Amainhama 43 - Baibuli Ekibono kya Katonda 2014

Baganda ba Yosefu bairayo mu Misiri ghalala ni Benjamini

¹ Endhala yeeyongera inho okuluma abantu mu nsi ey'e Kanaani.

² Agho bwe baamalagho engaano yoonayoona ye baatoola mu Misiri, iseibwe yaakoba ati: “Mwireyo mutugulire ku kamere.”

³ Aye Yuda yaamukoba ati: “Omusaadha ole yatulabuliragho irala ati ‘Timwidhanga mu maiso gange, okutoolaku nga muganda waimwe ali ghalala n'imwe.’

⁴ Kale bw'onaaganha muganda waife okuja n'ife, tunaaja twakugulira emere.

⁵ Aye bw'otaamuganhe titwidha kuja, kuba omusaadha yatukoba ati ‘Timwidhanga mu maiso gange, okutoolaku nga muganda waimwe ali ghalala n'imwe.’ ”

⁶ Isiraeli yaabuuza ati: “Lwaki mwandeetera obuzibu obwaga agho, ni mukobera omusaadha muti muliyo ni muganda waimwe owundi?” Bairamu bati:

⁷ “Omusaadha yatubuuliriza inho ebituufaaku n'ebifa ku boluganda lwaife, ng'akoba ati, ‘Iseimwe akaali mulamu? Muliyo ni muganda waimwe owundi?’ Twamwiramu ebyo bye yatubuuliriza. Twandimanhie tutya ng'anaatukoba ati, ‘Muleete muganda waimwe?’ ”

⁸ Yuda yaakoba Isiraeli ati: “Omwisuka mugemye nze, otuleke tuje, memale tube balamu, tulobe kufa ndhala ife n'iwe n'abaana baife abato.

⁹ Nze neeyamye okumukuuma, olimubuuza nze. Bwe ntalimwiza y'oli, ni mmuta mu maiso go nti, omusango gubanga ku nze enaku dhoonadhoona.

¹⁰ Ngoli titwalwa, mpegaano twandibaire nga twakairayo emikuzi ebiri.”

¹¹ Agho Isiraeli iseibwe yaabakoba ati: “Oba nga kityo bwekiri, mukole muti: mutwale mu nsawo dhaimwe ebirabo bye munaagha omusaadha oyo. Mumutwalire ku bintu eby'omu nsi eno ebisinga kuba birungi: ku busando obw'akawoowo, ni ku mudheenene gw'endhuki, ni ku buwoowo obwetebwa balamu ni mirra, ni ku maido ag'omu itaka n'ag'oku miti.

¹² Era mutwale empiiya dha mikuzi ebiri, mwizeeyo edho edhaizibwa mu minwa gy'ensawo dhaimwe. Baghanga okuba nga baadhiiza mu butali bugenderevu.

¹³ Era mutwale ni muganda waimwe, mukole mwireyo eri omusaadha oyo.

¹⁴ Katonda Aghanga Ebintu Byonabyona abagemerwe ekivunika nga muli mu maiso g'omusaadha oyo, omusaadha oyo asobole okubairiza muganda waimwe owundi, ni Benjamini. Nze oba ndi wa kufiirwa baana bange, ndibafiirwa.”

¹⁵ Agho aboluganda baatwala ebirabo n'empiiya dha mikuzi ebiri, baasitula okuja e Misiri, nga bali ghalala ni Benjamini. Bwe baatuuka beeyandhula mu maiso ga Yosefu.

¹⁶ Yosefu bweyabona nga Benjamini ali ghalala nabo, yaakoba omugheereza we ati: “Twala abasaadha bano mu ndhu yange, oite ensolo, kuba baja kuliira ghalala ninze eky'omusana.”

¹⁷ Omugheereza yaakola nga Yosefu bweyamulagira, yaatwala aboluganda mu ndhu ya Yosefu.

¹⁸ Aboluganda baatya olw'okuba baatwalibwa mu ndhu ya Yosefu. Baakoba bati: “Batuleese muno olw'empiiya edhaizibwa mu nsawo dhaife ku mukuzi ogwasooka, olwo aghange okutuvunaana, era atuzinduukirize atunhageku endogoyi dhaife, era atufuule abairu be.”

¹⁹ Kale baaseeta eri omugheereza wa Yosefu, baayogera naye nga bali ku mulyango ogwingira mu ndhu.

²⁰ Baakoba bati: “Isebo, twaidhaku ghano okugula emere omukuzi ogwasooka.

²¹ Bwe twatuuka agh'okusula nga tuli kwirayo eka, twasibula ensawo dhaife, twayagaana empiiya edha buli muntu nga dhiri mu munwa gw'ensawo ye dhoonadhoona nga bwe dhaali. Kale tudhiiziiza.

²² Era tuleese n'empiiya edhindi okugula emere. Titwidhi yaiza mpiiya mu nsawo dhaife.”

²³ Omugheereza yaakoba ati: “Mulobe kweraliikirira era mulobe kutya. Katonda waimwe era Katonda wa iseimwe, ateekwa okuba nga n'eyabateera empiiya edho mu nsawo dhaimwe. Nze nafuna empiiya dhe mwasasula.” Agho yaabaleetera Simeoni.

²⁴ Omugheereza yaatwala aboluganda abo mu ndhu ya Yosefu, yaabagha amaadhi baanaabaku ku bigere, era yaagha endogoyi dhaibwe eby'okulya.

²⁵ Baategeka ebirabo eby'okugha Yosefu ng'aidhie ye bali ku saawa omukaaga edh'omusana, kuba baali babakobye bati baidha kulya naye eky'omusana.

²⁶ Yosefu bweyaira eka, baganda be baamuleetera mu ndhu ebirabo bye baali nabyo, era baamukubira amakiryaivu.

²⁷ Yaababuuza oba nga bali bukalamu. Era yaakoba ati: “Iseimwe omukaire ye mwankoberaku akaaliyo mulamu? Era aliyo bwera?”

²⁸ Bairamu bati: “Omugheereza wo iseife akaaliyo mulamu, era aliyo bukalamu.” Baamukubira amakiryaivu nga n'obweni butuuse ku itaka.

²⁹ Agho Yosefu bweyalinga ati yaabona muganda we Benjamini, omwana wa inhina, yaakoba ati: “Ono ni muganda waimwe asembayo obuto ye mwankoberaku.” Yaakoba Benjamini ati: “Katonda akugemerwe ekivunika, mwana wange!”

³⁰ Yosefu yaavaagho mangu, kuba omwoyo gwe gwamulumira muganda we. Kale yanoonia gh'anaalirira amaziga. Agho yaingira mu kisenge kye yaalirira omwo.

³¹ Bwe yamala okunaaba mu maiso, yaafuluma, yeegumya yaakoba ati: “Mwiwule emere.”

³² Yosefu baamwiwulira wawe yenka, ni baganda be baabaiwulira waibwe, era n'Abamisiri abaalya ku kiiwulo ekyo, boona baabaiwulira waibwe, kuba kyali kya muzizo eri Abamisiri okuliira aghalala n'Abaheburayi.

³³ Agho baatyamya aboluganda nga babalingiriiza Yosefu, era nga bwebairanganwaku okuva ku mukulu okutuuka ku asembayo obuto. Aboluganda bwe baabona ensambo ye babatyamiizaamu, baalingaganaku nga bwe beewuunhia.

³⁴ Yosefu yaabagheereza ebimegero okuva ku mere eyali mu maiso ge. Aye ekimegero kye yagha Benjamini kyasingaku ebya bale abandi obunene emikuzi etaanu. Kale baanhwa era baasagambira ghalala ni Yosefu.