Amainhama 48 - Baibuli Ekibono kya Katonda 2014

Yakobo asabira Efuraimu ni Manasse enkabi

¹ Ebyo nga bimaze okubaagho, Yosefu baamukobera bati: “Lata wo mulwaire.” Kale yaaja ni batabane be bombi, Manasse ni Efuraimu, okumubona.

² Bwe baakobera Yakobo bati: “Omwana wo Yosefu aidhie okukubona,” Yakobo yeekakabya, yaatyama ku buliri.

³ Yaakoba Yosefu ati: “Katonda Aghanga Ebintu Byonabyona yambonekera e Luzi mu nsi y'e Kanaani, yampa enkabi.

⁴ Era yankoba ati, ‘Bona, ndikugha okuzaala abaana kamaala, baidhukulu bo naabafuula amaghanga kamaala. Era ndigha baidhukulu bo ensi eno, yaaba yaibwe ebyanda n'ebyanda.

⁵ Era mpegaano batabane bo bombi, abaakuzaalirwa eno mu nsi y'e Misiri, nga nkaali kwidha y'oli, bange. Efuraimu ni Manasse baidha kubanga batabane bange, ng'oti ni Reubeni ni Simeoni bwe bali.

⁶ Abaana abandi b'olizaala ni baira ku bano, abo n'abaliba ababo, era obusika balibufunira ku baganda baibwe abo, Efuraimu ni Manasse.

⁷ Kino nkikoze olwa inhoko Rakeli: bwe nali nga nva mu Paddani, yafiira ku ngira e Kanaani, nga ghakaasigaireyo entangama okutuuka mu Efurathi. Naamuziika eyo ku mbali kw'engira eja mu Efurathi, ekyo era nga ni Bethelehemu.’ ”

⁸ Isiraeli bweyabona batabane ba Yosefu, yaabuuza ati: “Bano ni baani?”

⁹ Yosefu yaira mu ise ati: “Bano n'abaana bange, Katonda be yampeera eno.” Isiraeli yaakoba ati: “Baleete ghe ndi, mbasabire enkabi.”

¹⁰ Amaiso ga Isiraeli gaali gaidhieku ekifu olw'okukairigha nga takaabona bukalamu. Kale Yosefu yaabaseesa gh'ali, yaabagwa mu kifuba, yaabeevumba.

¹¹ Isiraeli yaakoba Yosefu ati: “Nali tidhuuba nga ndiirayo kabiri okukubonaku. Aye mpegaano Katonda anganhie okubona ni ku baana bo!”

¹² Agho Yosefu yaabatoola ku makiryaivu ga Isiraeli, era yaakuba amakiryaivu n'obweni bwatuuka ku itaka.

¹³ Yosefu yaagema abaana bombi: Efuraimu mu mukono gwe omusaadha, ku luuyi olw'omugooda olwa Isiraeli, ni Manasse mu mukono gwe omugooda, ku luuyi olw'omukono omusaadha olwa Isiraeli. Agho yaabaseesa aghali ise.

¹⁴ Aye Isiraeli yaagolola emikono gye ng'agigodye gyabitaganamu: omukono omusaadha yaaguta ku mutwe gwa Efuraimu omuto, ate omukono omugooda yaaguta ku mutwe gwa Manasse omwana omuberi.

¹⁵ Agho yaasabira Yosefu enkabi, ng'akoba ati: “Katonda oyo, dhaadha wange Aburahamu ni lata wange Isaaka ye baagheerezanga; era Katonda oyo eyandabiriranga okuva mu buto bwange okutuusa mpegaano, aghe abaana bano enkabi.

¹⁶ Katonda oyo eyatuma malaika n'amponia mu buli kabi koonakoona, abaghe enkabi. Eriina lyange n'erya dhaadha wange Aburahamu, n'erya lata wange Isaaka, gatuumibwenga mu baana baibwe. Bazaalenga abaana kamaala, era bafune abaidhukulu kamaala inho ku nsi.”

¹⁷ Yosefu bweyabona nga ise ataire omukono gwe omusaadha ku mutwe gwa Efuraimu, yaanakughala. Kale yaagema omukono gwa ise okugutoola ku mutwe gwa Efuraimu, okuguta ku mutwe gwa Manasse.

¹⁸ Yosefu yaakoba ise ati: “Bbaaba otakola otyo, kuba ono ali ku mukono gwo omusaadha n'omwana omuberi. Ta omukono gwo omusaadha ku mutwe gwe.”

¹⁹ Aye ise yaaloba. Yaakoba ati: “Mwana wange, ekyo nkiidhi bukalamu. Baidhukulu ba Manasse boona balifuuka ighanga, era baliba bakologho. Aye muto we n'alimusinga obukologho, era baidhukulu be balifuuka amaghanga kamaala.”

²⁰ Kale yaabasabira enkabi ku lunaku olwo, ng'akoba ati: “Abantu ab'omu Isiraeli baidha kusabiranga omuntu enkabi, nga bakozesa amaina gaimwe bati, ‘Katonda akufuule nga Efuraimu ni Manasse.’ ” Mu nsambo eyo Yakobo yaakulembeza Efuraimu, ate Manasse yaava einhuma.

²¹ Agho Isiraeli yaakoba Yosefu ati: “Bona, ndi kumpi kufa, aye Katonda aidha kubanga n'imwe, era alibaizaayo mu nsi ya badhaadha baimwe.

²² Era ekiketezo eky'e Shekemu ekigimu, kye natoola ku Bamori nga nwanisa empiima yange n'akalaso, nkighaire iwe, se ti baganda bo.”