Amainhama 39 - Baibuli Ekibono kya Katonda 2014

Yosefu ni muka Potifari

¹ Abaishimaeli baali nga bamaze okutwala Yosefu mu Misiri, era nga bamuguziiza Potifari omukungu wa kyabazinga w'e Misiri, era omukulu w'abaisirukale abaakuumanga ekisaagaati kya kyabazinga.

² Musengwa Katonda yaabanga ni Yosefu, era Yosefu oyo yaabanga wa nkabi mu byonabyona bye yakolanga; yaabanga mu ndhu ya musengwa we Omumisiri.

³ Omumisiri oyo yaabona nga Musengwa Katonda ali ni Yosefu, era ng'amugha enkabi mu buli ky'akola.

⁴ Potifari yaasiima Yosefu, yaamufuula mugheereza we, era yaamugha okulabiriranga endhu ye, n'okukuumanga ebibye byonabyona.

⁵ Okuva ku olwo, Musengwa Katonda yaagha enkabi amaka g'Omumisiri oyo n'ebibye byonabyona, bye yali nabyo mu ndhu ye ni mu nimiro. Musengwa yakola kino ku lwa Yosefu.

⁶ Kale Potifari yaalekera Yosefu ebibye byonabyona okubirabiriranga, nga takeeraliikirira kintu kyonakyona okutoolaku emere ye yalyanga. Ekikula kya Yosefu kyali nga kisanhusa okubona.

⁷ Bweghaabitagho entangama, muka musengwa we yaamulinga ekimodi, yaakoba ati: “Ba ninze mu buliri.”

⁸ Aye Yosefu yaaloba, yaakoba muka musengwa we ati: “Bona, musengwa wange takeeraliikirira kintu kyonakyona mu ndhu, kuba nze ndigho, era yandekera ebibye byonabyona okubirabirira.

⁹ Ndi n'obuyinza mu maka muno obwagayaga n'obubwe, era ghazira ky'atangemya okutoolaku iwe; kuba oli mukazi we. Kale nsobola ntya okukola ekibi ekyaga agho ni nsobya eri Katonda?”

¹⁰ Era waire ng'omukazi oyo yadeebanga Yosefu buli kaakyeire, aye Yosefu yaloba okuba naye, waire okuba gh'ali.

¹¹ Aye lwali lulala Yosefu yaingira mu ndhu okukola emirimo gye, era nga ghazira bagheereza ba mu ndhu eyo bandi.

¹² Omukazi yaagema Yosefu ekivaalo, ng'amukoba ati: “Ba ninze.” Aye Yosefu yaalekulira ekivaalo kye mu ngalo dh'omukazi, yaalumuka yaafuluma ku luya.

¹³ Omukazi bweyabona nga Yosefu amulekuliire ekivaalo kye mu ngalo era nga alumwike, yaafuluma ku luya,

¹⁴ yaayeta abagheereza ab'omu ndhu ye, yaabakoba ati: “Mubone, baze yaleeta muno Omuheburayi okutudhooga. Aingiire ye mbaire, ng'ayenda okunkaka okuba naye, aye nze naakuba inho enduulu.

¹⁵ Bw'awuliire nga nkubye enduulu, yandekera ekivaalo kye, yaalumuka yaafuluma ku luya.”

¹⁶ Omukazi yaakuuma ekivaalo kya Yosefu, okutuusa musengwa wa Yosefu lwe yaira eka.

¹⁷ Era bweyaira yaamukobera kyene ekyo ati: “Omugheereza Omuheburayi ye watuleetera, yaingira ye nali okundhooga.

¹⁸ Aye bwe nakuba enduulu, yandekera ekivaalo kye, yaalumuka, yaafuluma ku luya.”

¹⁹ Agho musengwa wa Yosefu bweyawulira mukazi we ng'amukobera nga Yosefu bweyali amubisiisa, yaasungughala,

²⁰ yaagema Yosefu, yaamuta mu ikomera abasibe aba kyabazinga mwe bakuumirwa; Yosefu yaaba omwo mu ikomera.

²¹ Aye Musengwa Katonda yaabanga ni Yosefu oyo, yaamwoleka nga bw'amugonza obutalekera, yaaleetera omukuumi w'eikomera okumugemerwanga ekivunika.

²² Era omukuumi w'eikomera oyo yaagemya Yosefu abasibe boonaboona okubalabiriranga, era yaamugha obuvunaanizibwa ku kiisi kikolebwa mu ikomera.

²³ Omukuumi w'eikomera tiyeeraliikiriranga kintu kyonakyona ekyagemesebwa Yosefu, kuba Musengwa Katonda yali ghalala ni Yosefu, ng'agha enkabi kiisi kye yakolanga.