Amainhama 44 - Baibuli Ekibono kya Katonda 2014

Ekikopo ekyabula

¹ Agho Yosefu yaalagira omugheereza we ati: “Ta mu nsawo dh'abasaadha abo emere yoonayoona ye baghanga okwetwika, era ote empiiya dha buli muntu ku munwa gw'ensawo ye.

² Ta n'ekikopo kyange ekya feeza ku munwa gw'ensawo ey'oyo asembayo obuto, era oteemu n'empiiya dhe dh'aguziiza engaano.” Omugheereza yaakola nga Yosefu bw'amukobye.

³ Bwe bwakya enkyo, aboluganda baasiibulwa nga bali n'endogoyi dhaibwe.

⁴ Bwe baali baakatambulaku katono okuva mu kibuga, Yosefu yaakoba omugheereza we ati: “Situka obingirire abasaadha abo. Bw'onaabatuukaku, obakobe oti, ‘Lwaki ebirungi bye tubakoleire mubisaswiremu ebibi? Lwaki mwibye ekikopo kya musengwa wange ekya feeza?

⁵ Ekikopo ekyo musengwa wange ni ky'anhweramu era ni ky'akozesa ng'alagula. Kye mukoze kibi inho!’ ”

⁶ Omugheereza bweyabatuukaku yaabakoba ebibono ebyo.

⁷ Bairamu bati: “Isebo, kiki ekikwogeza ebibono ebiri ng'oti n'ebyo? Ife abagheereza bo titusobola kukola kintu kiri ng'oti n'ekyo.

⁸ Oidhi bukalamu oti empiiya dhe twayagaana ku minwa gy'ensawo dhaife twadhikwiriza nga tuva mu nsi ey'e Kanaani. Kale twandiibye tutya feeza oba zaabu mu ndhu ya musengwa wo?

⁹ Isebo, oyo yeenayeena, ku ife abagheereza bo, anaayagaanibwa nga n'ali nakyo, anaitibwa. Era n'ife abasigairegho tunaaba bairu bo.”

¹⁰ Yaakoba ati: “Kale kibe kityo nga bwe mukobye. Aye oyo anaayagaanibwa nakyo, n'anaaba omwiru wange imwe abandi timuubeeku musango.”

¹¹ Agho baatwikula mangu ensawo dhaibwe, baadhiisa ghansi, buli muntu yaasibula ensawo ye.

¹² Omugheereza wa Yosefu yaaja ng'ayaza n'obwegendereza, ng'asookera ku asinga obukulu, yaamalira ku asembayo obuto. Yaayagaana ekikopo mu nsawo ya Benjamini.

¹³ Agho aboluganda baakanulamu ebivaalo byaibwe olw'okunakughala, buli muntu yaatwika ebintu ku ndogoyi ye, bairayo mu kibuga.

¹⁴ Yuda ni baganda be bwe baatuuka mu ndhu ya Yosefu, baayagaana ng'akaalimu, baakuba amakiryaivu mu maiso ge.

¹⁵ Yosefu yaababuuza ati: “Kiki kino kye mukoze? Timwidhi muti omuntu ali mu kifo ng'oti n'ekyange aghanga okuzuula ebyama by'abantu ng'alagula?”

¹⁶ Yuda yaakoba ati: “Tunaakukoba ki musengwa? Tunaayogera ki? Oba tunaawoza tutya? Katonda ayoleike nga gutusinze. Mpegaano tuli bairu bo, musengwa, ife era n'oyo ayagaaniibwa n'ekikopo.”

¹⁷ Aye Yosefu yaakoba ati: “Busa! Tisobola kukola kintu kiri ng'oti n'ekyo. Oyo yenka ayagaaniibwa n'ekikopo, n'anaaba omwiru wange. Aye imwe abandi mwireyo bwera eri iseimwe.”

Yuda awolerezaayo Benjamini

¹⁸ Agho Yuda yaaja aghali Yosefu, yaakoba ati: “Musengwa wange, nkweghembye nganha, nze omwiru wo ndhogereku n'iwe. Otansungughalira, kuba oli ng'oti ni kyabazinga mwene.

¹⁹ Musengwa wange, watubuuza ife abairu bo oti, ‘Muliyooku n'iseimwe oba muganda waimwe.’

²⁰ Twakwiramu tuti, ‘Tuliyo n'iseife era nga mukaire, ni muganda waife omuto, eyazaalibwa nga iseife akairiighe. Muganda w'omwana oyo yafa, era oyo ni yenka asigairegho ku baana ba inhina, era ise amwenda inho.’

²¹ Agho, iwe waatukoba ife abairu bo oti, ‘Mumundeetere mmuboneku.’

²² Ife twakukoba, iwe musengwa wange, tuti, ‘Omwisuka tasobola kuva ghali ise, kuba bw'amuvaaku, ise aja kufa.’

²³ Iwe waatukoba, ife abairu bo, oti, ‘Muganda waimwe asembayo obuto bw'ataliidha ghalala n'imwe, timwirangayo kwidha mu maiso gange kabiri.’”

²⁴ “Bwe twairayo eri omugheereza wo iseife, twamukobera bye watukoba.

²⁵ Agho iseife oyo yaakoba ati: ‘Mwireyo mutugulireyo ku kamere.’”

²⁶ Ife twamwiramu tuti: “Titughanga kuja, kuba tibaja kutuganha kuja mu maiso ga musaadha ole, okutoolaku nga muganda waife oyo asembayo obuto ali ghalala n'ife. Aye muganda waife asembayo obuto bw'anaaja n'ife, agho tunaaja.”

²⁷ Iseife oyo, omugheereza wo, yaatukoba ati: “Mwidhi nga mukazi wange Rakeli yanzaalira abaana abalenzi babiri bonka.

²⁸ Owundi yanvaaku, naakoba nti: oyo bwenebwene ensolo ey'omu nsiko yamukankanula. Kuba era tiirangayo kumubonaku okuva lwe yanvaaku.

²⁹ Bwe munantoolaku n'ono, memale akabi ni kamutuukaku, muliba mundeeteire obughafu obulindhita nze omukaire ati.”

³⁰ “Kale, olw'okuba obulamu bwa iseife buli ghalala inho n'obw'omwisuka oyo, bwe ndiirayo eri iseife nga omwisuka tali ninze,

³¹ olulituuka tuti, iseife n'abona ng'omwisuka tali n'ife, aja kufa bufe. Olwo ife abagheereza bo tuliba nga tuleeteire iseife omukaire atyo obughafu obulimwita.

³² Ate era nze omugheereza wo neeyama eri lata wange, okukuuma omwisuka oyo, nga nkoba nti, ‘Bwe ntalimwiza y'oli, omusango gubanga ku nze enaku dhoonadhoona edh'obulamu bwange.’

³³ Kale ni musengwa wange, nkweghembye, nganha nze nsigale ghano nga ndi mwiru wo, mu kifo ky'omwisuka aye oleke omwisuka aireyo ni baganda be.

³⁴ Kuba ndituuka ntya eri lata wange, nga omwisuka tali ninze? Tisobola kuguma kubona akabi akalituuka ku lata wange.”