Amainhama 5 - Baibuli Ekibono kya Katonda 2014

Baidhukulu ba Adamu

¹ Kino n'ekitabo eky'abaidhukulu ba Adamu nga bwebairaganwaku: Katonda bweyatonda omuntu, yamukola mu mboneka ye yeene.

² Yatonda omusaadha n'omukazi, yaabagha enkabi era yaabatuuma eriina “Muntu.”

³ Adamu bweyagheza emyaka ekikumi n'asatu (130) egy'obukulu, yaazaala omwana omulenzi ng'amufaanana mu mboneka ni mu kikula; yaamutuuma eriina Sethi.

⁴ Adamu oyo yaaghangaala emyaka egindi lunaana (800) ng'amaze okuzaala Sethi. Era yaazaala n'abaana abandi;

⁵ yaafa ng'agheza emyaka lwenda n'asatu (930) egy'obukulu.

⁶ Sethi bweyagheza emyaka ekikumi n'etaanu (105) egy'obukulu yaazaala omwana omulenzi, yaamutuuma eriina Enoshi.

⁷ Sethi oyo yaaghangaala emyaka egindi lunaana na musanvu (807) ng'amaze okuzaala Enoshi. Era yaazaala n'abaana abandi;

⁸ yaafa ng'agheza emyaka lwenda na ikumi n'ebiri (912) egy'obukulu.

⁹ Enoshi bweyagheza emyaka ekyenda (90) egy'obukulu yaazaala omwana omulenzi, yaamutuuma eriina Kenani.

¹⁰ Enoshi oyo yaaghangaala emyaka egindi lunaana na ikumi n'etaanu (815) ng'amaze okuzaala Kenani. Era yaazaala n'abaana abandi;

¹¹ yaafa ng'agheza emyaka lwenda n'etaanu (905) egy'obukulu.

¹² Kenani bweyagheza emyaka ensanvu (70) egy'obukulu yaazaala omwana omulenzi, yaamutuuma eriina Mahalaleli.

¹³ Kenani oyo yaaghangaala emyaka egindi lunaana n'ana (840) ng'amaze okuzaala Mahalaleli. Era yaazaala n'abaana abandi;

¹⁴ yaafa ng'agheza emyaka lwenda na ikumi (910) egy'obukulu.

¹⁵ Mahalaleli bweyagheza emyaka enkaaga n'etaanu (65) egy'obukulu yaazaala omwana omulenzi, yaamutuuma eriina Yaredi.

¹⁶ Mahalaleli oyo yaaghangaala emyaka egindi lunaana n'asatu (830) ng'amaze okuzaala Yaredi. Era yaazaala n'abaana abandi;

¹⁷ yaafa ng'agheza emyaka lunaana na kyenda n'etaanu (895) egy'obukulu.

¹⁸ Yaredi bweyagheza emyaka ekikumi n'enkaaga n'ebiri (162) egy'obukulu yaazaala omwana omulenzi, yaamutuuma eriina Enoka.

¹⁹ Yaredi oyo yaaghangaala emyaka egindi lunaana (800) ng'amaze okuzaala Enoka. Era yaazaala n'abaana abandi;

²⁰ yaafa ng'agheza emyaka lwenda na nkaaga n'ebiri (962) egy'obukulu.

²¹ Enoka bweyagheza emyaka enkaaga n'etaanu (65) egy'obukulu yaazaala omwana omulenzi, yaamutuuma eriina Methusela.

²² Okuva olwo Enoka yaaba ng'atambulira mu Katonda, yaaghangaala emyaka egindi bikumi bisatu (300). Era yaazaala n'abaana abandi.

²³ Woonawoona yaaba ng'aghangaaliire emyaka bikumi bisatu na nkaaga n'etaanu (365).

²⁴ Enoka oyo yaamala obulamu bwe ng'atambulira mu Katonda era yaamala yaabulagho bubule, kuba Katonda yamutwala.

²⁵ Methusela bweyagheza emyaka ekikumi n'ekinaana n'omusanvu (187) egy'obukulu yaazaala omwana omulenzi, yaamutuuma eriina Lameka.

²⁶ Methusela oyo yaaghangaala emyaka egindi lusanvu na kinaana n'ebiri (782). Era yaazaala n'abaana abandi;

²⁷ yaafa ng'agheza emyaka lwenda na nkaaga na mwenda (969) egy'obukulu.

²⁸ Lameka bweyagheza emyaka ekikumi n'ekinaana n'ebiri (182) egy'obukulu yaazaala omwana omulenzi.

²⁹ Yaamutuuma eriina Noa. Yaakoba ati: “Ono n'alitwizaamu amaani mu kugezimula n'okufaabiikana kwaife, ng'akozesa eitaka lyene eryo Musengwa Katonda lye yakolima.”

³⁰ Lameka oyo yaaghangaala emyaka egindi ebikumi bitaanu na kyenda n'etaanu (595) ng'amaze okuzaala Noa. Era yaazaala n'abaana abandi;

³¹ yaafa ng'agheza emyaka lusanvu na nsavu na musanvu (777) egy'obukulu.

³² Noa bweyagheza emyaka ebikumi ebitaanu (500) egy'obukulu yazaala abaana abalenzi basatu: Shemu, Hamu ni Yafethi.