Amainhama 49 - Baibuli Ekibono kya Katonda 2014

Ebibono bya Yakobo ebyasembayo

¹ Agho Yakobo yaayeta batabane be, yaakoba ati: “Mwidhe ghalala, mbakobere ebiribatuukaku ye bwidha.

² Mwesoloze imwe batabane ba Yakobo, muwulire iseimwe Isiraeli by'akoba.

³ Reubeni, niiwe omwana wange omuberi, niiwe amaani gange; niiwe omwana omuberi ow'omu buvubuka bwange, asinga okuba omukologho era ow'amaani.

⁴ Oli ng'oti n'amaadhi agali kwefuukuula. Aye toliba mukologho kusinga baino, kuba waba ni mukazi wange ow'embali waayonoona obuliri bwange.

⁵ Simeoni ni Levi bafaanania ebidhuubo. Batoola eby'okulwanisa byaibwe, baakola ebikolwa eby'obukambwe.

⁶ Tiryeyimba nabo mu ntegeka dhaibwe edh'okukola ebibi, waire okutyama nabo mu neekobaano dhaibwe; kuba mu busungu bwaibwe baita abasaadha, era mu iralu lyaibwe baatema ente ebigere.

⁷ Obusungu bwaibwe bukolimirwe, kuba bwa kikambwe; n'ekiruyi kyaibwe kikolimirwe, kuba kikambwe. Ndibagabaniagabania mu Yakobo, ndibasansaaniza mu Isiraeli.

⁸ Iwe Yuda, baganda bo banaakusaakanga. Abazigu bo onaabaghangulanga. Baganda bo banaakukubiranga amakiryaivu.

⁹ Yuda oli ng'oti mpologoma nto: era mwana wange oize ng'ova okuyiiga. Okutaime, waabwama ng'oti mpologoma nsaadha, oba ng'oti mpologoma nkazi. Ghazira akana kukukobaku.

¹⁰ Yuda n'anaagemanga omwigo ogw'obwakyabazinga, era baidhukulu be n'abanaafuganga, okutuusa mwene bwakyabazinga lw'aliidha. Era oyo abantu ye banaawuliranga.

¹¹ Aja yaasiba endogoyi ye ento mu isamba ly'emizabbibu, ku muzabbibu ogusinga bulungi. Yaayoza ebivaalo bye mu mwenge omumyufu ogw'emizabbibu.

¹² Amaiso ge gaidha kumumyukanga olw'okunhwa omwenge gw'emizabbibu; n'amaino ge ganaabanga meeru olw'okunhwa amata.

¹³ Zebuluni aidha kubanga kumpi n'enhanda. Ku bukalu bwe n'okunaabanga omwalo gw'amaato. Ensalosalo ye eidha kubanga ku Sidoni.

¹⁴ Issakari ali ng'oti ndogoyi ey'amaani, etyama mu bisibo by'entaama.

¹⁵ Abona ng'ekifo ekiwuumulirwamu kirungi, era nga kyesiimisa; kale yaafunhamu omugongo gwe okwetwika, yaafuuka omwiru akakibwa okukola emirimo.

¹⁶ Dani aneefugiranga abantu be, ng'oti n'ebika ebindi ebya Isiraeli.

¹⁷ Dani aidha kubanga musota ogw'obusagwa ku ngira, ogumoodha embalaasi ebibbonge, ole agityaimeku n'awanuka n'agwa.

¹⁸ Wo Musengwa Katonda, nkuteegereire oidhe ondokole.

¹⁹ Gadi alirumbibwa abanhazi, aye alibairirizaayo yaababingirira.

²⁰ Eitaka lya Asheri liidha kubanga igimu eribaza emere. Aidha kuleetanga eby'okulya ebisaanira kyabazinga.

²¹ Nafutali ali ng'oti n'empongo erigita emisinde nga yeetaaya, era ezaala abaana baayo abalungi.

²² Yosefu ali ng'oti n'omuti ogwama einho, oguli okumpi n'ensulo y'amaadhi, ng'ensaga dhaagwo dheeyandhaliire ghaigulu ku kimante.

²³ Abazigu be bamulumba n'obukambwe, baamulasa n'obulaso bwaibwe era baamukiriga.

²⁴ Aye akalaso ke kasigala nga kakaagumye, emikono gye gyagheebwa amaani agava eri ow'Obukumu Katonda wa Yakobo; Omwayi era Omukuumi wa Isiraeli.

²⁵ Oyo ni Katonda wa lata wo, era n'anaakubeeranga. Oyo n'Aghanga Ebintu Byonabyona, era n'anaakughanga enkabi n'ebirungi ebiva ghaigulu mu igulu, n'ebirungi ebiva ghansi mu itaka, n'enkabi edh'okuzaala abaana n'okwaza ebyayo.

²⁶ Enkabi dha lata wo dhisingira irala enkabi edh'oku nsozi edh'olubeerera, n'ebirungi eby'oku busozi obutawaagho. Enkabi edho dhibenga ku mutwe gwa Yosefu, ku bisige by'oyo eyayawulwa ku baganda be.

²⁷ Benjamini ali ng'oti n'omusege omuswankuzi. Enkyo alya by'ayiize, eigulo yaagabaniamu by'anhaze.”

²⁸ Ebyo n'ebika eikumi n'ebibiri ebya Isiraeli, era ebyo n'ebibono iseibwe bye yabakoba, ng'ali kusabira buli muntu enkabi edhimujaamu.

Okufa n'okuziikibwa kwa Yakobo

²⁹ Agho Yakobo yaasikirira abaana be, yaabakoba ati: “Mpegaano nja kutwalibwa eri badhaadha bange. Munziikanga ghalala ni badhaadha bange, mu mpuku eri mu nimiro ya Efuroni Omuhitti,

³⁰ e Makipela, e buvandhuba bwa Mamure, mu Kanaani. Aburahamu yagula empuku eyo ghalala n'enimiro, ku Efuroni Omuhitti, ebenga ekifo eky'okuziikangamu.

³¹ Omwo mwe baaziika Aburahamu ni Sara mukazi we, omwo mwe baaziika ni Isaaka ni mukazi we Rebekka, era omwo mwe naziika Leeya.

³² Enimiro eyo n'empuku egirimu, byagulibwa ku Bahitti.”

³³ Agho Yakobo bweyamala okusikirira abaana be, yaalambaala ku buliri, yaagheera omuuka gwe ogw'enkomerero, yaafa.