Amainhama 37 - Baibuli Ekibono kya Katonda 2014

Yosefu ni baganda be

¹ Yakobo yabanga mu nsi Kanaani, ise mwe yasenga.

² Bino n'ebifa ku maka ga Yakobo: Yosefu bweyali nga mwisuka wa myaka ikumi na musanvu, yaayayanga entaama ni baganda be, abaana ba Biliha ni Zilipa abaali baka lata we ab'embali. Yosefu yaaseeghanga eri ise ebibi bye baakolanga.

³ Isiraeli yayendanga inho Yosefu okusinga abaana be abandi boonaboona; kuba oyo ni ye yazaala mu bukaire. Yaamutungira ekivaalo eky'endhawulo nga kya mikono mireeyi.

⁴ Aye baganda ba Yosefu bwe baabona nga iseibwe amwenda okusinga beene bw'abenda, baamukyagha nga tibenda na kwogera naye bya bulungi.

⁵ Agho Yosefu yaaloota ekirooto. Bwe yakikobera baganda be, beeyongera bweyongere okumukyagha.

⁶ Yabakoba ati: “Muwulire ekirooto kino kye naloose:

⁷ Twabaire tuli kusiba ebinhwa by'engaano mu nimiro, okuja okubona ng'ekinhwa ekyange kisituka nga kyesimba. Agho ebinhwa ebyaimwe byaidha byezungulula ekyange era byakikubira amakiryaivu.”

⁸ Baganda be baamubuuza bati: “Olowooza oti iwe olifuuka kyabazinga waife, era waatufuga?” Kale beeyongera okumukyayira irala olw'ebirooto bye, n'olw'ebibono bye.

⁹ Yosefu era yaaloota ekirooto ekindi, yaakikobera baganda be ati: “Naloose ekirooto ekindi, ng'endhuba, n'omwezi, n'emuunienie ikumi na ndala biri ku nkubira amakiryaivu.”

¹⁰ Bwe yamala okukikobera baganda be, yaakoberaku ni ise. Aye ise yaamunenia ati: “Kirooto ki kino kye waloose? Mbo bwenebwene nze n'inhoko ni baganda bo tuliidha twakukubira amakiryaivu?”

¹¹ Baganda ba Yosefu baamugemerwa ensaalwa, aye ise yaasigala nga yeefumintiriza ku ebyo Yosefu bye yayogera.

Yosefu atundibwa era yaatwalibwa e Misiri

¹² Agho baganda ba Yosefu bwe baali bajiire e Shekemu okwaya ebyayo bya iseibwe,

¹³ Isiraeli yaakoba Yosefu ati: “Baganda bo bali Shekemu, ye bali kwayira ebyayo. Kola nkutume ye bali.” Yosefu yairamu ati: “Ndi ghano ntuma.”

¹⁴ Ise yaamukoba ati: “Ja mpegaano obone oba nga baganda bo bali bukalamu, era oba nga n'ebyayo biri bukalamu memale oire onkobere.” Kale yaamutuma okuva mu kiiko eky'e Heburoni. Yosefu yaaja yaatuuka e Shekemu.

¹⁵ Ghaabaagho omusaadha eyamwagaana ng'ali kutambulira eyo atyo mu byayiro, yaamubuuza ati: “Oli kwagala ki?”

¹⁶ Yosefu yairamu ati: “Ndi kwagala baganda bange. Nkweghembye nkoberaaku ye bali kwayira ebyayo.”

¹⁷ Omusaadha yaamukoba ati: “Baamaze ira okuja, kuba nabawuliire nga bakoba bati bali kuja e Dothani.” Agho Yosefu yaanonereza baganda be, yaabaagaana e Dothani.

¹⁸ Baamulengera ng'akaali ghalaku, era bweyali ng'akaali kubatuukaku beeteesa okumwita.

¹⁹ Owundi yaakoba baine ati: “Bona omuloosi ow'ebirooto wuuyo ali kwidha.

²⁰ Mukole tumwite tumusuule mu kindi ku biina ebiri ghano. Tulikoba tuti ensolo ey'omu nsiko n'eyamulya memale tubone ebirooto bye bwe biriba.”

²¹ Aye Reubeni bweyawulira ekyo, yaafuba okuwonia Yosefu, yaakoba ati: “Tulobe kumwita.”

²² Era yaakoba ati: “Mutayugha musaayi. Mumusuule bwa mu kiina kino ekiri mu irungu, aye timumukolaku kabi.” Yayogera atyo ng'ayenda amuwonie, amubatooleku amwirize ise.

²³ Kale Yosefu bweyatuuka ku baganda be, baamutoolamu ekivaalo kye eky'endhawulo eky'emikono emireeyi, kye yali avaire.

²⁴ Baamutwala, baamusuula mu kiina ekikalu nga muzira maadhi.

²⁵ Agho baatyama baalya. Baaja okulinga bati, nga balengera ekikunsu ky'Abaishimaeli abasuubuzi abava mu Gileadi, nga bali n'engamiya edheetwise obusando obw'akawoowo era n'obuwoowo obundi obwetebwa balamu ni mirra, nga babitwala e Misiri.

²⁶ Agho Yuda yaakoba baganda be ati: “Tuganhulwamu ki ife okwita muganda waife ni tubuzaabuza okwitibwa kwe?

²⁷ Ka tumuguze Abaishimaeli abasuubuzi, ife tulobe kumukolaku kabi, kuba oyo muganda waife era musaayi gwaife.” Baganda be baaganha kye yakoba.

²⁸ Kale abasuubuzi bwe baali babitagho, baamughaluzaayo, baamutoola mu kiina, baamuguza abasuubuzi abo ebitundu amakumi abiri ebya feeza. Abasuubuzi abo baatwala Yosefu mu Misiri.

²⁹ Reubeni bweyairayo ku kiina n'ayagaana nga Yosefu aziramu, yaakanulamu ebivaalo bye olw'okunakughala.

³⁰ Yairayo eri baganda be, yaakoba ati: “Omwisuka azirayo. Kale nnaaja gha nze?”

³¹ Agho baita embuzi, bainhika ekivaalo kya Yosefu mu musaayi gwayo.

³² Baatwala ekivaalo ekyo eky'emikono emireeyi eri iseibwe, baakoba bati: “Twayagaine ekivaalo kino. Mpegaano bona oba nga n'ekyo eky'omwana wo, oba nga ti nikyo.”

³³ Yakobo yaakitegeera era yaakoba ati: “Kino n'ekivaalo ky'omwana wange. Ensolo ey'omu nsiko yamulya. Bwenebwene omwana wange Yosefu ensolo yamukankanula!”

³⁴ Yakobo yaakanulamu ebivaalo bye olw'okunakughala, yeesiba ekikaakaati, yaamala enaku kamaala ng'alira omwana we.

³⁵ Batabane ni baghala be boonaboona baidha okumugumya, aye yaaloba kubawulirisa. Yaakoba ati: “Ndiika e magombe eri omwana wange nga nkaalira.” Yeeyongera okulira amaziga olw'omwana we.

³⁶ Mu kiseera ekyo, abasuubuzi baali bamaze okutunda Yosefu mu Misiri, nga bamuguziiza Potifari omukungu wa kyabazinga w'e Misiri, era omukulu w'abaisirukale abaakuumanga ekisaagaati kya kyabazinga.