Amainhama 47 - Baibuli Ekibono kya Katonda 2014

¹ Agho Yosefu yaalonda bataanu ku baganda be, yaaja nabo eri kyabazinga, yaamukoba ati: “Lata wange ni baganda bange batuuse, nga bava mu nsi y'e Kanaani. Baidhie n'entaama n'embuzi n'ente dhaibwe, ni byonabyona bye bali nabyo. Era mpegaano bali mu kiketezo eky'e Gosheni.”

² Yaayandhula baganda be abo eri kyabazinga.

³ Kyabazinga yaababuuza ati: “Mukola mulimo ki?” Baamwiramu bati: “Ife abagheereza bo tuli baayi, ng'oti ni badhaadha baife bwe baali.

⁴ Twidhie okusengaku mu nsi eno, kuba mu nsi y'e Kanaani endhala eriyo nnene, era ezira isubi lya kuliisa byayo byaife. Kale ni mpegaano, tukweghembye, tuganhe tube mu kiketezo eky'e Gosheni.”

⁵ Kyabazinga yaakoba Yosefu ati: “Mpegaano lata wo ni baganda bo nga bwe baidhie y'oli,

⁶ ensi y'e Misiri eri agho. Bate aghasinga kuba ghalungi, babe mu kiketezo eky'e Gosheni. Era oba nga oidhi nga mu abo mulimu abali n'obusobozi, baghe okulabirira ebyayo byange.”

⁷ Agho Yosefu yaaleeta Yakobo ise, yaamwandhula eri kyabazinga. Yakobo yayendeza kyabazinga enkabi.

⁸ Kyabazinga yaabuuza Yakobo ati: “Oli n'emyaka emeka egy'obukulu?”

⁹ Yakobo yairamu ati: “Emyaka gye naakamala ku nsi, nga ntambulatambula ng'omusenze, giri kikumi n'asatu. Emyaka egyo gibaire mizibu era nga mitono, tigyaze na myaka emingi badhaadha bange gye baamala ku nsi nga batambulatambula ng'abasenze.”

¹⁰ Yakobo kabiri yaayendeza kyabazinga enkabi, yaavaagho.

¹¹ Agho Yosefu yaagha ise ni baganda be eitaka mu nsi y'e Misiri, baasenga aghasinga kuba ghalungi mu kiketezo ky'e Ramesesi, nga kyabazinga bweyalagira.

¹² Yosefu yaafuniranga ise ni baganda be era n'ab'omu maka ga ise boonaboona emere, ng'ajiira ku bantu buli muntu be yabanga nabo.

Endhala

¹³ Endhala yeeyongera okuluma einho, emere yaabula mu nsi yoonayoona. Abantu ab'omu Misiri n'ab'omu Kanaani baagoogomba olw'endhala.

¹⁴ Yosefu yaasoloza empiiya dhoonadhoona edhaali mu nsi ey'e Misiri ni mu nsi ey'e Kanaani, ng'aguza abantu engaano. Empiiya edho yaadhita mu ndhu ya kyabazinga.

¹⁵ Empiiya dhoonadhoona bwe dhaawaayo mu nsi y'e Misiri, ni mu nsi y'e Kanaani, Abamisiri boonaboona baidha eri Yosefu, baakoba bati: “Tughe emere tulobe kufa ng'olingiriire. Kuba empiiya dhituwoireku.”

¹⁶ Yosefu yaakoba ati: “Oba nga empiiya dhibawoireku, muleete ensolo dhaimwe mbagheemu emere.”

¹⁷ Kale baaleeta ensolo dhaibwe dhoonadhoona eri Yosefu: embalaasi, entaama, embuzi, ente, n'endogoyi. Yosefu yaabaghaamu emere omwaka ogwo.

¹⁸ Omwaka ogwo bwe gwawaaku, baidha y'ali mu mwaka ogwairirira, baamukoba bati: “Titwidha kukugisa, isebo: empiiya dhaife dhoonadhoona dhaatuwaaku, n'ensolo dhaife twakugha ira. Titukaali na kintu kindi kya kukugha, isebo, okutoolaku okukwegha ife beene n'ebibandha byaife.

¹⁹ Otatuleka kufa ng'olingiriire. Tugule, ife n'ebibandha byaife, otugheemu emere. Tunaabanga bairu ba kyabazinga, era n'ebibandha byaife binaabanga bibye. Tughe engaano ey'okulya n'ey'okusiga tulobe kufa, tulime ensi yaife erobe kuzika.”

²⁰ Kale Yosefu yaagulira kyabazinga ensi yoonayoona ey'e Misiri. Kiisi Mumisiri yaatundamu ekibandha kye, kuba endhala yabaluma inho. Eitaka lyonalyona lyafuuka lya kyabazinga.

²¹ Yosefu yaafuula abantu okuba abairu, okuva ku nsalosalo ya Misiri eyindi, okutuuka ku yindi.

²² Eitaka lya bakabona ni lyonka ly'ataagula, kuba bakabona baali n'omugabo ogwaibwe kyabazinga gwe yabaghanga ogwababeesangagho, kye baava ni batatundamu itaka lyaibwe.

²³ Agho Yosefu yaakoba abantu ati: “Mubone, mpegaano nguliire kyabazinga eitaka lyaimwe, n'imwe mwena naabagula. Kale ensigo dhiidho dhe munaasiga.

²⁴ Mu biseera eby'amakungula, munaaghanga kyabazinga ekitundu kirala kirala ku buli bitundu bitaanu eby'engaano. Ebitundu ebina ebisigairegho, n'ebinaabanga ebyaimwe eby'okusiga n'okulya, imwe beene ghalala n'ab'omu maka gaimwe.”

²⁵ Baakoba bati: “Otuwoniiza okufa! Era isebo tuganhe tubenga bairu ba kyabazinga.”

²⁶ Kale Yosefu yaataagho eiteeka erikaaligho ni ye buli eno mu Misiri, ery'abantu okughanga kyabazinga ekitundu ekirala ekirala ku buli bitundu ebitaanu eby'amakungula. Eitaka lya bakabona lyonka n'eritaafuuka lya kyabazinga.

Yakobo akola obulaame

²⁷ Abaisiraeli baaba mu nsi y'e Misiri, mu kiketezo eky'e Gosheni. Baakombaghalira omwo, era baazaala abaana kamaala, beeyongera okwala.

²⁸ Yakobo yaamala emyaka ikumi na musanvu mu nsi y'e Misiri; kale yaaba ng'agheziiza emyaka kikumi n'ana na musanvu (147) egy'obukulu.

²⁹ Isiraeli bweyali ng'anaatera okufa, yaayeta omwana we Yosefu, yaamukoba ati: “Ngemerwa ekivunika, oleete omukono gwo okakase by'oja okulayira: layira oti tolinziika mu Misiri.

³⁰ Nhenda nziikibwe aghali badhaadha bange ontoolanga mu Misiri, wantwala wanziika mu kifo mwe baaziikibwa.” Yosefu yairamu ati: “Ndikola ntyo nga bw'okobye.”

³¹ Yakobo yaakoba ati: “Layira ng'oidha kukola otyo.” Yosefu yaalayira. Isiraeli yeebaliza ku buliri bwe.