Amainhama 41 - Baibuli Ekibono kya Katonda 2014

Yosefu avuunula ebirooto bya kyabazinga

¹ Emyaka ebiri emirambirira bwe gyabitagho, kyabazinga yaaloota ekirooto kino: Yali ng'ayemereire ku mbali kw'omwiga Kiyira,

² yaja okubona ati, ng'ente musanvu enungi era enherengefu dhiva mu mwiga ogwo, dhaalya eisubi.

³ Kabiri yaja okubona, ng'ente edhindi musanvu embi era engoogombe, nga dhoona dhiva mu mwiga ogwo. Dhaayemerera ku mbali kw'omwiga, nga dhiri kumpi n'ente dhire edhindi.

⁴ Ente dhino embi era engoogombe dhaalya ente dhire enungi era enherengefu, dhaadhimalagho. Agho kyabazinga yaazuuka.

⁵ Kabiri yaatenduka, era yairamu okuloota omukuzi ogwokubiri: Yaabona ebifaaganda eby'engaano musanvu ebigimu era ebingi, nga biri kukulira ku kikolo kirala.

⁶ Olwamala okubona ebyo, obufaaganda obw'engaano musanvu bwavaayo nga butono era nga bubabwirwa empewo eva mu irungu.

⁷ Agho obufaaganda obutono buno bwamira ebifaaganda bire ebigimu era ebirungi. Kyabazinga yaazuuka, era yaategeera ng'abaire ali kuloota.

⁸ Enkyo yeeraliikirira, kale yaayetesa abalaguzi boonaboona n'abakugu mu kuvuunula ebirooto boonaboona ab'omu Misiri, yaabakobera ebirooto bye. Aye ghaabulagho omuntu waire omulala ati, eyali asobola okumuvuunulira amakulu gaabyo.

⁹ Agho omusenero omukulu yaakoba kyabazinga ati: “Olwaleero ndidhukiire nga nasobya.

¹⁰ Ow'ekitiisa kyabazinga, bwewasungughalira abagheereza bo, nze n'omufumbi omukulu, n'otusibira mu ndhu y'omukulu w'abaisirukale abakuumi b'ekisaagaati kya kyabazinga,

¹¹ twaloota ebirooto mu bwire bulala, ng'ekirooto kya buli muntu kiri n'amakulu maawufu.

¹² Ghaaligho omwisuka Omuheburayi eyali aghalala n'ife, nga mugheereza wa mukulu ow'abaisirukale abakuumi b'ekisaagaati kya kyabazinga. Twamukobera ebirooto byaife, era yaatuvuunulira amakulu gaabyo, ng'ekirooto ekya buli muntu bwe kyali.

¹³ Era byaba bityo nga bweyabituvuunulira: Nze wandhiza ku bukulu bwange, aye omufumbi omukulu waalagira baamulengeedhia ku muti, yaafa.”

¹⁴ Kyabazinga yaayetesa Yosefu, baamutoola mangu mu ikomera. Yosefu bwe baamala okumumwa era n'akyusa ebivaalo n'avaala ebindi, yaaja eri kyabazinga.

¹⁵ Kyabazinga yaamukoba ati: “Naloose ekirooto, aye ghazira aghanga kuvuunula makulu gaakyo. Mpuliire nga bakwogeraku bati oghanga okuvuunula ebirooto.”

¹⁶ Yosefu yaira mu kyabazinga ati: “Isebantu kyabazinga, ti ninze, aye Katonda n'anaakugha okuvuunula okulungi.”

¹⁷ Agho kyabazinga yaakoba Yosefu ati: “Mu kirooto kyange, nabaire nga nhemereire ku mbali kw'omwiga Kiyira,

¹⁸ najiire okubona nti, ng'ente musanvu enungi era enherengefu dhiva mu mwiga ogwo, dhaalya eisubi.

¹⁹ Agho ente edhindi musanvu embi era engoogombe, dhaavaayo. Nali tibonangaku nte ngoogombe ng'oti n'edho, mu nsi yoonayoona ey'e Misiri.

²⁰ Ente edho embi era ensowofu, dhaalya dhire enherengefu edhaasoose.

²¹ Aye bwe dhaamaze okudhirya, ole nga taghanga kumanha ati dhidhiriire, kuba dhaasigaire nga ngoogombe nga bwe dhaabaire mu kusooka. Agho naazuuka.

²² “Era naaloota ebifaaganda by'engaano musanvu ebigimu era ebirungi, nga biri kukulira ku kikolo kirala.

²³ N'obufaaganda obw'engaano musanvu bwavaayo nga butono, buniavu era nga bubabwirwa empewo eva mu irungu.

²⁴ Agho obufaaganda obutono buno bwamira ebifaaganda bire ebirungi. Ebirooto ebyo nabikobeire abalaguzi, aye ghaabulagho omuntu waire omulala ati aghanga okunvuunulira amakulu gaabyo.”

²⁵ Yosefu yaakoba kyabazinga ati: “Ow'ekitiisa Kyabazinga, ebirooto byo biri n'amakulu nga n'amalala. Katonda akwoleike by'aja okukola.

²⁶ Ente omusanvu enungi, dhitegeeza emyaka musanvu. N'ebifaaganda omusanvu eby'engaano ebirungi byona bitegeeza emyaka musanvu. Ebirooto byombi biri n'amakulu malala ago.

²⁷ Era n'ente omusanvu embi era ensowofu, edhairirira dhire edhaasooka, era n'obufaaganda omusanvu obw'engaano obuziramu mpeke, obubabwirwa empewo eva mu irungu, ebyo bitegeeza myaka musanvu egy'endhala.

²⁸ Ow'ekitiisa kyabazinga, ekyo kye nkukobeire nti Katonda akwoleike by'aja okukola.

²⁹ Ghalibaagho emyaka musanvu egy'omwero mu nsi yoonayoona ey'e Misiri.

³⁰ Egyo nga gibiseegho, ghalibaagho emyaka musanvu egy'endhala. Era ebiseera eby'omwero biryerabirwa mu nsi y'e Misiri, endhala yaazikiriza ensi.

³¹ Endhala eyo eriba ya maani inho, ghaaloba na kusigalagho kamanhiso kooleka nga ghaalighooku ebiseera eby'omwero.

³² Ekirooto okuba eky'emikuzi ebiri kitegeeza kiti: Katonda asazeegho okukola ekintu ekyo, era nga aidha kukituukiriza mangu.

³³ Kale ni ow'ekitiisa kyabazinga, wandironze omusaadha aidhi okutegeka era ow'amagezi, waamugha okulabirira ensi eno Misiri.

³⁴ Era oteegho abakungu mu ighanga, batoole ekitundu kirala kirala ku buli bitundu bitaanu eby'emere yoonayoona, abantu ye balirima mu nsi eno Misiri, mu myaka omusanvu egy'omwero.

³⁵ Era obalagire basoloze emere mu myaka egyo emirungi egiidha, batereke engaano mu bibuga, era bagikuume.

³⁶ Emere eyo n'eriba ey'okwekuumisa mu ighanga, mu myaka omusanvu egy'endhala eribaagho mu nsi eno Misiri, olwo abantu balobe kufa ndhala.”

Yosefu afuulibwa omufuzi mu Misiri

³⁷ Kyabazinga n'abakungu be boonaboona, baasiima entegeka eyo.

³⁸ Kyabazinga yaakoba abakungu be ati: “Tusobola okuzuulayo omusaadha ali ng'oti n'ono, omusaadha aidhwire omwoyo gwa Katonda.”

³⁹ Kyabazinga yaakoba Yosefu ati: “Nga Katonda bw'akwoleike ebyo byonabyona, ezira wundi aidhi okutegeka era ow'amagezi ng'oti niiwe.

⁴⁰ Oidha kulabiriranga ensi yange, era abantu bange boonaboona baidha kukuwulirangaku. Nze zenka, ninze nnaakuwulangaku okuba n'obuyinza.”

⁴¹ Agho kyabazinga yaakoba Yosefu ati: “Bona, mpegaano nkutairegho ofugenga ensi eno Misiri yoonayoona.”

⁴² Kyabazinga yaatoola ku lwala empeta ye eriku akamanhiso ak'obwakyabazinga, yaagivaaza Yosefu ku lwala. Yaamuvaaza ekivaalo ekighegheevu, era yaamuvaaza mu nkoto omukuufu ogwa zaabu.

⁴³ Yaamugha ekigaali kye eky'omu lutalo ekyokubiri yaatambuliramu, era baaja nga balangirira emberi we bati: “Mukube amakiryaivu.” Atyo kyabazinga yaagha Yosefu okufuganga ensi yoonayoona ey'e Misiri.

⁴⁴ Kyabazinga yaakoba Yosefu ati: “Ninze kyabazinga, era mu nsi eno Misiri ghazira muntu waire omulala ati aligolola mukono gwe, oba okusitula ekigere kye nga tomwikiriiza.”

⁴⁵ Kyabazinga yaatuuma Yosefu eriina Zafenathi Panea, era yaamugha Asenathi mughala wa Potifera kabona ow'e Oni abe mukazi we. Kale obufuzi bwa Yosefu bwabuna ensi ey'e Misiri yoonayoona.

⁴⁶ Yosefu yali agheza emyaka amakumi asatu (30) ghe yatoolerera okugheereza kyabazinga w'e Misiri. Agho yaava mu kisaagaati kya kyabazinga, yaatambula mu nsi yoonayoona ey'e Misiri.

⁴⁷ Mu myaka omusanvu egy'omwero, ensi yaabaza emere kamaala.

⁴⁸ Yosefu yaagisolozanga yoonayoona, yaagiterekanga mu bibuga. Yaaterekanga mu buli kibuga emere eyalimwanga mu nimiro edhikyezungulwire.

⁴⁹ Yosefu yaatereka engaano kamaala inho ng'oti n'omusenho ogw'enhandha era yaalekera agho n'okugipima, kuba yali tekaapimika.

⁵⁰ Emyaka egy'endhala nga gikaali kutuuka, Yosefu yaazaala abaana babiri abalenzi mu Asenathi mughala wa Potifera kabona ow'e Oni.

⁵¹ Yosefu yaatuuma omwana omuberi eriina Manasse, kuba yakoba ati: “Katonda aneerabiiza okudaazibwadaazibwa kwange kwonakwona era n'ab'endhu ya lata wange boonaboona.”

⁵² Yaatuuma owokubiri eriina Efuraimu, kuba yakoba ati: “Katonda ampaire abaana mu nsi mwe ndaagiiredaagiire.”

⁵³ Emyaka omusanvu egy'omwero ogwabaagho mu nsi ey'e Misiri, gyawaaku.

⁵⁴ Era emyaka omusanvu egy'endhala gyatoolera nga Yosefu bweyakoba. Endhala yaagwa mu nsi dhoonadhoona, aye mu nsi ey'e Misiri ng'emere eriyo.

⁵⁵ Abantu ab'omu Misiri bwe baatoolera okulumwa endhala, baalirira kyabazinga abaghe emere. Kyabazinga yaabakoba boonaboona ati: “Muje eri Yosefu, ky'anaabakoba kye mube mukole.”

⁵⁶ Endhala yeeyongera okuluma einho, era yaabuna woonawoona mu nsi ey'e Misiri. Yosefu yaigulagho amaterekero goonagoona, yaaguza Abamisiri engaano.

⁵⁷ Abantu baavanga mu nsi edhindi dhoonadhoona, baaja mu Misiri eri Yosefu okugula engaano, kuba endhala yali ya maani inho woonawoona.