhukulu aba Efuraimu kamaala. Era yaalera ni ku baana ba Makiri mutabane wa Manasse.

²⁴ Agho Yosefu yaakoba baganda be ati: “Ndi kumpi okufa, aye Katonda taliroba kubalabirira n'okubatoola mu nsi eno, okubatwala mu nsi gye yalayirira Aburahamu, ni Isaaka, ni Yakobo.”

²⁵ Agho Yosefu yaalayiza abaana ba Isiraeli ng'akoba ati: “Mulayire muti Katonda bw'alibatoola mu nsi eno, mulitwala amagumba gange.”

²⁶ Kale ni, Yosefu yaafa ng'agheziiza emyaka egy'obukulu kikumi na ikumi (110). Baakaza omulambo gwe gulobe kuvunda, era baamuta mu sanduuku mu Misiri.