Amainhama 36 - Baibuli Ekibono kya Katonda 2014

Baidhukulu ba Esau

¹ Bano ni baidhukulu ba Esau, era ayetebwa Edomu.

² Esau yabayiza abakazi Abakanaani bano: Ada mughala wa Eloni Omuhitti, ni Oholibama mughala wa Ana mutabane wa Zibeoni Omuhivi,

³ ni Basemathi mughala wa Ishimaeli, era mwanhina Nebaiothi.

⁴ Ada yaazaala Elifazi; Basemathi yaazaala Reweli;

⁵ Oholibama yaazaala Yeushi ni Yalamu ni Kora. Abo ni batabane ba Esau be yazaala mu nsi y'e Kanaani.

⁶ Agho Esau yaatwala bakazi be, ni batabane, ni baghala be, era n'abantu boonaboona ab'omu ndhu ye, n'ensolo dhe dhoonadhoona, n'ebintu bye byonabyona bye yafunira mu nsi y'e Kanaani, yaaja mu nsi eyindi, ave aghali muganda we Yakobo.

⁷ Kuba baali n'ebintu kamaala inho, nga tibasobola kuba ghalala. Ensi ye baabangamu yali nga tekaabamala olw'ebyayo ebingi bye baali nabyo.

⁸ Kale, Esau, era ayetebwa Edomu, yaabanga mu Seiri ensi ey'ensozi.

⁹ Bano ni baidhukulu ba Esau, dhaadha w'Abedomu mu nsi Seiri ey'ensozi.

¹⁰ Gano n'amaina ga batabane ba Esau: Elifazi ye yazaala mu mukazi we Ada, ni Reweli ye yazaala mu Basemathi era nga yeena yali mukazi we.

¹¹ Batabane ba Elifazi ni bano: Temani, Omari, Zefo, Gatamu ni Kenazi.

¹² Elifazi ono yali n'omukazi ow'embali nga ni Timuna, eyamuzaalira Amaleki. Abo n'abantu abaasimuka mu Ada muka Esau.

¹³ Bano ni batabane ba Reweli: Nahathi, Zera, Shamma ni Mizza. Abo n'abantu abaasimuka mu Basemathi muka Esau.

¹⁴ Abaana Oholibama mughala wa Ana, mutabane wa Zibeoni be yazaalira Esau ni bano: Yeushi, ni Yalamu, ni Kora.

¹⁵ Bano n'abakulu b'ebika ebyasimuka mu Esau. Elifazi, mutabane wa Esau omuberi, n'eyali dhaadha wa bano: Temani, Omari, Zefo, Kenazi,

¹⁶ Kora, Gatamu, ni Amaleki. Abo n'abakulu b'ebika ebyasimuka mu Elifazi mu nsi Edomu, era baidhukulu ba Ada muka Esau.

¹⁷ Reweli mutabane wa Esau n'eyali dhaadha wa bano: Nahathi, Zera, Shamma ni Mizza. Abo n'abakulu b'ebika ebyasimuka mu Reweli mu nsi Edomu, era baidhukulu ba Basemathi muka Esau.

¹⁸ Abaana ba Oholibama mughala wa Ana era muka Esau ni bano: Yeushi, Yalamu ni Kora. Abo n'abakulu b'ebika ebyasimuka mu Oholibama oyo.

¹⁹ Abo ni baidhukulu ba Esau, ayetebwa Edomu, era abakulu b'ebika ebimusimukamu.

Baidhukulu ba Seiri

²⁰ Abaana ba Seiri Omuhori, abatyamye b'omu nsi Edomu ni bano: Lotani, Shobali, Zibeoni, Ana,

²¹ Dishoni, Ezeri ni Dishani. Era abo n'abakulu b'ebika by'Abahori.

²² Abaana ba Lotani ni bano: Hori ni Hemani. Lotani oyo yali ni mwanhina nga ni Timuna.

²³ Abaana ba Shobali ni bano: Aluvani, Manahathi, Ebali, Shefo ni Onamu.

²⁴ Abaana ba Zibeoni ni bano: Aya ni Ana. Ana oyo n'eyazuula ensulo ey'amaadhi amasu mu irungu, bweyali ng'ali kwaya endogoyi dha ise.

²⁵ Abaana ba Ana ni bano: Dishoni, ni Oholibama mwanhina.

²⁶ Abana ba Dishoni ni bano: Hamudani, Eshibani, Ithurani, ni Kerari.

²⁷ Abaana ba Ezeri ni bano: Bilihani, Zaavani, ni Akani.

²⁸ Abaana ba Dishani ni bano: Uzi ni Arani.

²⁹ Abakulu b'ebika ebisimuka mu Bahori ni bano: Lotani, Shobali, Zibeoni, Ana,

³⁰ Dishoni, Ezeri, ni Dishani. Abo n'abakulu b'ebika by'Abahori nga bwe byali mu nsi Seiri.

Bakyabazinga ab'ensi Edomu

³¹ Bano ni bakyabazinga abaafuga mu nsi Edomu, nga tighabangaghooku kyabazinga waire omulala ati afuga Baisiraeli.

³² Bela mutabane wa Beori yafuga mu Edomu, ekibuga kye nga kyetebwa Dinahaba.

³³ Bela oyo yaafa, Yobabu mutabane wa Zera ow'e Bozira yaalya obwakyabazinga mu kifo kye.

³⁴ Yobabu bweyafa, Hushamu ow'omu nsi y'Abatemani yaalya obwakyabazinga mu kifo kye.

³⁵ Hushamu yaafa, Hadadi mutabane wa Bedadi eyaghangula Abamidia mu nsi Moabu, yaalya obwakyabazinga mu kifo kye; ekibuga kye nga kyetebwa Avithi.

³⁶ Hadadi yaafa, Samula ow'e Masureka yaalya obwakyabazinga mu kifo kye.

³⁷ Samula yaafa, Shaulo ow'e Rehobothi ekiri okumpi n'omwiga Eufurate, yaalya obwakyabazinga mu kifo kye.

³⁸ Shaulo yaafa, Baalihanani mutabane wa Akabori yalya obwakyabazinga mu kifo kye.

³⁹ Baalihanani mutabane wa Akabori yaafa, Hadari yaalya obwakyabazinga mu kifo kye; ekibuga kye nga kyetebwa Pau. Eriina lya mukazi we nga ni Mehetabela, mughala wa Matiredi era mwidhukulu wa Mezahabu.

⁴⁰ Abakulu b'ebika ebisimuka mu Esau, ng'ojiira ku ndhu dhaibwe ni ku biketezo byaibwe era ni ku maina gaibwe, ni bano: Timuna, Aluva, Yethethi,

⁴¹ Oholibama, Ela, Pinoni,

⁴² Kenazi, Temani, Mibizari,

⁴³ Magadieli, ni Iramu. Abo n'abakulu b'ebika ebyasimuka mu Edomu, oyo nga ni Esau, dhaadha wa Abaedomu, nga bwe baali mu biketezo byaibwe, mu nsi ye baafuna.