Amainhama 45 - Baibuli Ekibono kya Katonda 2014

Yosefu yeeyandhula eri baganda be

¹ Agho Yosefu yaalemwa okwefuga mu maiso g'abagheereza be, yaalagira boonaboona bafulume bave gh'ali. Ghaaloba kusigalagho waire omulala ati, nga Yosefu yeeyoleka eri baganda be.

² Yaawowoola inho, n'Abamisiri baawulira, era n'ab'omu kisaagaati kya kyabazinga baakimanhaku.

³ Yosefu yaakoba baganda be ati: “Ninze Yosefu! Lata wange akaali mulamu?” Aye baganda be baatya inho okubona nga beemereire mu maiso ge, era baaloba kusobola kumwiramu.

⁴ Kale Yosefu yaakoba baganda be ati: “Mbeeghembye museete ghe ndi.” Bale baaseeta. Yabakoba ati: “Ninze Yosefu muganda waimwe, ye mwatunda e Misiri.

⁵ Aye mutanakughala, waire okwesungughalira olw'okuba mwantunda eno, kuba Katonda n'eyansindika okubakulemberamu olw'okuwonia obulamu bw'abantu.

⁶ “Endhala yaakamala mu nsi emyaka ebiri, ate ng'ekaasigaireyo emyaka egindi etaanu, abantu gye bataja kulimiramu, waire okukunguliramu.

⁷ Katonda yansindika okubakulemberamu, mbafunire abo abaliwonagho ku nsi, era mponie abantu kamaala mu nsambo eyeewuunhisa.

⁸ Kale ni ti niimwe mwansidika eno, aye Katonda n'eyansindika. Era yanfuula omukungu ow'oku ntwiko owa kyabazinga w'ensi eno, alabirira ebibye byonabyona, era omukulu afuga ensi yoonayoona ey'e Misiri.

⁹ “Mperaano ni, mwangugheku, mwireyo eri lata wange, mumukobe muti omwana wo Yosefu akoba ati, ‘Katonda yanfuula omufuzi wa Misiri yoonayoona. Idha eno ye ndi era otalwa.

¹⁰ Oidha kubanga mu nsi ey'e Gosheni, obenga kumpi ninze, iwe n'abaana bo, ni baidhukulu bo, n'entaama dho, n'embuzi dho, n'ente dho, era ni byonabyona by'oli nabyo.

¹¹ Ndidha kukulabiriranga ng'oli eyo, iwe n'ab'omu ndhu yo, ni byonabyona by'oli nabyo, mulobe kulambuka, kuba ekaasigaireyo emyaka egindi etaanu egy'endhala.’ ”

¹² “Mpegaano imwe mwenamwena muli kubona, era n'iwe Benjamini oli kubona, nga ninze Yosefu mwenemwene ali kwogera n'imwe.

¹³ Mukobere lata wange ekitiisa kyange kyonakyona kye ndi nakyo ghano mu Misiri, era ni byonabyona bye muboine. Mwangugheku, muleete lata wange ghano.”

¹⁴ Agho Yosefu yaagwa muganda we Benjamini mu kifuba, era yaalira amaziga. Benjamini yeena yaalira amaziga ng'amwevumbye.

¹⁵ Yosefu yaagwa baganda be boonaboona mu bifuba, ng'ali kulira amaziga. Ebyo bwe byawa, baganda be baatoolera okughaya naye.

¹⁶ Amawulire ag'okwidha kwa baganda ba Yosefu bwe gaatuuka mu kisaagaati kya kyabazinga, kyabazinga n'abakungu be baasangaala inho.

¹⁷ Kyabazinga yaakoba Yosefu ati: “Koba baganda bo oti, ‘Mutwike ebintu ku nsolo dhaimwe, mwireyo mu nsi y'e Kanaani,

¹⁸ mutooleyo iseimwe n'ab'omu maka gaimwe, mwidhe ye ndi. Ndidha kubagha eitaka erisinga bugimu mu Misiri, era munaalyanga ku birungi eby'omu nsi eno.’

¹⁹ Era balagire oti, ‘Mukole muti: Bwe munaaba nga muva ghano mu Misiri, muje n'ebigaali eby'okutambuliraku okwo kwe mulireetera abaana baimwe abato ni bakazi baimwe, era mwidhe n'iseimwe.

²⁰ Era ni bwemuliba nga muleseeyo ebintu byaimwe timweraliikiriranga, kuba ebintu ebisinga kuba birungi mu nsi eno Misiri yoonayoona biriba byaimwe.’ ”

²¹ Batabane ba Isiraeli baakola nga bwe baalagirwa. Yosefu yaabagha ebigaali eby'okutambuliraku nga kyabazinga bweyalagira. Era yaabagha n'eby'okuliira mu lugendo.

²² Buli muntu ku boonaboona yaamugha ebivaalo ebiyaaka aye Benjamini yaamugha ebivaalo ebiyaaka bya mikuzi etaanu, era yaamugha n'ebitundu bya feeza ebikumi bisatu.

²³ Yaasindikira ise endogoyi ikumi edheetwise ebintu ebirungi eby'omu Misiri, n'endogoyi enkazi ikumi edheetwise engaano, n'emigaati, n'eby'okulya ebindi, ise by'aliriira mu lugendo.

²⁴ Agho yaasiibula baganda be, yaabakoba ati: “Mutasoolera mu ngira.”

²⁵ Kale baava mu Misiri, baaja eri Yakobo iseibwe, mu nsi y'e Kanaani.

²⁶ Baamughayira bati: “Yosefu akaali mulamu, era n'afuga ensi yoonayoona ey'e Misiri.” Yakobo omwoyo gwamwezinduka era yaaloba kwikiriza kye bakoba.

²⁷ Aye bwe baamughayira ebyo byonabyona Yosefu bye yabakoba, era n'abona ebigaali eby'okutambuliraku Yosefu bye yasindika okumutwaliraku, yairamu omwoyo.

²⁸ Isiraeli yaakoba ati: “Mulekere agho, ebyo bye mukobye bimala omwana wange Yosefu akaali mulamu. Ndidha kuja mmuboneku nga nkaali kufa.”