Amainhama 4 - Baibuli Ekibono kya Katonda 2014

Ebigema ku Kaini ni Abeli

¹ Adamu yaaba ni mukazi we Eva, yaatoola enda. Yaazaala omwana era yaakoba ati: “Nfunie omwana nga Musengwa Katonda n'ambeera.” Kale yaamutuuma eriina Kaini.

² Kabiri yaazaala omwana owundi, yaamutuuma eriina Abeli. Abeli ono yaaba mwayi wa ntaama aye Kaini yaaba mulimi.

³ Ekiseera nga kibiseegho Kaini yaaleeta ku makungula ge, yaagaghaayo eri Musengwa Katonda.

⁴ Abeli yeena yaaleeta ku ntaama dhe edhaazaalibwa mu nzaalo edhisooka, yaadhiita, yaghaayo amasavu gaadho. Musengwa Katonda yaasiima Abeli n'ekigheebwayo kye.

⁵ Aye yaaloba kusiima Kaini n'ekigheebwayo kye. Agho Kaini yaatuubatuuba olw'obusungu obungi.

⁶ Musengwa Katonda yaamubuuza ati: “Kiki ekikutuubyatuubya n'obusungu obungi butyo?

⁷ Bw'oba ng'okoze ekituufu tosiimibwa? Aye nga bw'okoze obubi, ekibi kikuteegereire ku lwigi nga kyenda okukufuga. Aye oteekwa okukighangula.”

⁸ Kaini yaakoba muganda we Abeli ati: “Tuje tubbaalebbaaleku.” Era bwebaali nga bali eyo, Kaini yeefuulira muganda we yaamwita.

⁹ Agho Musengwa Katonda yaabuuza Kaini ati: “Muganda wo Abeli ali gha?” Kaini yairamu ati: “Tiidhi ninze omukuumi wa muganda wange?”

¹⁰ Musengwa Katonda yaakoba ati: “Kiki kino ky'okoze? Omusaayi gwa muganda wo guli kundirira okuva ghansi olw'okwenda okwesasuuza.

¹¹ Buti okolimiirwa era ghazira ky'okaafuna kuva mu itaka eryasaimya omunwa, ni linhwa omusaayi gwa muganda wo y'oise.

¹² Bw'onaalimanga eitaka tiriidha kukughanga makungula naire; ku nsi oidha kutambulatambulanga eyo otyo ng'ozira gh'osula.”

¹³ Kaini yaakoba Musengwa Katonda ati: “Ekibonerezo ekyo kikakali inho, tighanga kukigumira.

¹⁴ Olwaleero ominze ku itaka lino era ni mu maiso go. Ndidhanga kutambulatambula eyo ntyo nga nzira ghe nsula, era kiisi anandhagaananga, ng'andhita bwite.”

¹⁵ Aye Musengwa Katonda yaamwiramu ati: “Busa naire. Omuntu yeenayeena bw'akwita, olyesasuuzibwamu obulamu bwa bantu musanvu.” Musengwa Katonda yaata ku Kaini akamanhiso, kiisi amwagaana alobenga kumwita.

¹⁶ Kaini yaava mu maiso ga Musengwa Katonda, yaaja yaabanga mu nsi eyetebwa “Ntambula ntyo,” eri ku luuyi olw'e buvandhuba bwa Edeni.

Baidhukulu ba Kaini

¹⁷ Kaini yaba ni mukazi we, yaatoola enda, yaazaala omwana omulenzi baamutuuma eriina Enoka. Kaini yaazimba ekibuga era yaakituuma eriina lya mutabane we oyo Enoka.

¹⁸ Enoka yaazaala Iradi, Iradi yaazaala Mehuyaeli, Mehuyaeli yaazaala Methusaeli, Methusaeli yazaala Lameka.

¹⁹ Lameka yali n'abakazi babiri owundi nga ni Ada ate owundi nga ni Zila.

²⁰ Ada yaazaala Yabali oyo n'eyali dhaadha w'abo abaayi abasula mu weema.

²¹ Muganda we nga ni Yubali, dhaadha w'abo boonaboona abakubi ab'entongooli n'abafuuyi ab'endere.

²² Zila yaazaala Tubali Kaini eyali omugheesi ow'ebintu eby'ekikomo n'eby'ekyuma. Mwanhina yali ng'ayetebwa Naama.

²³ Lameka yaakoba bakazi be ati: “Ada ni Zila bakazi bange mumpulirise, ndhise omusaadha omwisuka kuba ankubye era yanfumita.

²⁴ Bwe kiba nti okwita Kaini kwesasuuzibwamu obulamu bwa bantu musanvu, agho ni, okwita Lameka kuli na kwesasuuzibwamu bulamu bwa bantu nsanvu na musanvu.”

Ebigema ku Sethi ni Enoshi

²⁵ Adamu yaaba ni mukazi we kabiri, yaazaala omwana mulenzi. Yaamutuuma eriina Sethi, kuba yakoba ati: “Katonda ampaire omwana omulenzi aire mu kifo kya Abeli, Kaini ye yaita.”

²⁶ Sethi yeena yaazaala omwana mulenzi, yaamutuuma eriina Enoshi. Mu biseera ebyo abantu mwe baasookera okusabanga Musengwa Katonda mu liina lye.