Amainhama 40 - Baibuli Ekibono kya Katonda 2014

Yosefu avuunula ebirooto by'abasibe

¹ Bwe ghaabitagho entangama ng'ebyo biwoire, omusenero wa kyabazinga era n'omufumbi, baasungughaza musengwa waibwe kyabazinga ow'e Misiri.

² Kyabazinga yaasungughalira inho abakungu abo bombi: omukulu w'abasenero, n'omukulu w'abafumbi.

³ Yaabasibira mu ikomera, mu ndhu y'omukulu w'abaisirukale abakuumi b'ekisaagaati kya kyabazinga, mu kifo kyene ekyo Yosefu mwe yasibirwa.

⁴ Omukulu w'abaisirukale abakuuma ekisaagaati kya kyabazinga, yaalonda Yosefu okubagheerezanga, era baatwala entangama nga basibe.

⁵ Lwali lulala obwire, omusenero yaaloota ekirooto, n'omufumbi yeena yaaloota, aye nga buli kirooto kiri n'amakulu maawufu.

⁶ Yosefu bweyaja ye bali enkyo, yaababona nga beeraliikiriire.

⁷ Yaabuuza abakungu ba kyabazinga abo abaasibirwa aghalala naye mu ndhu ya musengwa we, ati: “Kiki ekiri kubeeraliikiriza kityo olwaleero?”

⁸ Baamwiramu bati: “Buli mulala ku ife yaloose ekirooto, aye ghazira aghanga kuvuunula makulu ga birooto ebyo.” Yosefu yaakoba ati: “Katonda ti n'asobozesa abantu okuvuunula ebirooto? Kale munkobere ebirooto ebyo.”

⁹ Agho omusenero omukulu yaakobera Yosefu ekirooto kye ati: “Mu kirooto kyange ghaabairegho omuzabbibu mu maiso gange,

¹⁰ nga kuliku ensaga isatu. Olwamaze okuleeta amakaba guti, ng'omuzabbibu ogwo gumulisa ebimuli, gwayama obufaaganda bw'emizabbibu era bwayenga.

¹¹ Nabaire nga ngemereire ekikopo kya kyabazinga mu ngalo. Kale naatoola emizabbibu, naagikamulira mu kikopo kya kyabazinga, naakimugemya.”

¹² Yosefu yaamukoba ati: “Gano n'amakulu gaakyo: ensaga eisatu dhitegeeza enaku isatu.

¹³ Mu nnaku isatu kyabazinga aidha kukusibula ove mu ikomera, akusonighe era akwirize obukulu bwo, osobole okumugemyanga ekikopo, nga bwe wakolanga eira bwe wali ng'okaali omusenero we.

¹⁴ Aye nkweghembye ondidhukiranga nga bikujiiriire bukalamu, wangemerwa ekivunika, wandhogererayo eri kyabazinga, wantoola mu ikomera muno.

¹⁵ Kuba bwenebwene bampuuya buwuuye okuva mu nsi y'Abaheburayi, era ni ghano tikolangaghooku kintu kyonakyona ekyandinsibiisa mu ikomera.”

¹⁶ Omufumbi omukulu bweyabona nga amakulu g'ekirooto ekyo malungi, yaakoba Yosefu ati: “Zeena naloose nga neetwise ku mutwe ebiibo bisatu ebirimu emigaati nga mbiyiriike.

¹⁷ Mu kiibo eky'oku ngulu mwabairemu emigaati egya buli nsambo nga gya kyabazinga, aye nga enhonhi dhiri kugiriira mu kiibo ku mutwe gwange.”

¹⁸ Yosefu yairamu ati: “Gano n'amakulu gaakyo: ebiibo ebisatu bitegeeza enaku isatu.

¹⁹ Mu nnaku isatu kyabazinga aidha kukutoola mu ikomera, alagire bakutemeku omutwe, era bakughanike olengeedhere ku muti, enhonhi dhirye omulambo gwo.”

²⁰ Ku lunaku olwokusatu, olwali olw'okukulizaaku amazaalibwa ga kyabazinga, kyabazinga yaagabula abakungu be boonaboona embaga. Yaafulumya mu ikomera omusenero omukulu n'omufumbi omukulu, bombi yaabaleeta mu maiso g'abakungu be.

²¹ Yaiza omusenero omukulu mu busenero bwe, era omusenero oyo yaagemya kyabazinga ekikopo mu ngalo.

²² Aye kyabazinga yaaghanika omufumbi omukulu yaalengeedhera ku muti, yaafa, nga Yosefu bweyavuunula ebirooto.

²³ Aye omusenero omukulu yaaloba kwogererayo Yosefu eri kyabazinga, yaamwerabirira irala.