Amainhama 46 - Baibuli Ekibono kya Katonda 2014

Isiraeli n'ab'omu maka ge baja e Misiri

¹ Agho Isiraeli yaatoolera olugendo lwe ni byonabyona bye yali nabyo. Bweyatuuka e Beerisheba, yaaghaayo omusengo eri Katonda wa Isaaka ise.

² Katonda yaayogera ni Isiraeli oyo, nga amubonekeire obwire, yaakoba ati: “Yakobo, Yakobo!” Yakobo yaavugira ati: “Ndi ghano!”

³ Katonda yaakoba ati: “Ninze Katonda, Katonda oyo owa lata wo. Otatya kuja mu Misiri, kuba baidhukulu bo ndibafuulira eyo eighanga ery'amaani.

⁴ Ndidha kuja n'iwe e Misiri, era ndiiza baidhukulu bo mu nsi eno. Era bw'olifa Yosefu aliba ng'aligho yaakuziika.”

⁵ Yakobo yaasitula okuva mu Beerisheba, batabane be baatoola mwene, n'abaana baibwe era ni bakazi baibwe, baabata ku bigaali eby'okutambuliraku kyabazinga ow'e Misiri bye yamusindikira.

⁶ Era baatwala ensolo dhaibwe, n'ebintu byaibwe bye baafunira e Kanaani, baaja e Misiri. Yakobo yaaja n'eizaire lye lyonalyona:

⁷ batabane be, ni baghala be, ni baidhukulu be abalenzi n'abaghala.

Abaisiraeli abaaja e Misiri

⁸ Gano n'amaina g'eizaire lya Yakobo ni batabane be abaaja e Misiri: Reubeni omwana omuberi owa Yakobo

⁹ ni batabane ba Reubeni: Hanoka ni Pallu, ni Hezironi, ni Karumi.

¹⁰ Simeoni ni batabane be bano: Yemueli, ni Yamini, ni Ohadi, ni Yakini, ni Zohara, ni Shaulo omwana w'omukazi Omukanaani.

¹¹ Levi ni batabane be bano: Gereshoni, ni Kohathi, ni Merari.

¹² Yuda ni batabane be bano: Eri, ni Onani, ni Shela, ni Perezi, ni Zera. Aye Eri ni Onani baafiira mu nsi y'e Kanaani. Batabane ba Perezi baali: Hezironi ni Hamuli.

¹³ Issakari ni batabane be bano: Tola, ni Puva, ni Yobu, ni Shimuroni.

¹⁴ Zebuluni ni batabane be bano: Seredi, ni Eloni, ni Yahaleeli.

¹⁵ Abo ni batabane ba Leeya, be yazaalira Yakobo mu Paddanarama nga totaireeku mughala we Dina. Eizaire lyonalyona erya Yakobo eryasimuka mu Leeya baali abantu amakumi asatu na basatu.

¹⁶ Gadi ni batabane be bano: Zifioni, ni Haggi, ni Shuni, ni Eziboni, ni Eri, ni Arodi, ni Areli.

¹⁷ Asheri ni batabane be bano: Imuna, ni Ishiva, ni Ishivi, ni Beria, ni mwanhinaibwe Sera. Batabane ba Beria baali: Heberi ni Malakieli.

¹⁸ Abo eikumi n'omukaaga, n'eizaire lya Yakobo eryasimuka mu Zilipa, omwiru omukazi, Labani ye yagha mughala we Leeya.

¹⁹ Rakeli muka Yakobo, yazaalira Yakobo oyo abaana abalenzi babiri: Yosefu ni Benjamini.

²⁰ Yosefu ng'ali mu Misiri, Asenathi mughala wa Potifera kabona ow'e Oni, yamuzaalira abaana abalenzi babiri: Manasse ni Efuraimu.

²¹ Batabane ba Benjamini baali: Bela, ni Bekeri, ni Ashibeli, ni Gera, ni Naamani, ni Ehi, ni Roshi, ni Muppimu, ni Huppimu, ni Aridi.

²² Abo eikumi n'abana, n'eizaire lya Yakobo eryasimuka mu Rakeli.

²³ Dani yali ni mutabane we Hushimu.

²⁴ Batabane ba Nafutali baali: Yahazeeli, ni Guni, ni Yezeri, ni Shillemu.

²⁵ Abo omusanvu, n'eizaire lya Yakobo eryasimuka mu Biliha, omwiru omukazi, Labani ye yagha mughala we Rakeli.

²⁶ Eizaire lya Yakobo eryaja mu Misiri lyalimu abantu nkaaga na mukaaga (66), nga tobaliireeku baka batabane be.

²⁷ Batabane ba Yosefu abaamuzaalirwa mu Misiri, baali babiri. Abantu boonaboona ab'omu ndhu ya Yakobo abaaja mu Misiri, baali nsanvu.

Yakobo n'ab'omu ndhu ye nga bali mu Misiri

²⁸ Yakobo yaatuma Yuda okumusookayo, aje eri Yosefu amukobe abaagaane e Gosheni. Baatuuka mu kiketezo eky'e Gosheni,

²⁹ Yosefu yaategeka ekigaali kye eky'omu lutalo, y'aja e Gosheni okwagaanana ni Isiraeli ise. Bwe baayagaanana, Yosefu yaagwa ise mu kifuba, era yaalira amaziga okumala entangama.

³⁰ Isiraeli yaakoba Yosefu ati: “Ni bwe nfa mpegaano tifaayo, kasita nkuboineku naamanha ng'okaali mulamu.”

³¹ Yosefu yaakoba baganda be n'ab'omu ndhu ya ise ati: “Ka nje mmanhise kyabazinga nti baganda bange, n'ab'omu ndhu ya lata wange abaabanga mu nsi y'e Kanaani, baidhie ye ndi.

³² Ndidha kumukobera nti muli baayi, era nti muleese entaama dhaimwe, n'embuzi dhaimwe, n'ente dhaimwe, era n'ebyaimwe byonabyona bye muli nabyo.

³³ Kyabazinga bw'anaabeeta n'ababuuza ati, ‘Mukola mulimo ki.’

³⁴ Munaamwiramu muti, ‘Ife abagheereza bo, tubaire baayi okuva mu buto bwaife n'okutuusa mpegaano, ng'oti ni badhaadha baife bwe baali’—olwo musobole okuba mu kiketezo ky'e Gosheni, kuba kya muzizo eri Abamisiri okuba aghalala n'abaayi.”